តារាស្រី ២ ដួង គ្រងឈុតដ៏អស្ចារ្យ អបអរខួបលើកទី ២១ របាំព្រះរាជទ្រព្យ ចុះបញ្ជីបេតិកភណ្ឌវប្បធម៌អរូបី

ដើម្បីជាការចូលរួម​អបអរសាទរ​ខួប​លើកទី២១ របាំ​ព្រះរាជទ្រព្យ​ត្រូវបាន​ចុះ​ក្នុងបញ្ជី​បេតិកភណ្ឌ​វប្បធម៌​អរូបី​នៃ​មនុស្សជាតិ​ ថ្ងៃ​ទី​៧ វិច្ឆិកា២០០៣-៧វិច្ឆិកា ២០២៤គេឃើញតារាស្រីវ័យក្មេងល្បីឈ្មោះរបស់ខ្មែរ ២ ដួងបាននាំ​គ្នារំលេច​ខ្លួនក្នុង​ការតុបតែងក្នុង​ឈុត​បុរាណ​ខ្មែរ​ដ៏​អស្ចារ្យ និងស្រស់ស្អាត។

តារាខ្មែរទាំង ២ ដួងដែលតុបតែងខ្លួន​ដើម្បីចូលរួបផ្សព្វផ្សាយ និងអបអរខួបលើកទី២១ របាំព្រះរាជទ្រព្យ​ចុះ​បញ្ជី​បេតិកភណ្ឌ​វប្បធម៌អរូបី​នៃមនុស្សជាតិគឺ កញ្ញា កុយ អេនណា ដែល​ជាបវរកញ្ញាលំដាប់រងទី១ ក្នុងកម្មវិធី Miss Grand Cambodia 2023 និង​ សិល្បការិនី​ដ៏​ឆ្នើម(នាថការី)កញ្ញា សុគា គឹមលាង ហៅ កូនអាន់ ។

ជាមួយគ្នានេះ​ដែរ​តារា​ស្រីកញ្ញា សុគា គឹមលាង ក៏បានបង្ហោះ​វីដេអូ​ភ្ជាប់​ខ្លឹមសារ​បង្កប់​ន័យ​ដូច្នេះថា“ដែនដី ដ៏អាថ៌​កំបាំង​ពួក​ខ្មាំង​តែងតែចង់​លបប្រហារ យើងមើល​អ្នក​លួច​ចម្លង​ខំ​ប្រាប់​អ្នកផង​ថា​ខ្លួន​អស្ចារ្យ​លួច​ប៉ះ​សំណៅ​ដើម​កែង​ប៉ះចិញ្ចើម​យក​ឈាម​មក​ធ្វើអក្ខរា“។

ចំណែកកញ្ញា កុយ អេនណា ក៏បានបង្ហោះខ្លឹម​សារអបអរសាទរខួបលើក ទី២១ របាំព្រះរាជទ្រព្យ​ត្រូវបាន​ចុះក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ។

តាមរយៈ​សកម្មភាព​នេះ​សិល្បការិនី​ខ្មែរទាំង ២ ដួង​ទទួល​បានការកោតសរសើរពី​សំណាក់មហាជនជាច្រើន​ចំពោះការ​ចូលរួម​ផ្សព្វផ្សាយ និង​លើ​តម្កើន​នូវវប្បធម៌-អរិយធម៌ ទៅ​កាន់ពិភពលោកផងដែរ។ «របាំព្រះរាជទ្រព្យ» ត្រូវបាន​ចុះក្នុង​​បញ្ជីជា​សម្បត្តិ​បេតិកភណ្ឌវប្បធម៌​អរូបី​នៃមនុស្សជាតិ​នៅថ្ងៃទី០៧ ខែវិច្ឆិកា ឆ្នាំ២០០៣នៅទីក្រុងអ៉ីស្តង់ប៊ុល ប្រទេសតួកគី។

ប្រាកដណាស់របាំ​ព្រះ​រាជ​ទ្រព្យ​ (English: Royal B allet of Cambodia)ជារបាំ នៃ​ព្រះរាជាណាចក្រកម្ពុជាដែល​មាន​ភាពល្បីល្បាញ​ខាងប្រណិត​ភាព​នៃ​សំលៀកបំពាក់​នៃ​ការតុបតែង​កាយ​បំពាក់​គ្រឿង​មាស ប្រាក់​អម​ទៅដោយក្បាច់រាំ​ដែលមានភាពទន់ភ្លន់ស្រស់ស្អាតគួរជាទីគយគន់​ដែលមើលទៅហាក់ដូចជារបាំរបស់ពពួកទេវៈ ឬ ទេវតា (Devata) ដែលឈានទៅ​រកលំដាប់​ខ្ពស់​របស់​របាំ​ដែលយើង​អាចសន្មត់​បាន​ថាជា​ស្ដេចរបាំ​ ៕

អត្ថបទ៖ ចាន់រ៉ា