មេ YG ប្រឈមមុខនឹងការចោទប្រកាន់ថ្មី ក្នុងសំណុំរឿងរត់ពន្ធនាឡិកាប្រណីត

Yang Hyun Suk ប្រធានផលិតករ YG Entertainment រងការចោទប្រកាន់ពីបទបំពានច្បាប់ស្តីពីការដាក់ទណ្ឌកម្មធ្ងន់ធ្ងរនៃឧក្រិដ្ឋកម្មជាក់លាក់ (ទាក់ទងនឹងគយ)។ ការិយាល័យព្រះរាជអាជ្ញាស្រុក Busan បានចោទប្រកាន់លោកដោយគ្មានការឃុំខ្លួន ពីបទនាំយកនាឡិកាប្រណីតចំនួនពីរគ្រឿងដែលមានតម្លៃសរុប ៨២៨​០៦០​ ០០០ (ប្រហែល ៦១៧ ០០០ ដុល្លារអាមេរិក) ចូលប្រទេសកូរ៉េ ដោយមិនប្រកាសឲ្យគយក្នុងខែកញ្ញា ២០១៤។

យោងតាមមាត្រា ២៤១ នៃច្បាប់គយ បុគ្គលដែលនាំចូលទំនិញត្រូវតែប្រកាសព័ត៌មានលម្អិតដូចជាឈ្មោះ បរិមាណ និងតម្លៃរបស់ទំនិញ។ ការខកខានក្នុងការប្រកាសទំនិញអាចប្រឈមនឹងការជាប់ពន្ធនាគាររហូតដល់ប្រាំឆ្នាំ ឬការផាកពិន័យរហូតដល់ដប់ដងនៃពន្ធគយ ជាមួយនឹងការពិន័យកាន់តែតឹងរ៉ឹង ប្រសិនបើតម្លៃរបស់ទំនិញដែលមិនបានប្រកាសលើសពី ២០០លាន ប៉ុន្តែតិចជាង ៥០០ លានវ៉ុន។

យ៉ាងណា ផលិតកម្ម YG បានសម្តែងការមិនសប្បាយចិត្តរបស់ខ្លួន ដោយបញ្ជាក់ថា សំណុំរឿងនេះត្រូវបានកាត់ទោសភ្លាមៗ មុនពេលលក្ខន្តិកៈនៃការកំណត់ផុតកំណត់។ ក្រុមហ៊ុនបានពន្យល់ថាលោក Yang បានស្ម័គ្រចិត្តបញ្ជូននាឡិកាទៅអាជ្ញាធរវិញក្នុងឆ្នាំ ២០១៧ ហើយបានសហការយ៉ាងពេញលេញជាមួយនឹងការស៊ើបអង្កេត។

ទោះបីជាយ៉ាងណាក៏ដោយ ប្រព័ន្ធផ្សព្វផ្សាយមួយបានរាយការណ៍ថា នាឡិកានេះមិនមែនជារបស់ឧបត្ថម្ភទេ ដោយសារលោក Yang បានស្នើសុំនាឡិកាជាក់លាក់ពីតំណាងអាស៊ីនៃម៉ាកប្រណីត មុនពេលចូលរួមព្រឹត្តិការណ៍នានាក្នុងប្រទេសសិង្ហបុរីក្នុងខែកញ្ញា២០១៤។ នាឡិកាទាំងនេះរួមបញ្ចូលនាឡិកាដែលមានលំនាំលលាដ៍ក្បាលតម្លៃ ៧១១ ៥១០ ០០០លានវ៉ុននិង នាឡិកាពណ៌ខ្មៅមួយទៀតមានតម្លៃ១១៦ ៥៥០ ០០០លានវ៉ុន។

ការចោទប្រកាន់នាពេលថ្មីៗនេះ បន្ថែមលើបញ្ហាផ្លូវច្បាប់ដែលមានស្រាប់របស់លោក រួមទាំងការផាកពិន័យកាលពីអតីតកាលសម្រាប់ការលេងល្បែងនៅក្រៅប្រទេស និងការកាត់ក្តីដែលកំពុងបន្តសម្រាប់ការប៉ុនប៉ងបិទបាំងការចោទប្រកាន់គ្រឿងញៀនប្រឆាំងនឹងអតីតសមាជិក iKON ។ សវនាការលើកដំបូងរបស់លោក Yang សម្រាប់ការចោទប្រកាន់ថ្មីនេះ ត្រូវបានកំណត់នៅថ្ងៃទី ១៥ ខែវិច្ឆិកា នៅតុលាការក្រុងសេអ៊ូលខាងលិច។

ពាក់ព័ន្ធនឹងបញ្ហានោះ វាក៏ត្រូវបានបង្ហាញផងដែរថា ភរិយារបស់ Yang គឺលោកស្រី Lee Eun Joo ដែលជាអតីតសមាជិកក្រុមចម្រៀងស្រី Swi.T ត្រូវបានពិន័យជាប្រាក់ ១២ លានក្នុងឆ្នាំ ២០២០ សម្រាប់ឧបទ្ទវហេតុបើកបរក្នុងស្ថានភាពស្រវឹងនៅទីក្រុង Jeju ដែលកំហាប់ជាតិអាល់កុលក្នុងឈាមរបស់នាងគឺ ០.១២០% បណ្តាលឲ្យមនុស្ស​២​នាក់​រង​របួស ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖ដៃគូចាស់ Shu Qi ប៉ះគ្នា​ម្ដង​ទៀត ​ក្នុង​ព្រឹត្តិការណ៍ Shanghai