ពេជ្រ ចរណៃ បំផុសការស្លៀកពាក់ឈុតល្បុក្កតោ អបអរខួប២ឆ្នាំ ចូលជាសម្បត្តិបេតិកភណ្ឌពិភពលោក

តារាសម្តែងនិងជាគ្រូគុនល្បុក្កតោកញ្ញា ពេជ្រ ចរណៃ បានចេញមុខបំផុសមហាជននិងអ្នកគាំទ្រ ចូលរួមស្លៀកពាក់ឈុតល្បុក្កតោខ្មែរដើម្បីជាការចូលរួមអបអរសាទរខួប២ឆ្នាំ នៃការដាក់បញ្ជូលជាសម្បត្តិបេតិកភណ្ឌពិភពលោក។

កញ្ញា ពេជ្រ ចរណៃបច្ចុប្បន្នក្រៅតែពីការលេចមុខនៅលើវិស័យភាពយន្តខ្មែរ កញ្ញាក៏ជាតារាស្រីមួយរូបដែលចូលរួមយ៉ាងសកម្មក្នុងការលើកស្ទួយវិស័យគុនល្បុក្កតោ និងតាមរយ:ការបំផុសដល់យុវជនឲ្យចូលរួមលើកស្ទួយបង្ហាញសិល្បៈវប្បធម៌របស់ខ្មែរទៅកាន់ពិភពលោកផងដែរ។

ងាកមកចាប់អារម្មណ៍កៀកជិតដល់ខួប២ឆ្នាំ នៃការចុះបញ្ជីគុនល្បុក្កតោជាសម្បត្តិបេតិកភណ្ឌវប្បធម៌អរូបីយនៃមនុស្សជាតិ តារាស្រី ពេជ្រ ចរណៃ បានអំពាវនាវថា “តោះយើងនាំគ្នាពាក់ឈុតល្បុក្កតោថតផ្សព្វផ្សាយ និងចូលរួមអបអរខួប២ឆ្នាំ ដែលក្បាច់គុនល្បុក្កតោចូលជាសម្បត្តិបេតិកភណ្ឌពិភពលោក គឺនៅថ្ងៃទី២៩ ខែវិច្ឆិកាឆ្នាំ២០២៤នេះ” ។

ជាមួយគ្នានោះតារាស្រីរូបស្រស់កញ្ញា ពេជ្រ ចរណៃ ធ្លាប់បានចេញមកអះអាងពីគោលជំហររបស់ខ្លួនថា ខ្លួននឹងបន្តហាត់រៀនក្នុងការចូលរួមលើកស្ទួយ និងផ្សព្វផ្សាយក្បាច់គុនបុរាណខ្មែរ “ល្បុក្កតោ” រហូតដល់ដង្ហើមចុងក្រោយ។ នេះក៏ដើម្បីបង្ហាញពីការស្រលាញ់ និងឆន្ទ:របស់ខ្លួនជាមួយវិស័យក្បាច់គុនបុរាណខ្មែរផងដែរ។

សូមបញ្ជាក់ដែរថា​​ នៅក្នុងសេចក្តីប្រកាសព័ត៌មានរបស់ក្រសួងវប្បធម៌ និងវិចិត្រសិល្បៈស្តីពីការចុះគុនល្បុក្កតោ ក្នុងបញ្ជីតំណាងនៃបេតិកភណ្ឌវប្បធម៌អរូបីនៃមនុស្សជាតិរបស់អង្គការយូណេស្កូ​ បានឲ្យដឹងថា កាលពីថ្ងៃទី២៩ ខែវិច្ឆិកាឆ្នាំ២០២២ ក្នុងកិច្ចប្រជុំលើកទី១៧ នៃគណៈកម្មាធិការអន្តរដ្ឋាភិបាលដើម្បីការពារបេតិកភណ្ឌវប្បធម៌អរូបី របស់អង្គការយូណេស្កូ ដែលប្រារព្ធធ្វើនៅទីក្រុងរ៉ាបាត នៃព្រះរាជាណាចក្រម៉ារ៉ុក បានអនុម័តយល់ព្រមចុះគុនល្បុក្កតោ ក្នុងបញ្ជីតំណាងបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូ តាមសេចក្ដីសម្រេច17.COM7៕ អត្ថបទ៖ ចាន់រ៉ា