ទោះឃ្លាតព្រះកាយ តែព្រះនាង ជេនណា នៅតែនឹករលឹកប្រទេសកម្ពុជា ក្នុងរដូវបុណ្យភ្ជុំបិណ្ឌ

បើទោះបីជាព្រះកាយនៅឯប្រទេសចិនក៏ពិតមែន តែព្រះនាង នរោត្តម ជេនណា បានបង្ហោះរូបភាពអមជាមួយសំណេរ បញ្ជាក់ពីភាពនឹករលឹកមាតុភូមិកម្ពុជា នៅក្នុងរដូវបុណ្យភ្ជុំបិណ្ឌ។

ក្រោមការអញ្ជើញជាកិត្តិយស និងតំណាងឲ្យប្រទេសកម្ពុជា នៅក្នុងវេទិកាវប្បធម៌ទីក្រុងប៉េកាំង នៅប្រទេសចិន ព្រះនាង នរោត្តម ជេនណា បានលើកបង្ហាញនូវនៅលើឆាតអន្តរជាតិជាច្រើនតាមរយៈ សំលៀកបំពាក់ ក្បាច់របាំ និងសិល្បៈវប្បធម៌ផ្សេងៗជាច្រើនទៅកាន់ប្រជាជនចិននឹងពិភពលោក ដែលធ្វើប្រជាជនខ្មែកោតសរសើរ និងមានមោទកភាពជាខ្លាំងចំពោះនាង។ លើសពីនោះទៅទៀតព្រះនាង ក៏បានចូលរួមជាភ្លៀវកត្តិយសនៅក្នុងកម្មវិធី ភាពយន្តមនោសញ្ចេតនា Lushan លើកទី៥ ដែលបានបកស្រាយចម្រៀងបទ 甜蜜蜜 (Tian Mi Mi) ជាភាសាចិនថែមទៀតផង។

ទន្ទឹមនឹងការយាងទៅឯប្រទេសចិនលើកនេះ ព្រះនាង ជេនណា បានបង្ហោះរូបភាពអមជាមួយសំណេរនឹករលឹកប្រទេសកម្ពុជា ដោយព្រោះព្រះនាងបានចេញទៅក្រៅប្រទេសចំពេលពិធីបុណ្យភ្ជុំបិណ្ឌប្រពៃណីជាតិខ្មែរ។ ព្រះនាងបានលើកឡើងថា “ក្នុងឱកាសនៃពិធីបុណ្យភ្ជុំបិណ្ឌនេះ ទោះបីជាខ្ញុំនៅឆ្ងាយពីប្រទេសកម្ពុជា ប៉ុន្តែចិត្តខ្ញុំកំពុងនឹករលឹកនៅជាមួយគ្រួសារនិងពុកម៉ែបងប្អូនទាំងអស់គ្នាជានិច្ច។ ក្នុងឱកាសដ៏ពិសិដ្ឋនេះ ខ្ញុំកំពុងស្ថិតនៅ Niushoushan (牛首山) ក្នុងទីក្រុង ណានជីង សាធារណរដ្ឋប្រជាមានិតុចិន ដែលទីនេះជាកន្លែងគោរពព្រះពុទ្ធសាសនាដ៏ធំមួយដែលគេស្គាល់ថាជា «ភ្នំក្បាលគោ» ។”

ព្រះនាងបានបន្តថា “កន្លែងនេះមានប្រវត្តិដ៏សម្បូរបែបដែលមានអាយុកាលតាំងពីរាជវង្សថាង ឥឡូវនេះជាកន្លែងសម្រាប់វិមាន Foding ដែលដាក់តាំងវត្ថុបុរាណតែមួយគត់នៃព្រះកេសរបស់ព្រះពុទ្ធ។ ជាក្ដីជ្រះថ្លាណាស់ដែលបានថ្វាយការគោរពដល់ព្រះពុទ្ធ ជាទីសក្ការៈនៅទីនេះ។” បន្ថែមពីលើនោះ ព្រះនាង នរោត្តម ជេនណា ក៏បានជូនពរប្រជាជនកម្ពុជាក្នុងឱកាសពិធីបុណ្យភ្ជុំបិណ្ឌថែមទៀតថា “ក្នុងឱកាសបុណ្យភ្ជុំបិណ្ឌ ប្រពៃណីជាតិខ្មែរ ខ្ញុំសូមជូនពរឱ្យពុកម៉ែបងប្អូនទាំងអស់គ្នា ឱ្យជួបតែសេចក្ដីសុខសុវត្ថិភាពគ្រប់ពេលវេលានិងទីកន្លែង ព្រមទាំងរីករាយជាមួយការជួបជុំក្រុមគ្រួសារក្នុងឱកាសបុណ្យភ្ជុំបិណ្ឌនេះ៕”