Lisa បង្ហាញមុខក្នុងរឿងបែបហូលីវូដ តែងខ្លួនសាមញ្ញបែបនារីថៃ ដូចពាក់អាវដេកយប់

កាលពីថ្មីៗនេះ​ អ្នកគាំទ្រផ្ទុះការចាប់អារម្មណ៍ជាមួយនឹងការបង្ហាញវត្តមានរបស់ Lisa នៅក្នុងរឿងភាគហូលីវូដ The White Lotus ដែលនាងក៏បានចូលរួមសម្ដែងជាតួអង្គសំខាន់ម្នាក់ នៅក្នុងរដូវកាលទី៣នេះដែរ។ នៅក្នុងនោះ រូបនាងសម្ដែងជាតួអង្គអ្នកគ្រប់គ្រងនៅក្នុងសណ្ធាគារមួយ​នៅប្រទេសថៃ ដែលជាប្រទេសកំណើតខ្លួន។

ជាពិសេស តួអង្គមួយនេះ ហាក់ខុសដាច់ពីជីវិតពិតរបស់នាង ដែលតែងខ្លួនហ៉ឺហា នៅក្នុងសាច់រឿងនេះ Lisa ជាកូនថៃ ដែលមានការងារសាមញ្ញមួយ ហើយចំពោះការតុបតែងខ្លួនវិញ គឺសាមញ្ញខ្លាំង សូម្បីតែអាវក៏មានម៉ូតដូចជាខោអាវគេងយប់ដែរ ស្ទាយ៍ម៉ូតសក់វិញរឹតតែប្លែកទៅទៀត ដោយវែកចំហៀងបង្ហាញឲ្យឃើញនូវថ្ងាស់របស់នាង។

យ៉ាងណាមិញ គេមិនទាន់ដឹងថាសាច់រឿងទៅជាយ៉ាងណានោះទេ ដោយនេះគ្រាន់តែជាវគ្គខ្លីដែលគេបង្ហាញ មុននឹងការចាក់បញ្ចាំងរឿង។ ការបង្ហាញមុខនៅក្នុងខ្សែភាពយន្ដបែបភាគរបស់អឺរ៉ុបនេះ ជាលើកដំបូងរបស់ Lisa ដែលឈានជើងចូលពិភពហូលីវូដផងដែរ។

គេបានកត់សម្គាល់ផងដែរថា Lisa មិនសូវជាមានការពាក់ព័ន្ធជាមួយនឹងវិស័យសិល្បៈកូរ៉េប៉ុន្មាននោះទេ តាំងពីនាងបង្កើតផលិតកម្មឯករាជ្យមក រូបនាងតែងតែដើរនៅលើទីផ្សារអន្តរជាតិតែម្ដង។ ដូចដែលវិស័យកុននេះក៏ដោយ Lisa មិនបានបោះជំហានដំបូងនៅកូរ៉េនោះទេ ប៉ុន្ដែនាងបានហក់ខ្ពស់ទៅដល់ប៉ែកអន្តរជាតិវិញ។

ទោះបីជាយ៉ាងណាក្ដី សមាជិក Blackpink សញ្ជាតិថៃ រូបនេះ ហាក់មានសន្ទុះប្រជាប្រិយភាពខ្លាំងជាងគេក្នុងចំណោមសមាជិកទាំង៤ ហើយឥលូវនេះ រូបនាងបានឈានមួយជំហានទៀតហើយ ចូលទៅកាន់វិស័យភាពយន្ដលំដាប់ហូលីវូដតែម្ដង៕

ប្រភព៖ Pop Base