លោក សុះ ម៉ាច ត្រៀមចេញចម្រៀងមនោសញ្ចេតនា ២បទ រៀបរាប់ពីរឿងពិត បន្សល់ទុកជាស្នាដៃ

ទោះបីជាមកដល់ពេលនេះមានវ័យរៀងជ្រេបន្តិចក្តី តារាចម្រៀងជើងចាស់លោក សុះ ម៉ាច នៅតែបង្ហាញឆន្ទ:ស្រលាញ់អាជីពចម្រៀង ខណ:ដែលថ្មីៗនេះ លោកបានប្រកាសត្រៀមបញ្ចេញសា្នដៃចម្រៀងមនោសញ្ចេតនា ២បទ ស្តែងចេញពីរឿងពិតតែម្តង។

ជាការកត់សម្គាល់លោក សុះ ម៉ាច ដែលកន្លងមកជាអតីតប្រធានសមាគមសិល្បករខ្មែរ ២អាណត្តិ បានបញ្ជាក់ឲ្យដឹងដែរថា ដោយការស្រលាញ់ និងដើម្បីបន្សល់ទុកស្នាដៃចម្រៀងដល់ក្មេងជំនាន់ក្រោយ ពេលនេះលោកបានចាប់ផ្តើមបន្ថែមស្នាដៃនិពន្ធបទចម្រៀងថ្មីៗដើរតាមគន្លងឪពុក។

តួយ៉ាងពេលនេះលោក សុះ ម៉ាច បានឲ្យដឹងថា បទចម្រៀងមនោសញ្ចេតនា ២បទ នោះ រួមមានបទ “សំបុត្រស្នេហ៍” និង បទ “វិបត្តិដួងចិត្តកម្មករកម្សត់” ដែលលោកតែងនិពន្ធទាំងទំនុកច្រៀងនិងបទភ្លេង ស្តែងចេញពីរឿងពិតនិងក្តីស្រមើស្រមៃខ្លះ ហើយត្រៀមចេញឆាប់ៗនេះ។

តាមរយ:ចម្រៀងទាំង ២បទនេះ លោក សុះ ម៉ាច បានដាក់ក្តីរំពឹងថា សាធារណជន ពិសេសអ្នកគាំទ្រនឹងទទួលអារម្មណ៍ជាមួយបទចម្រៀង នៃមនោសញ្ចេតនានោះមិនខាន។ ខណៈទាំងពីរបទនេះ មានការសម្រួលតន្ត្រីនិងបច្ចេកទេសសំឡេងដោយលោក ធី វុទ្ធា និងច្រៀងដោយលោក សុះ ម៉ាច ផ្ទាល់។

គួរបញ្ជាក់ដែរថា លោក សុះ ម៉ាច កន្លងមកគឺជាអតតីប្រធានសមាគមសិល្បករខ្មែរ ២អាណត្តិ និងជាតារាចម្រៀងជើងចាស់ដ៏មានប្រជាប្រិយភាពរហូតមកដល់ពេលបច្ចុប្បន្ន។ លោក សុះ ម៉ាច បានជាប់ឈាមជ័រជាអ្នកសិល្ប: ព្រោះលោកគឺត្រូវជាកូនប្រុសបង្កើតរបស់លោកតា សុះ ម៉ាត់ តារាចម្រៀងល្បីនិងសម្បូរស្នេហ៍​ក្នុងទសវត្សរ៍ឆ្នាំ៦០-៧០៕ អត្ថបទ៖ ចាន់រ៉ា