សិល្បកររន្ធត់ក្រោយទទួលដំណឹងលោក កៅ សីហា ទទួលមរណភាពដោយសារដាច់សរសៃឈាមខួរក្បាល

លោក កៅ សីហា ដែលជាអ្នកដឹកនាំសម្តែង និងជាអ្នកនិពន្ធល្បីឈ្មោះប្រចាំប្រទេសកម្ពុជាបានទទួលមរណភាពហើយបន្ទាប់មានជំងឺដាច់សរសៃឈាមខួរក្បាលធ្ងន់ធ្ងរកាលពីរសៀលថ្ងៃទី២០ ខែតុលា ឆ្នាំ២០២៤ មិនអាចជួយសង្គ្រោះជីវិតបានឡើយ។

នេះជាដំណឹងដ៏រន្ធត់ និងសោកសៅបំផុតសម្រាប់ក្រុមគ្រួសារ និងសិល្បករ-សិល្បការិនីព្រមទាំងអ្នកគាំទ្រក្រោយទទួលដំណឹងនៃមរណភាពរបស់អ្នកដឹកនាំសម្តែងដ៏ឆ្នើមប្រចាំហង្សមាស។ លោក កៅ សីហា កាល ពីថ្ងៃទី២០ ខែតុលាឆ្នាំ២០២៤ ត្រូវបានក្រុមគ្រួសារសម្រេចបញ្ជូនទៅសង្គ្រោះនៅមន្ទីប្រទេសវៀតណាមបន្ទាប់ពីមានជំងឺដាច់សរសៃ​ឈាមខួរក្បាលធ្ងន់ធ្ងរ។

ទោះបីជាយ៉ាងណាជាអកុសលជំងឺធ្ងន់ធ្ងរលោក កៅ សីហា បានទទួលមរភាពទាំងវ័យក្មេង និងអាឡោះអាល័យជាទីបំផុតសម្រាប់ក្រុមគ្រួសារ និងសិល្បករ-សិល្បការិនីខ្មែរ។ អ្នកសិល្ប:ជាច្រើនបានសម្តែងកាចូលរួមរំលែកទុក្ខដ៏ក្រៀមក្រំនិងសោកស្តាយជាពន់ពេកនៃការស្លាប់របស់អ្នកដឹកនាំសម្តែងរូបនេះ។

តារាចម្រៀងលោក ណុប បាយ៉ារិទ្ធ បានរៀបរាប់ទាំងក្តុកក្តួលថា «លឿនពេកហើយបងអើយ ទើបតែជួបគ្នាថ្ងៃមុននៅក្រុមហ៊ុនសោះ និងទើបតែចែករំលែកបទចម្រៀងមរតកដើមជាមួយគ្នាតាមខមមិនសោះពិបាកទទួលយកណាស់បងអនុស្សាវរីយ៍ជាច្រើនជាមួយគ្នា មិនថាថតMV ថតរឿងរាជិនីភូមិគ្រឹះ គិតៗទៅសង្ខារមនុស្សពិតជាមិនទៀងទាត់មែន»។

អ្នកនាង ឱក សុគន្ធកញ្ញា បានរៀបរាប់ដែរថា «ទទួលយកមិនបានទេបងអើយ ពិតជាលឿនពេកហើយនៅតែឭសំឡេងបងពេញត្រចៀកខ្ញុំនេះជាការបាត់បង់ធនធានមនុស្សដ៏សំខាន់មួយរូបទៀតនៅក្នុងវិស័យសិល្ប: ស្នាដៃដែលបងបានសាងដោយកម្លាំងកាយកម្លាំងចិត្ត បេះដូង និងចំណេះវិជ្ជា ស្នាដៃរបស់បងនៅតែជាចងចាំរបស់ពួកយើងពេលនេះបងលាទៅគ្មានថ្ងៃត្រឡប់ សូមឲវិញ្ញាណក្ខន្ធបងទៅកាន់ទីដ៏ស្ងប់សុខ»៕

អត្ថបទ៖ ចាន់រ៉ា