សម្ដេចមហាបវរធិបតី ហ៊ុន ម៉ាណែត កោតសរសើរ កុយ អេណា MGC លំដាប់រងទី១ ក្រោយបញ្ចេញរូបភាព ព្រះម៉ែធម្មជាតិ

ក្រោយបង្ហោះរូបភាព “ព្រះម៉ែធម្មជាតិ” លើបណ្ដាញសង្គមហ្វេសប៊ុក កុយ អេណា អតីត Miss Grand Cambodia 2023 លំដាប់រងទី១ ត្រូវបានសម្ដេចមហាបវរធិបតី ហ៊ុន ម៉ាណែត កោតសរសើរ និងអរគុណសម្រាប់ការខិតខំប្រឹងប្រែងលើកស្ទួយឲ្យប្រជាជនខិតខំថែរក្សា និងជួយការពារធម្មជាតិឲ្យបានច្រើន។

នេះបើតាមផេកផ្លូវការរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដី្រកម្ពុជា បានលើកឡើងថា “សូមអរគុណប្អូនៗ ដែលបានខិតខំរៀបចំផលិតនូវទស្សនីយភាពទាំងនេះទ្បើង ក្នុងគោលបំណងដើម្បីទាក់ទាញចំណាប់អារម្មណ៍របស់ប្រជាពលរដ្ឋក្នុងការចូលរួមការពារធនធានធម្មជាតិ។ យើងរួមគ្នាការពារធនធានធម្មជាតិ ដើម្បីអនាគតកូនចៅជំនាន់ក្រោយរបស់យើង។”

ភ្លាមៗអតីតបវរកញ្ញារូបនេះ ក៏បានឆ្លើយតបទៅវិញថា “នាងខ្ញុំសូមអរគុណដល់សម្តេចធិបតី ហ៊ុន ម៉ាណែត ដែលពេញចិត្តនិងគាំទ្រក្រុមនាងខ្ញុំ ក្នុងការផលិតនៅ concept មួយនេះឡើង។ នាងខ្ញុំពិតជារំភើបហើយនិងសប្បាយចិត្តជាខ្លាំងក្រៃលែង ដោយការខិតខំប្រឹងប្រែងរបស់ក្រុមកាងារ បានក្តីស្ងោចសរសើរពីសម្ដេច”។ លើសពីនោះ ក្នុងការបំផុសគំនិតរូបភាព “ព្រះម៉ែធម្មជាតិ” បែបនេះ គឺមានការជ្រោមជ្រែងពីលោក តាន់ គីមសួរ ដែលគ្រប់គ្នាស្គាល់ថាជាអ្នកថែរក្សា និងអភិរក្ស ការពារព្រៃឈើផងដែរ។