ជីវិតកម្សាន្ដ

MGI ប្រកាសដកតំណែងបវរកញ្ញាមីយ៉ាន់ម៉ាជាប់លំដាប់រងលេខ២ ជាផ្លូវការហើយ

បានផុស

៣ ខែ មុន

នៅ

ថ្ងៃចន្ទ ២៨ តុលា ២០២៤

ដោយ

នៅថ្ងៃទី២៨ ខែតុលា យោងទៅតាមគេហទំព័រហ្វេសប៊ុក Miss Grand International (MGI) បានប្រកាសជាផ្លូវការថា បេក្ខភាពតំណាងប្រទេសមីយ៉ាន់ម៉ា គឺបវរកញ្ញា Thae Su Nyein ត្រូវបានដកហូតដំណែងលំដាប់រងលេខ២ មូលហេតុគឺដោយសារអាកប្បកិរិយា និងសកម្មភាពមិនសមរម្យរបស់តំណាងផ្ទាល់តែម្ដង។

នៅក្នុងសេចក្តីប្រកាសផ្លូវការបានសរសេរថា ស្ថាប័ន MGI បានសម្រេចដកតំណែង Miss Grand Myanmar 2024 គឺបវរកញ្ញា Thae Su Nyein ពីតំណែងរងទី២ ដោយសារអាកប្បកិរិយាមិនសមរម្យ និងបំពានលើបទប្បញ្ញត្តិជាច្រើនលើសលុប។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ភ្លាមៗបន្ទាប់ពីសេចក្ដីប្រកាសត្រូវបានប្រកាសភ្លាម អ្នកគាំទ្រសម្រស់មកពីជុំវិញពិភពលោកចាប់អារម្មណ៍យ៉ាងខ្លាំង មនុស្សភាគច្រើនយល់ស្របនឹងការសម្រេចចិត្តនេះដោយនិយាយថា អាកប្បកិរិយារបស់អ្នកតំណាងមីយ៉ាន់ម៉ា បន្ទាប់ពីការប្រកួតវគ្គផ្តាច់ព្រ័ត្រគឺជាការមិនគោរពយ៉ាងខ្លាំងចំពោះការប្រកួតប្រជែង។ រឿងនេះបានចាប់ផ្តើមភ្លាមៗ បន្ទាប់ពីយប់ចុងក្រោយ នៅពេលដែលអ្នកដឹកនាំប្រទេសមីយ៉ាន់ម៉ា ស្រាប់តែឡើងលើឆាក ហើយបានយកមកុដរបស់ Thae Su Nyein និងខ្សែក្រវាត់ឆៀងរងទីពីរ នៅចំពោះមុខទស្សនិកជនយ៉ាងភ្ញាក់ផ្អើល។ វីដេអូដែលថតបានទិដ្ឋភាពនេះបានសាយភាយយ៉ាងឆាប់រហ័ស បង្កឲ្យមានការចម្រូងចម្រាសយ៉ាងខ្លាំង។ អ្នកទាំងពីរមិនបានស្នាក់នៅក្នុងប្រទេសថៃ ប៉ុន្តែបានចាកចេញទៅទាំងយប់តែម្ដង។

ភ្លាមៗនោះ នាយកគ្រប់គ្រងជាតិរបស់មីយ៉ាន់ម៉ា (នាយកជាតិ) បានផ្សាយបន្តផ្ទាល់ថា លោកណាវ៉ាត់រៀបចំលទ្ធផលដោយអយុត្តិធម៌ ហើយបញ្ជាក់ថា Thae Su Nyein ស័ក្តិសមនឹងទទួលបានពានរង្វាន់ សំលៀកបំពាក់ជាតិ និង អំណាចប្រទេសប្រចាំឆ្នាំ បន្ថែមទៀត។ ទោះជាយ៉ាងណា នៅពេលត្រូវបានគេប្រកាស តំណាងមីយ៉ាន់ម៉ាមិនត្រូវបានគេបញ្ចេញឈ្មោះទេ។ ជាការឆ្លើយតប លោកណាវ៉ាត់បានរិះគន់ថា Thae Su Nyein ខ្វះភាពចាស់ទុំ ថ្វីដ្បិតតែនាងមានសក្ដានុពល ប៉ុន្តែនាងមិនមានសេចក្តីក្លាហានគ្រប់គ្រាន់ ដើម្បីបំពេញតម្រូវការក្នុងការប្រកួតអន្តរជាតិ។

