តាមច្បាប់ហ្វីលីពីន Kim Na Jung អាចជាប់ទោសមួយជីវិត បើរកឃើញថា ប្រើ​និងរត់ពន្ធគ្រឿងញៀន​

នៅយប់ថ្ងៃទី ១២ ខែវិច្ឆិកា អ្នកលេងអ៊ីនធឺណិតម្នាក់បានរាយការណ៍តាមរយៈ National Sinmungo ទៅកាន់ប៉ុស្តិ៍ប៉ូលិស Seoul Mapo ដោយស្នើសុំឲ្យមានការស៊ើបអង្កេតលើអតីតពិធីករ និងជាតារាបង្ហាញម៉ូដ Kim Na Jung ​ ពីបទរំលោភច្បាប់គ្រប់គ្រងគ្រឿងញៀន (សង្ស័យការប្រើប្រាស់និងដឹកជញ្ជូនគ្រឿងញៀន) ។

អ្នកលេងអ៊ីនធឺណេតរូបនេះបាននិយាយថា ដោយពិចារណាលើការពិន័យធ្ងន់ធ្ងរសម្រាប់ឧក្រិដ្ឋកម្មគ្រឿងញៀននៅក្នុងប្រទេសហ្វីលីពីន ដែលអាចឈានទៅដល់ការជាប់ពន្ធនាគារអស់មួយជីវិត វាហាក់ដូចជា Kim Na Jung កំពុងស្វែងរកជំនួយជាបន្ទាន់តាមរយៈស្ថានទូត។ ជាពិសេសនាងបានពឹងផ្អែកលើការបង្ហោះ Instagram ផ្ទាល់ខ្លួនដែលនិយាយអំពីការទទួលបានយន្តហោះហើយគេអាចសន្មត់ថា នាងបានមកដល់កូរ៉េវិញដោយសុវត្ថិភាពហើយ។

អ្នកលេងអ៊ីនធឺណេតដដែលបាននិយាយបន្តទៀតថា ដោយសារសក្តានុពលសម្រាប់យុវជនក្នុងការត្រាប់តាមបុគ្គលល្បីៗដែលពាក់ព័ន្ធនឹងការប្រើប្រាស់គ្រឿងញៀន អាជ្ញាធរគួរតែដាក់ទណ្ឌកម្មយ៉ាងតឹងរ៉ឹងចំពោះឧក្រិដ្ឋកម្មគ្រឿងញៀនដ៏ល្បីល្បាញដើម្បីធ្វើជាគំរូប្រុងប្រយ័ត្ន។ យើងជំរុញយ៉ាងខ្លាំងឲ្យមានការស៊ើបអង្កេតឲ្យបានហ្មត់ចត់លើការចោទប្រកាន់ថាបានប្រើប្រាស់ និងដឹកជញ្ជូនគ្រឿងញៀនរបស់ Kim Na Jung ក្រោមច្បាប់គ្រប់គ្រងគ្រឿងញៀន ដើម្បីកំណត់យ៉ាងច្បាស់អំពីកំហុសរបស់នាង និងបម្រើជាការព្រមានយ៉ាងម៉ឺងម៉ាត់។

នៅព្រឹកថ្ងៃនោះ តារាកូរ៉េ Kim Na Jung បានបង្ហោះនៅលើ Instagram របស់នាងថា «​ខ្ញុំនៅសណ្ឋាគារ Conrad ក្នុងទីក្រុងម៉ានីល។ ជីវិតរបស់ខ្ញុំស្ថិតក្នុងគ្រោះថ្នាក់, ខ្ញុំខ្លាចពេកក្នុងការទៅអាកាសយានដ្ឋាន ឬជិះតាក់ស៊ី»។ ក្នុងន័យនោះបានសុំជំនួយ រួមទាំងទូរស័ព្ទទៅស្ថានទូតផងដែរ។ ទោះ​យ៉ាង​ណា​ នាង​មិន​បាន​បញ្ជាក់​ពី​ស្ថានភាព​ពិត​ប្រាកដ​ដែល​នាង​កំពុង​ប្រឈម​មុខ​នោះ​ទេ។

