តារាចម្រៀងល្បីៗកម្ពុជាណាខ្លះ នឹងមានវត្តមានក្នុងពិធីបើកការប្រកួតកីឡាជាតិ និងកីឡាជាតិជនពិការ?

កំពូលតារាចម្រៀងល្បីៗរបស់ប្រទេសកម្ពុជា នឹងចូលរួមក្នុងពិធីបើកការប្រកួតកីឡាជាតិ លើកទី៤ និងកីឡាជាតិជនពិការ លើកទី២ ឆ្នាំ២០២៤ ដែលនឹងចាប់ផ្ដើមឡើង នាថ្ងៃទី៣០ ខែតុលា ឆ្នាំ២០២៤ ខាងមុខនេះ ក្នុងពហុកីឡដ្ឋានជាតិ (អូឡាំពិក) ។

តាមរយៈផេកផ្លូវការរបស់ ក្រសួងអប់រំយុវជន និងកីឡា បានបង្ហាញវត្តមានរបស់តារាចម្រៀង និងតារារ៉េប របស់កម្ពុជាជាច្រើនរូប ដែលរួមមានដូចជា ព្រះនាង នរោត្តម ជេនណា; លោក ឆន សុវណ្ណរាជ; កញ្ញា រ៉េត ស៊ូហ្សាណា; លោក ម៉ាន់ វណ្ណដា រួមនិងតារារ៉េបជាច្រើនរូបទៀត ដែលនឹងបង្ហាញវត្តមានក្នុងឱកាសពិធីបើកការប្រកួតកីឡាជាតិ លើកទី៤ និងកីឡាជាតិជនពិការ លើកទី២ ឆ្នាំ២០២៤ ប៉ុន្មានថ្ងៃខាងមុខនេះ។

ប្រភពដដែលបញ្ជាក់ដែរថា ពិធីបើកការប្រកួតកីឡាជាតិ លើកទី៤ និងកីឡាជាតិជនពិការ លើកទី២ ឆ្នាំ២០២៤ នឹងចាប់ផ្ដើមនាថ្ងៃទី៣០ ខែតុលា ឆ្នាំ២០២៤ ខាងមុខនេះ ក្នុងពហុកីឡដ្ឋានជាតិ (អូឡាំពិក) ចាប់ពីម៉ោង ៥:00ល្ងាច តទៅ ហើយបើកឱ្យចូលរួមឥតគិតថ្លៃ។

គួរបញ្ជាក់ថា ក្រសួងអប់រំ ធ្លាប់រៀបចំព្រឹត្តិការណ៍នេះ ៣លើករួចមកហើយ ដោយលើកទី១ រៀបចំធ្វើនៅឆ្នាំ២០១៦ លើកទី២ នៅឆ្នាំ២០១៨ និងលើកទី៣ នៅឆ្នាំ២០២២ ខណៈចំពោះព្រឹត្តិការណ៍កីឡាដែលធ្វើរៀងរាល់ ២ឆ្នាំម្ដងនេះ ក្រសួងអប់រំ បានដាក់ ៣៧ប្រភេទកីឡា លើការប្រកួតកីឡាជាតិ និង៧ប្រភេទ ក្នុងព្រឹត្តិការណ៍កីឡាជាតិជនពិការ៕