ល្អហួស ត្រៀមថត “របាំអប្សរា” លើទឹកដីអង្គរលើកទី ២ ខណ:ឯសារថតលើកទី១ បាត់បង់ប្លង់សំខាន់ៗ

បវរកញ្ញាវ័យក្មេង ជូរី ល្អហួស បានឲ្យដឹងថាខ្លួននឹងត្រៀមថត «រាំរបាំអប្សរា» លើទឹកដីអង្គរជាលើកទី២ ដោយសារតែឯកសារកាលពីថតលើកទី១ ត្រូវបានបាត់បង់ប្លង់សំខាន់ៗបណ្តាលមកពីបញ្ហាបច្ចេកទេស ដែលមិនអាចទាញយកវិញបានទេ។

កាលពីថ្មីៗកន្លងទៅនេះ ជូរី ល្អហួស ដែលជាម្ចាស់មកុដ Miss Preteen Junior Idol 2024 បានសម្រេចក្តីស្រមៃដូចបំណងរបស់ខ្លួន គឺថតវីដេអូ «រាំរបាំអប្សរា» នៅប្រាសាទអង្គរវត្ត ដើម្បីទុកជាឯកសារឲ្យកូនខ្មែរជំនាន់ក្រោយៗបានស្គាល់នូវរបាំបុរាណខ្មែរដ៏ល្អផូរផង់។

ថ្វីត្បិតជាក្តីស្រមៃរបស់ ល្អហួស ត្រូវបានសម្រេចដូចបំណងក៏ពិតមែន ប៉ុន្តែសម្រាប់ការថត «រាំរបាំអប្សរា» នៅប្រាសាទអង្គរវត្ត បែរជាត្រូវបាត់បង់ប្លង់សំខាន់ៗទាំងស្រុង ទើបតម្រូវឲ្យបវរកញ្ញាវ័យក្មេងរូបនេះសុំការអនុញ្ញាតថតជាលើកទី២ ម្តងទៀត។

ជូរី ល្អហួស បានបញ្ជាក់ឲ្យដឹងនៅព្រឹកថ្ងៃទី១៨ ខែតុលានេះថា ឯកសាររបាំ «អប្សរា» ត្រូវបានបាត់បង់ប្លង់សំខាន់ៗទាំងស្រុង ដោយសារតែមានបញ្ហាបច្ចេកទេសមិនអាចយកមកវិញបានទេ ដោយហេតុនេះ ខ្លួន រួមនឹងនាដការីផ្សេងទៀតក៏ដូចជាក្រុមការងារ នឹងចាប់ផ្តើមថតឡើងវិញសារជាថ្មីម្តងទៀតនូវរបាំអប្សរា លើទឹកដីអង្គរជាលើកទី២ ។

គួររម្លឹកថា កាលពីថ្ងៃទី៣១ ខែកក្កដាឆ្នាំ២០២៤ ម្ចាស់មកុដMiss Preteen Junior Idol 2024 រូបនេះ គឺបានបង្ហា ញខ្លួននៅលើទឹកដីសៀមរាបអង្គរដោយបានបំពេញនូវក្តីស្រមៃរបស់ខ្លួន តាមរយ:ការថត «របាំអប្សរា» ។ អំឡុងពេលនោះជូរី ល្អហួស បានបង្ហាញក្តីរំភើបជាខ្លាំង ក្រោយនាងត្រូវបានការអនុញ្ញាតិឲ្យថតវីដេអូរាំ «របាំអប្សរា» នៅប្រាសាទអង្គរវត្តនាទឹកដីខេត្តសៀមរាបក្នុងការចូលរួមផ្សព្វផ្សាយលើកស្ទួយនូវមរតកវប្បធម៌ និងទេសចរណ៍ទៅលើឆាកជាតិនិងឆាកអន្តរជាតិ៕ អត្ថបទ៖ ចាន់រ៉ា