ក្រោយមកនៅប្រហែលថ្ងៃត្រង់ នាងបានបង្ហោះរូបភាពសំបុត្រយន្តហោះពីទីក្រុងម៉ានីលទៅកាន់ទីក្រុង Incheon ដោយនិយាយថា «​ខ្ញុំមានអារម្មណ៍ថា ខ្ញុំនឹងស្លាប់ប្រសិនបើខ្ញុំឡើងយន្តហោះ។ ខ្ញុំមានអារម្មណ៍ថាការចាកចេញពីទីក្រុងម៉ានីលនឹងសម្លាប់ខ្ញុំ។ អាកាសយានដ្ឋានក៏មានគ្រោះថ្នាក់ដែរ។ សូម​ជួយ​ខ្ញុំ​ផង»។ ក្រោយមកនាងបានបន្ថែមថា ខ្លួនកំពុងឡើងយន្តហោះ តែនៅក្នុងសារមិនស៊ីសង្វាក់គ្នាជាបន្តបន្ទាប់។

ការ​បង្ហោះ​របស់​នាង​មួយ​ចំនួន​បាន​បង្ក​ការ​សង្ស័យ​ពី​ការ​ប្រើ​ប្រាស់​គ្រឿង​ញៀន។ នាងបានសរសេរថា “កាលពីយប់មិញ ជើងហោះហើររបស់ខ្ញុំពីទីក្រុងម៉ានីលត្រូវបានពន្យារពេល ហើយនៅពេលយប់ជ្រៅ បុគ្គលិកអាកាសយានដ្ឋាន អ្នកដំណើរ និងមន្ត្រីអន្តោប្រវេសន៍កំពុងថតខ្ញុំដូចនៅក្នុង The Truman Show ។ ខ្ញុំ​បោះចោល​កាបូប​ទាំងអស់ ដើម្បី​បញ្ចៀស​ស្ថានភាព​ជួញដូរ​គ្រឿងញៀន​»។

នាងបានបន្ថែមថា “ប្រសិនបើខ្ញុំឡើងលើយន្តហោះនោះ ខ្ញុំនឹងស្លាប់។ កូរ៉េសូមជួយផង ខ្ញុំសារភាពថាបានប្រើប្រាស់គ្រឿងញៀននៅប្រទេសហ្វីលីពីន។ ដោយ​សារ​តែ​ការ​ភ័យ​ខ្លាច​របស់​ខ្ញុំ ខ្ញុំ​មាន​អារម្មណ៍​ថា​ខ្ញុំ​នឹង​ស្លាប់​ទៅ​ហើយ ទោះ​បី​ជា​មាន​បញ្ហា​យ៉ាង​ណា​ក៏​ដោយ ដូច្នេះ​ខ្ញុំ​មិន​អាច​ឡើង​យន្តហោះ​បាន»។ ក្រោយមក ការប្រកាស​ពាក់ព័ន្ធ​នឹង​ថ្នាំ​ញៀន​ត្រូវ​បាន​លុប​ចេញ​តាំង​ពី​ពេល​នោះ​មក។

គួរបញ្ចាក់ដែរថា Kim Na Jung ត្រូវបានគេស្គាល់នៅឆ្នាំ ២០១៩ បន្ទាប់ពីបានឈ្នះការប្រកួត ‘Miss Maxim’ សម្រាប់ទស្សនាវដ្តីបុរស។ នាង​ក៏​ធ្លាប់​ធ្វើ​ជា​អ្នក​ប្រកាស​ព័ត៌មាន និង​ជា​អ្នក​ធ្វើ​ការ​អាកាសធាតុ​ផង​ដែរ៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង ស្រីល័ក្ខ

ចុចអាន៖តារាម៉ូដែល Jang Ga Hyun ទម្លាយមូលហេតុលែងលះ ដោយសារប្ដីអន់ចិត្តរឿងថតឈុតរោលរាល