២រសៀលថ្ងៃនេះ! សពលោក កៅ សីហា នឹងត្រូវបូជា នៅវត្តព្រែកឯង

ការបាត់បង់លោក កៅ សីហា បានធ្វើឲ្យអ្នកសិល្ប:ខ្មែរជាច្រើនបង្ហាញការសោកសៅ និងស្តាយស្រណោះជាខ្លាំងនៃមរណភាពអ្នកដឹកនាំសម្តែងដ៏ឆ្នើមរូបនេះ។

តាមការបញ្ជាក់ឲ្យដឹងពីក្រុមគ្រួសារសព របស់អ្នកដឹកនាំសម្តែងនិងជាផលិតករភាពយន្តរូបនេះ សពរបស់លោក កៅ សីហា នឹងត្រូវដង្ហែទៅបូជានៅវេលាម៉ោង ២រសៀល ថ្ងៃទី២៣ ខែតុលា ឆ្នាំ២០២៤នេះ នៅវត្តព្រែកឯង រាជធានីភ្នំពេញ ដោយដង្ហែរចេញពីគេដ្ឋានរបស់លោក នៅវេលាម៉ោង ១២ថ្ងៃត្រង់។ ដូច្នេះនេះជាពេលវេលាចុងក្រោយសម្រាប់សិល្បករ-សិល្បការិនីព្រមទាំងមិត្តភក្តិរួមអាជីពសិល្ប: ក្នុងការចូលរួមដង្ហែសពលោក កៅ សីហា ដើម្បីជូនដំណើរលាគ្នាដោយគ្មានថ្ងៃត្រឡប់។

លោក កៅ សីហាគឺជាអ្នកនិពន្ធនិងដឹកនាសម្តែងល្បី ឈ្មោះប្រចាំផលិតកម្មហង្សមាសលោកបានទទួលម រណភាពកាលពី ថ្ងៃទី២០ ខែតុលាឆ្នាំ ២០២៤ ក្នុងវ័យ ៤២ឆ្នាំ ដោយសារជំងឺដាច់សរសៃឈាមខួក្បាលធ្ងន់ធ្ងរ បន្ទាប់ពីបញ្ជូនទៅសង្គ្រោះនៅប្រទេសវៀតណាម។

សពលោក កៅ សីហា បានដឹកមកដល់គេហដ្ឋាននៅភ្នំពេញនាវេលាម៉ោង ១រំលងអាធ្រាត្រឈានចូលថ្ងៃទី ២១ខែតុលាឆ្នាំ២០២៤។ លោកកៅសីហាមានទីកន្លែងកំណើតនៅរាជធានីភ្នំពេញ លោកជាកូនប្រុសពៅ ក្នុងចំណោមបងប្អូន១៧នាក់។

មរណភាពលោក កៅ សីហា មិនត្រឹមតែជាការបាត់បង់ធនធានសិល្ប:មានសមត្ថភាព និង ទេពកោសល្យទេគឺ ជាការបាត់បង់ដ៏សោកស្តាយបំផុតសម្រាប់អ្នកគាំទ្រ ខណ:ដែលលោកបានបន្សល់ទុកស្នាដៃជាច្រើននិងការចង់ចាំសម្រាប់អ្នកសិល្ប:រូមអាជីពទៀតផង៕ អត្ថបទ៖ ចាន់រ៉ា