ជូរី ល្អហួស ៖ ខ្ញុំមិនព្រមឲ្យជាតិសាសន៍ណា មើលងាយប្រទេសខ្ញុំបានទេ ទោះបីក្តីស្រមៃត្រូវបញ្ចប់ក៏ដោយ

ខណ:ដែលរឿងរ៉ាវចម្រូងចម្រាស់កំពុងក្តៅដូចបាយពុះ ក្រោយភាគីថៃបានដកសិទ្ធិកម្ពុជាធ្វើជាម្ចាស់ផ្ទះ MGI 2024 ជាថ្មីម្តងទៀត បវរកញ្ញាវ័យក្មេង ជូរី ល្អហួស បានអះអាងឆន្ទ:របស់ខ្លួនថា “មិនព្រមឲ្យជាតិសាសន៍ណាមួយមកមើលងាយប្រទេសនិងប្រជាជនកម្ពុជាបានទេ បើទោះបីជាក្តីស្រមៃរបស់ខ្លួនកាលពីក្មេង ត្រូវបញ្ចប់នៅពេលនេះក៏ដោយ”។

បវរកញ្ញាវ័យក្មេង ជូរី ល្អហួស ដែលជាម្ចាស់មកុដ Miss Preteen Junior Idol World 2024 ក៏ធ្លាប់បានប្រកាសពីជំហររបស់ខ្លួនដោយមិនចូលរួមការប្រកួកម្មវិធី Miss Grand ក្នុងឆ្នាំ២០២៧ ដោយយុវតីរូបនេះ ប្តូរទៅប្រកួត Miss universe Cambodia បន្ទាប់មានរឿងចម្រូងចម្រាស់ខាងភាគីថៃមិនឲ្យតម្លៃមកលើកម្ពុជា។

ល្អហួស បានបញ្ជាក់ឆន្ទ:ឲ្យដឹងថា “នាងខ្ញុំមិនព្រមឲ្យអោយជាតិសាសន៍ណាមួយមកមើលងាយប្រទេសរបស់នាងខ្ញុំនិងប្រជាជនរបស់នាងខ្ញុំបានទេ ទោះបីជាក្តីស្រមៃរបស់នាងខ្ញុំកាលនៅពីក្មេងត្រូវបញ្ចប់នៅពេលនេះ ក៏នាងខ្ញុំមិនព្រមបោះបង់ក្តីស្រមៃរបស់នាងខ្ញុំចោលដែរ”។

បវរកញ្ញាវ័យក្មេងរូបនេះបាននិយាយទៀតថានាងត្រូវតែបន្តក្តីស្រមៃទៅមុខជាមួយនិង ស្នាមញញឹមថ្មី ក្តីស្រមៃថ្មី ដើម្បីលើកមុខមាត់ប្រទេសកម្ពុជារបស់នាងខ្លួនម្តងទៀតនៅលើឆាកអន្តរជាតិ។ ល្អហួស បន្ថែមថា «មាសសុទ្ធមិនដែលខ្លាចភ្លើង» ជួបអ្នកឆ្នាំខាងមុខនេះ Miss universe Cambodia ។

គួរជម្រាបដែរថាអ្នកនាង ដេននី ក្វាន់ ម្តាយរបស់ ជូរីល្អហួស កាលពីថ្ងៃទី០៧ ខែតុលា ឆ្នាំ២០២៤ ម្សិលមិញនេះ បានបញ្ជាក់ច្បាស់ៗថាគម្រោងដែល ល្អហួស នឹងចូលរួមប្រកួតកម្មវិធីMiss Grand ក្នុងឆ្នាំ២០២៧ ខាងមុខនេះ គឺត្រូវបានប្ដូរទៅប្រឡងកម្មវិធីផ្សេងវិញ។ នាងថាខ្លួនមិនឲ្យកូនស្រីទៅប្រកួតកម្មវិធីណាដែលមិនឲ្យតម្លៃជាតិសាសន៍ខ្មែរនោះឡើយ ហើយមិនខ្វះទេកម្មវិធីបវរកញ្ញាផ្សេងៗទៀតដែលល្អ៕ អត្ថបទ៖ ចាន់រ៉ា