នី មុន្នីនាថ បង្ហើបតម្រុយរឿងជ្រើសរើសគូអនាគត

តារាសម្តែងទឹកភ្នែកកញ្ញា នី មុន្នីនាថ ទោះបីពេលនេះនាងមិនទាន់ជ្រើសរើសបានដៃគូជីវិតដែលអាចកាន់ដៃគ្នាក្រាបផ្ទឹម (ចូលរោងការ) យ៉ាងណាក្តី ក៏ស្រាប់តែតារាស្រីរូបនេះ បានបង្ហើបពីចំណុចពិសេស ឬអាចជាតម្រុយមួយផងដែរក្នុងការជ្រើសរើសដៃគូអនាគត។

គេចាំបានថា តារាសម្តែងល្បីឈ្មោះកញ្ញា នី មុន្នីនាថ កាលពីអំឡុងឆ្នាំ២០១៤ នាងធ្លាប់បានភ្ជាប់ម្តងរួចមកហើយជាមួយអតីតគូដណ្តឹងដែលជាអាណិកជនខ្មែររស់នៅសហរដ្ឋអាមេរិក ប៉ុន្តែក្រោយមកដោយជួប​ភាព​រកាំរកូស​ទើបចំណងស្នេហ៍របស់អ្នកទាំងពីរក៏ត្រូវបានកាត់ផ្តាច់ទៅវិញ។ យ៉ាងណារហូតមកទល់ពេលនេះ នី មុន្នីនាថ មិនទាន់មានដំណឹងនៃការចាប់ដៃគូជាមួយបុរសណាម្នាក់សម្រាប់ថ្ងៃអនាគតឡើយ។

បើតាមការឲ្យដឹងពីតារាភាពយន្ត នី មុន្នីនាថ បានបញ្ជាក់ថា សម្រាប់ដៃគូជីវិតដែលអាចរួមដំណើរជាមួយគ្នាដល់ចាស់កោងខ្នង រៀងខ្លួនដោយមិនហត់នឿយចិត្តគឺជាដៃគូដែលស្អាតស្អំភក្តីភាពរវាងគ្នា ហើយអ្នកទាំងពីរស្អប់ខ្ពើមបំផុត អំពើនៃភាពប្រឡូកប្រឡាក់ខាងក្រៅ ដោយសច្ចាយ៉ាងហ្មត់ចត់ថា ចំណុចហ្នឹងជាបន្ទាត់ក្រហមបើនរណាហ៊ានល្មើសមិនអាចលើកលែងឲ្យបានជាដាច់ខាត។

តារាស្រី នី មុន្នីនាថ លើកជាឧទាហរណ៍ដូច្នេះថា ស្បែកជើងស្អាតឬមិនស្អាតមិនសំខាន់ឡើយ អ្វីដែលសំខាន់នោះគឺយើងពាក់ទៅមិនឈឺជើងក្នុងជីវិតគូរចង់ទៅដល់គោលដៅ ចាំបាច់បំផុតមិនអាចគ្រាំគ្រាចិត្តនោះទេ។ កញ្ញាបន្ថែមថា ត្រូវចាំបើអ្នកយល់គ្នាបាន គឺអ្នកអាចបន្តដំណើរលើវិថីជីវិតគូទៅជាមួយគ្នាដោយរីករាយ។

ជាការកត់សម្គាល់ តារាស្រីទឹកភ្នែក នី មុន្នីនាថ តែងតែឃើញបង្ហាញសារចូលរួមបំផុសស្មារតីដល់បងប្អូនប្រជាពលរដ្ឋខ្មែរនិងសិល្បករ-សិល្បការិនីក្នុងកិច្ចការងារសង្គម ក៏ដូចជាការចូលរួមបរិច្ចាគឈាមជួយសង្គ្រោះអាយុជីវិត អ្នកដែលត្រូវការឈាមបន្ទាន់ផ្សព្វផ្សាយការអប់រំផ្សេងៗជាដើម៕ អត្ថបទ៖ ចាន់រ៉ា