ឱក សុគន្ធកញ្ញា លើកទឹកចិត្តបេក្ខជនប្រឡងបាក់ឌុបឲ្យទទួលបានជោគជ័យល្អគ្រប់គ្នា

ស្របពេលដែលចូលមកដល់នៃការប្រឡងបាក់ឌុប (សញ្ញាបត្រមធ្យមសិក្សាទុតិយភូមិ) សម័យប្រឡងចាប់ពីថ្ងៃទី០៨-០៩ ខែតុលាឆ្នាំ២០២៤ កំពូលតារាចម្រៀងអ្នកនាង ឱក សុគន្ធកញ្ញា បានចេញសារលើកទឹកចិត្តដល់បេក្ខជនទូទាំងប្រទេសឲ្យខិតខំអស់ពីសមត្ថភាពដើម្បីទទួលបានលទ្ធផលល្អគ្រប់ៗគ្នា ។

ជាការពិតណាស់ចូលមកដល់ថ្ងៃទី១ នៃការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នាថ្ងៃទី០៨ ខែតុលាឆ្នាំ២០២៤នេះ គេកត់សម្គាល់ឃើញមានតារាសិល្ប:ប្រុស-ស្រីល្បីៗមួយចំនួន ព្រមមហាជន គឺបាននាំគ្នាចេញសារលើកទឹកចិត្ត និងជូនពរបេក្ខជនកំពុងប្រឡងនៅទូទាំងប្រទេស។

តួយ៉ាងតារាចម្រៀងអ្នកនាង ឱក សុគន្ធកញ្ញា បានបញ្ចេញខ្លឹមសារដោយការលើកទឹកចិត្តនិងជូនពរដល់បេក្ខជនទាំងអស់ឲ្យទទួលបានជោគជ័យក្នុងការប្រឡងផងដែរ។ អ្នកនាងឱក សុគន្ធកញ្ញាបានលើកឡើងថា សូមជូនពរប្អូនៗដែលត្រូវប្រឡងសញ្ញាបត្រមធ្យមសិក្សាទុតិយភូមិថ្ងៃនេះឲ្យមានស្មារតី រឹងមាំមោះមុត បំពេញកាតព្វកិច្ចចំនួន២ថ្ងៃឲ្យបានល្អតាមអ្វីដែលអាចធ្វើទៅបាន ស៊ូៗ បងកញ្ញា ផ្តល់កម្លាំងចិត្តពីចម្ងាយឲ្យណា។

ចំណែកឯតារាចម្រៀងរួមទ្រនុំអ្នកនាង ពេជ្រ សោភា ក៏បានចេញសារជូនពរដល់បេក្ខជនប្រឡងទាំងអស់ដែរថា”នាងខ្ញុំ ពេជ្រ សោភា សូមជូនពរក្មួយៗទី១២ សំណាងល្អក្នុងការប្រឡងខំប្រឹងនិងធ្វើឲ្យអស់ពីសមត្ថភាពណា”។

គួរជម្រាបថាគណៈមេប្រយោគនិងគណៈកម្មការនា នាដែលត្រូវចូលរួមក្នុងដំណើរការប្រឡងនៅគ្រប់ដំ ណាក់កាលមានចំនួនសរុបជិត៣ម៉ឺននាក់ខណៈមានបេក្ខជនចុះឈ្មោះប្រឡងសរុបចំនួនជាង ១៣ម៉ឺននាក់ ហើយបេក្ខជនត្រូវបានរៀបចំចំនួន ២៥នាក់ ក្នុងមួយបន្ទប់៕ អត្ថបទ៖ ចាន់រ៉ា