ប្លែកដាច់គេ! Pre Wedding សុភ័ក្រ កុសម៉ា ស្លៀកឈុតល្ខោនបាសាក់ លើទឹកដីអង្គរ

ជាង ១ខែ បន្ទាប់ពីបើកបង្ហាញវត្តមានដៃគូជីវិតជាសាធារណៈ នៅថ្ងៃនេះ សុភ័ក្រ្ត កុសម៉ា បានធ្វើឱ្យសាធារណជន ពិសេសអ្នកគាំទ្រ ភ្ញាក់ផ្អើលជាថ្មី ជាមួយនឹងរូបថត Pre Wedding របស់ខ្លួន ក្នុងឈុតល្ខោនបាសាក់ ដែលមិនធ្លាប់មានតារារូបណាធ្លាប់បង្ហាញរូប Pre Wedding បែបនេះពីមុនមកឡើយ។

ជាមួយនឹងគំនិតនៃការលើកយកឈុតនេះ សុភ័ក្រ កុសម៉ា និងអនាគតស្វាមី ទទួលបានការកោតសរសើរខ្លាំងពីសំណាក់អ្នកគាំទ្រ ដោយយល់ថា ជាការបំផុសនិងលើកតម្កើងតម្លៃនៃល្ខោនបាសាក់ ឱ្យកាន់តែផុសផុលថែមទៀត ខណៈកន្លងមក ពិធីការិនីកំពូលវោហាស័ព្ទរូបនេះ ធ្លាប់រួមចំណែកលើកស្ទួយសិល្បៈបុរាណខ្មែរមួយនេះច្រើនលើកមកហើយ។

ជាមួយនឹងគំនិតដែលស្លៀកឈុតល្ខោនបាសាក់នេះដែរ សុភ័ក្រ្ត កុសម៉ា បង្ហើបដែរថា កញ្ញា និងអនាគតស្វាមី គ្រោងស្លៀកឈុតនេះ ២ឆ្នាំទៅហើយ។ ក្នុងដំណើរការនៃការថតរូបនេះទៀតសោត ក្រុមការងារ និងមិត្តភក្តិរបស់តារាស្រីរូបនេះ ក៏បានបញ្ចេញមតិដោយបញ្ជាក់ពីភាពលំបាកនៃការថតរូប Pre Wedding ផងដែរ ដែលទាក់ទងនឹងអាកាសធាតុ។ តែយ៉ាងណាមិញ រូបថតស្អាតៗជាច្រើនសន្លឹក ត្រូវបានផ្តិតមកបង្ហាញសាធារណជន ពិសេសអ្នកគាំទ្ររបស់កញ្ញា។

គួររម្លឹកថា មុនបង្ហាញរូបថត Pre Wedding ក្នុងឈុតល្ខោនបាសាក់ខ្មែរ ម្ចាស់ Kosoma Entertainment រូបនេះ ក៏ធ្លាប់បានបង្ហាញរូបថតក្នុងឈុតរៀបការបែបបរទេសម្តងរួចមកហើយ កាលពីអំឡុងចុងខែកញ្ញាកន្លងទៅ ខណៈថ្ងៃរៀបអាពាហ៍ពិពាហ៍ពិតប្រាកដ ក៏កាន់តែខិតជិតមកដល់ហើយ៕