លោក អុឹម ជីវ៉ា បំផុសសិល្បករសិល្បការិនីដែលមានជីវភាពខ្វះខាត គួរធ្វើប័ណ្ណប.ស.ស ជាការល្អបំផុត

លោក អុឹម ជីវ៉ា បានចេញមកអំពាវនាវនិងបំផុសសិល្បករសិល្បការិនីខ្មែរដែលមានការខ្វះខាត គួរទៅធ្វើប័ណ្ណប.ស.សដែលជាជម្រើសដ៏ល្អបំផុតសម្រាប់ថ្ងៃខាងមុខពោលគឺពេលដែលមានជំងឺ។ លោកលើកឡើងដូច្នេះ ក៏ព្រោះតែបច្ចុប្បន្នសង្កេតឃើញមានអ្នកសិល្ប:មួយចំនួន ហាក់ជួបជីវភាពលំបាកនិងខ្វះខាត។

លោកថា ការធ្វើប័ណ្ណ.ប.ស.ស នេះ អាចជួយសម្រួលដល់យើងពេលមានជំងឺ ឬពេលត្រូវចូលសង្គ្រោះនៅមន្ទីពេទ្យ ហេតុនេះលោកយល់ថា សិល្បករសិល្បការិនី ដែលមានជីវភាពខ្វះខាត និងអ្នកសិល្បៈផ្សេងៗទៀតគួរទៅធ្វើប័ណ្ណប.ស.ស គឺជាការល្អបំផុត ព្រោះពេលឈឺប័ណ្ណ ប.ស.ស អាចជួយបានច្រើនប្រសើរជាជាងដេកចាំអំណោយ ដេកចាំលុយគេជួយ។

តាមរយ:ការលើកឡើងនេះ បានធ្វើឲ្យមហាជនមួយចំនួនបានបង្ហាញការគាំទ្រផងដែរ និងមានការលើកឡើងដូច្នេះថា “សូមគាំទ្រការធ្វើប័ណ្ណប.ស.សឥឡូវមានប្រសិទ្ធភាព និងមានការយកចិត្តទុកដាក់ខ្លាំងណាស់។ មានតែខ្លួនឯងជួយខ្លួនឯងទេកុំពឹងគេបើគេបិតភ្នែកម្ខាងមើលម្ខាងមិចជួយយើងបានទៅ”។

ជុំវិញការលើកទឹកចិត្តនេះ លោក អុឹម ជីវ៉ា ក៏បានគូសបញ្ជាក់ដែរថា កន្លងមក លោកបានណែនាំអ្នកសិល្បៈជាច្រើនឱ្យទៅធ្វើ ហើយបច្ចុបវ្បន្ននេះ គឺមានអ្នកធ្វើហើយច្រើនគួរសមដែរ៕ អត្ថបទ៖ ចាន់រ៉ា