ឆ្លើយតបនឹងប្រតិកម្មរបស់នាយកជាតិមីយ៉ានម៉ា លោកណាវ៉ាត់បាននិយាយថា Miss Grand International នឹងលុបចោលការរក្សាសិទ្ធិ Miss Grand Myanmar ក្រោមហេតុផលថា នាយកជាតិមីយ៉ាន់ម៉ាជំពាក់បំណុលគេជាច្រើន ហើយមិនមានទំនួលខុសត្រូវក្នុងការចំណាយលើការរៀបចំការប្រកួត។ ការសម្រេចចិត្តនេះបានបង្កជម្លោះកាន់តែខ្លាំងឡើងក្នុងមជ្ឈដ្ឋានអ្នកគាំទ្រសម្រស់ ខណៈពួកគេបានចែកចេញជាពីរមតិគឺ ភាគីម្ខាងជឿថា Thae Su Nyein ស័ក្តិសមជាង ភាគីម្ខាងទៀតជឿថា នាងស័ក្តិសមត្រឹមតំណែងលេខ២ប៉ុណ្ណោះ ដោយសារអាកប្បកិរិយាមិនស្តង់ដារ។

ចំណែកឯស្រីស្អាត Thae Su Nyein បានសម្តែងការមិនពេញចិត្តចំពោះតំណែងជាបេក្ខនារីចំណាត់ថ្នាក់លេខ២ នាងបន្តសម្តែងការខកចិត្តរហូតស្រក់ទឹកភ្នែកក្រោយចប់ការប្រកួត ។ នៅលើប្រព័ន្ធផ្សព្វផ្សាយសង្គម មនុស្សជាច្រើនក៏បានចោទសួរពីអាកប្បកិរិយារបស់ Thae Su Nyein ចំពោះបេក្ខនារីផ្សេងទៀតអំឡុងពេលប្រកួត រួមទាំងការចោទប្រកាន់ថាបានប្រើក្រុមការងារផ្ទាល់ខ្លួន និងមានអាកប្បកិរិយាមិនសូវរួសរាយរាក់ទាក់។

ថ្មីៗនេះ អគ្គនាយក Miss Grand Myanmar – លោក Htoo Ant Lwin ក៏បានប្រកាសលាលែងពីតំណែង និងប្រគល់មកុដចំណាត់ថ្នាក់លេខ២ មកគណៈកម្មាធិការរៀបចំវិញដែរ ព្រោះលោកជឿជាក់ថា ការប្រលងលែងមានភាពយុត្តិធម៌ទៀតហើយ។ រឿងនេះត្រូវបានគេរំពឹងថានឹងបន្តទាក់ទាញការចាប់អារម្មណ៍ខណៈភាគីពាក់ព័ន្ធបន្តនិយាយ។

យ៉ាងណាមិញ Miss Grand International ឆ្នាំនេះមិនត្រឹមតែជាឆាកសម្រាប់សម្រស់ប៉ុណ្ណោះទេ ថែមទាំងក្លាយជាកន្លែងក្តៅគគុកនៃជម្លោះ និងការមិនចុះសម្រុងគ្នាដែលមិនធ្លាប់មានពីមុនមក។ ប្រការនេះ បានធ្វើឲ្យព្រឹត្តិការណ៍នៅឆ្នាំនេះត្រូវបានគេចងចាំដោយមានភាពចម្រូងចម្រាសជាងបវរកញ្ញាឡើងគ្រងមកុដទៅទៀត៕