សិល្បករវ័យក្មេងឆ្នើម និងមានទេពកោសល្យ ៤ដួងលាចាកលោក នៅសល់ត្រឹមស្នាដៃសិល្ប:

សិល្បករ ៤ដួង ដែលត្រូវបានគេស្គាល់និងឱ្យតម្លៃ ថាជាតារាកំប្លែង-សម្តែង និងអ្នកដឹកនាំ ដ៏មានទេពកោសល្យ បានលាចាកលោកនេះទៅ បន្សល់ត្រឹមស្នាដៃសិល្បៈ ជាចំណងដៃអនុស្សាវរីយ៍នៃការចាកចេញគ្មានថ្ងៃត្រឡប់របស់ខ្លួន ដែលរួមមានដូចជា លោក ខាត់ ចំរើន តារាកំប្លែង និងជាអ្នកចម្រៀងបុរាណ, លោក ឈឿន រិទ្ធី, លោក អៀង ចេនឡា និងលោក កៅ សីហា ដែលទើបទទួលមរណភាពកាលពីថ្ងៃទី ២០ ខែតុលានេះ។

ចំពោះការបាត់បង់សិល្បករដ៏ឆ្នើមទាំងនេះ បានធ្វើឱ្យអ្នកគាំទ្រសល់ត្រឹមតែការចងចាំ និងនឹករលឹកប៉ុណ្ណោះ។ គួររម្លឹកពីមរណភាពរបស់ សិល្បករទាំង ៤ដួង គឺសុទ្ធសឹងតែបាត់បង់ជីវិតទាំងវ័យក្មេង ដោយតែបញ្ហាសុខភាព។

១. លោក អៀង ចេនឡាន តារាកំប្លែង និងចម្រៀង ទទួលមរណភាពកាលពីយប់ថ្ងៃទី ២៨ ខែកុម្ភ: ឆ្នាំ២០២២ ដោយសារ ជំងឺរលាកស្រោមខួរក្បាលធ្ងន់ធ្ងរ។

២. លោក ខាត់ ចំរើន តារាកំប្លែង និងចម្រៀងបុរាណ ដែលត្រូវជាប្អូនប្រុសបង្កើតរបស់អ្នកនាង ខាត់ សុឃីម ទទួលម រណភាពកាលពីព្រឹកថ្ងៃទី ២០ ខែវិច្ឆិកា ឆ្នាំ២០២២ ក្នុងវ័យ៤០ឆ្នាំ ដោយសារ ជំងឺក្រិនថ្លើម បេះដូង និងក្រលៀន។

៣. លោក ឈឿន រិទ្ធី ហៅនាយ ស្វិត តារាកំប្លែង ទទួលមរណភាពកាលពីថ្ងៃទី២៧ ខែមករា ឆ្នាំ២០២៤ បន្ទាប់ពីធ្លាក់ខ្លួនឈឺដោយសារ ជំងឺទឹកនោមផ្អែម ខូចក្រលៀនធ្ងន់ធ្ងរ ។

៤. លោក កៅ សីហា គឺជាអ្នកនិពន្ធនិងដឹកនាំសម្តែងល្បីឈ្មោះ ប្រចាំផលិតកម្មហង្សមាស ទទួលមរណភាពកាលពីថ្ងៃទី២០ ខែតុលា ឆ្នាំ២០២៤ ដោយសារតែ ជំងឺដាច់សរសៃឈាមខួរក្បាល មិនអាចសង្គ្រោះបាន។

ទន្ទឹមគ្នានៃដំណឹងមរណភាពរបស់តារាប្រុសវ័យក្មេងទាំង៤រូបខាងលើ បានធ្វើឲ្យមហាជននិងអ្នកគាំទ្រព្រមទាំងសិល្បករ-សិល្បការិនីជាច្រើន សល់ត្រឹមតែការសោកស្តាយនូវមនុស្សឆ្នើមនៃអាជីពសិល្បៈ៕ អត្ថបទ៖ ចាន់រ៉ា