លោក គួច ខេវិន ស្កាត់ជួបកូនភ្លោះ ៣នាក់ ដែលត្រូវឪពុកម្តាយបោះបង់ចោលតាំងពីអាយុ ៣ខែ (មានវីដេអូ)

ដោយក្តីអាណិតអាសូរ អតីតអ្នកផលិតកម្មវិធីកម្សាន្តលោក គួច ខេវិន បានស្កាត់ទៅជួបកូនភ្លោះប្រុស ៣នាក់ នៅខេត្តកំពត ដែលត្រូវបានឪពុកម្តាយបោះបង់ចោល ក្លាយក្មេងកំព្រាតាំងតែពីអាយុ ៣ខែ និងបានអំពាវនាវដល់សប្បុរសជន ជួយដល់ក្មេងទាំង ៣នាក់នេះផង។

លោក គួច ខេវិន បានលើកឡើងថា “ក្រោមមេឃតែមួយវាសនាខុសគ្នា” កូនអ្នកមានស៊ីរើស កូនអ្នកក្ររើសស៊ី អ្នកមានលែងខ្លាចក្រព្រោះគេមានកប់ពពក អ្នកក្រក្រហួសក៏លែងខ្លាចក្រព្រោះកប់អាចម៍ជន្លេន”។ លោកបន្តថា ទោះជាយ៉ាងណាកើតមកជាមនុស្សកុំរស់ផ្តេកផ្តួលលើវាសនា តែត្រូវមានឆន្ទៈខ្ពស់រស់ដើម្បីសេខក្តីសង្ឃឹមតាំងចិត្តតស៊ូ យកចំណេះវិជ្ជាកែប្រែវាសនារបស់ខ្លួនតទៅអនាគត។

បើតាមលោក គួច ខេវិន កូនភ្លោះប្រុស ៣នាក់នេះ រស់នៅភូមិឈើទាល ឃុំឈូក ស្រុកឈូក ខេត្តកំពត ត្រូវឪពុកម្តាយបោះបង់ចោលឱ្យនៅកំព្រាឯកាតាំងតែពីពួកគេកើតបាន ៣ខែ ហើយត្រូវបានជីដូនជីតាបីបាច់ថែរក្សាយ៉ាងលំបាក។

ផលិតកររូបនេះនិយាយទៀតថា”ក្នុងនាមជាខ្មែរដូច គ្នាយើងគួរគប្បីចែករំលែកនូវធនធានទៅតាមលទ្ធភា ពនិងផ្តល់សេចក្តីអាណិតស្រឡាញ់ចំពោះក្មេងកំព្រាក្រខ្សត់អត់ឪពុកម្តាយថែរក្សាឱ្យទទួលបាននូវភាពក ក់ក្តៅក្នុងជីវិតជា ជាងបង្អួតសម្ញែងសម្បត្តិទ្រព្យធន់លុយឡានវីឡាឱ្យគេកោតស្ញប់ស្ញែង”។

លោកថា សម្រាប់លោកដែលជាអ្នកធ្លាប់ភៀសខ្លួនដោយសារសង្គ្រាម ចាកចោលពីស្រុកទៅជ្រកកោនលើដីគេ ពិតជាធ្លាប់ស្គាល់នូវជីវិតកំព្រាឯកាបាត់បង់ភាពកក់ក្តៅ ថាតើមានរសជាតិដូចម៉្តេចនោះ។ ហេតុនេះហើយ ទើបលោកមានចិត្តអាណិតចង់ជួយក្មេងប្រុុសទាំង ៣ តាមលទ្ធភាពរបស់លោក និងស្នើរឱ្យសប្បុរសជនចូលរួមជួយផងដែរ។ លោកបន្ថែមមថា “ខ្ញុំបានជួយកុមារកូនភ្លោះទាំងបីទៅតាមលទ្ធភាពជាលើកទី១ ហើយសន្យាជួយបន្តៗទៅតាមស្ថានភាពតទៅមុខទៀត”។

លោក គួច ខេវិន សង្ឃឹមថា នឹងមានសប្បុរសជននានា ចូលរួមជួយឧបត្ថម្ភដល់កុមារដែលកំព្រារងាឯកាទាំង៣នាក់ ដើម្បីកុសលផលបុណ្យអនាគតជាតិ៕ អត្ថបទ៖ ចាន់រ៉ា