ពេជ្រ ចរណៃ ឆ្លើយតប ក្រោយការលើកឡើងថារៀបចំកម្មវិធីសម្តែងសិល្ប:បុរាណខ្មែរ ចំរដូវបុណ្យភ្ជុំ

តារាសម្តែងកញ្ញា ពេជ្រ ចរណៃ បានចេញមុខឆ្លើយតបភ្លាមៗបន្ទាប់មានការបញ្ចេញមតិមួយចំនួនពីសំណាក់មហាជនថា មូលហេតុដែលមិនសូវមានការផុសផុលទៅទិញសំបុត្រចូលទស្សនា ការសម្តែងមហោស្រព​សិល្ប​:​បុរាណ​ខ្មែរ​រឿង​ «​ព្រះបាទ​ជ័យ​វរ្ម័ន​ទី​៧» គឺដោយសារតែធ្វើចំឱកាសនៃរដូវបុណ្យភ្ជុំ ។

ត្រង់ចំណុចនេះ ចរណៃ បានលើកឡើង ២ចំណុចឱ្យអ្នកបញ្ចេញមតិពិចារណាដែរថា “ការសម្តែងនៅថ្ងៃ២៨-២៩ កញ្ញា តែភ្នំធំគឺនៅថ្ងៃ ១.២.៣ កញ្ញា” និងបានចោទសួរថា “សិល្បករសិល្បការិនី លោកគ្រូអ្នកគ្រូ រួមទាំងក្រុមការងារទាំងអស់ ជាង២០០នាក់ មិនមានស្រុកកំណើតដែលត្រូវទៅទេមែនទេ?”។

តារាសម្តែងកញ្ញា ពេជ្រ ចរណៃ កាលពីថ្ងៃម្សិលមិញបានផ្តល់កិច្ចសម្ភាសន៍ តាមរយ:សារព័ត៌មានកម្ពុជាថ្មីដោយនាងបានបង្ហាញក្តីកង្វល់ និងការព្រួយចិត្តខណ:ដែលកម្មវិធីសិល្ប:បុរាណខ្មែរ ហាក់មិនសូវមានការចូលរួមគាំទ្រច្រើនពីសំណាក់មជ្ឈដ្ឋានមហាជនពិសេសយុវវ័យតែម្តង។

ហេតុផលនេះ ទើបនាងអំពាវនាវដោយទទូចសូមឲ្យកូនខ្មែរទាំងអស់ ស្រាក់ដៃគ្នាចូលរួមលើកស្ទួយវប្បធម៌សិល្ប:បុរាណខ្មែរតាមរយ:ការទិញសំបុត្រចូលរួមទស្សនាផ្សព្វវផ្សាយ​ពី​មហោស្រព​សិល្ប​:​បុរាណ​ខ្មែរ​រឿង​ «​ព្រះបាទ​ជ័យ​វរ្ម័ន​ទី​៧»​ ដែល​នឹង​រៀបចំ​សម្តែង​ចាប់ពីថ្ងៃទី ២៨ខែកញ្ញា ដល់ថ្ងៃទី២៩ ខែកញ្ញា ឆ្នាំ២០២៤នេះ។

ទោះបីជាយ៉ាងណាបន្ទាប់ការលើកឡើងជាកង្វល់របស់តារាស្រី ពេជ្រ ចរណៃ គេឃើញមានការបញ្ជេញមតិជាច្រើនពីមហាជន ដោយក្នុងនោះមានទាំងការគាំទ្រ និងចំណែកខ្លះទៀតបានលើកមូលហេតុថា មកពីរៀបចំកម្មវិធីសម្តែងខុសពេលពោលគឺធ្វើចំរដូវភ្ជុំទើបមិនសូវមានអ្នកទិញសំបុត្រទស្សនាទៅវិញ ជាហេតុធ្វើឱ្យកញ្ញាចេញមុខមកឆ្លើយតបម្តងទៀត។

តារាសម្តែងកញ្ញា ពេជ្រ ចរណៃ ដែលកំពុងលេចធ្លោតាមរយ:ក្បាច់គុនល្បុក្កតោខ្មែរបានបន្ថែមថាត្រង់នេះ សរបញ្ជាក់អោយឃើញថាតម្លៃនៃសិល្បៈវប្បធម៌ខ្មែរ មានតម្លៃនៅកម្រិតណា..កូនខ្មែរគ្រប់រូបគឺមានតួរនាទីថែរក្សាលើកស្ទួយផ្សព្វផ្សាយនៅសិល្ប:វប្បធម៌ខ្មែរ ៕ អត្ថបទ ចាន់រ៉ា