ពាក់មី អាណិតកូនក្រោយធ្វេីមិនបានល្អ ក្នុងការប្រកួតបាល់អាយុក្រោម១០ឆ្នាំ និងស្នើកុំបំបាក់ទឹកចិត្តក្មេង តាមការបញ្ចេញមតិ

ការប្រកួតបាល់ទាត់ Smart Youth League 2024 កាលពីម្សិលមិញនេះ បានរកឃើញក្រុមជើងឯក ៧ កម្រិត គឹ កម្រិតអាយុក្រោម ៨ឆ្នាំ, ១០ឆ្នាំ, ១២ឆ្នាំ, ១៤ឆ្នាំ, ១៦ឆ្នាំ និង ១៩ឆ្នាំ និងក្រុមបាល់ទាត់នារី ខណៈក្នុងចំណោមនោះ ផ្ការីកគ្រប់រដូវ បានចាញ់ក្រុម Little Lion (PPCFS) សម្រាប់ការប្រកួតក្រុមកម្រិតអាយុក្រោម ១០ឆ្នាំ ។

ក្នុងចំណោមកុមារ ដែលចូលរួមប្រកួតក្រុមកម្រិតអាយុក្រោម ១០ឆ្នាំ នៃក្រុមផ្ការីកគ្រប់រដូវ ក៏មានកូនប្រុសពៅរបស់នាយ ពាក់មី ផងដែរ ដែលមហាជនសុទ្ធតែបានស្គាល់នូវវត្តមានក្មេងប្រុសរូបនេះ និងគាំទ្រកន្លងមក។

បើយោងតាមលទ្ធផលនៃការប្រកួត លោក ចែម ចាន់រ៉ា ហៅ នាយ ពាក់មី បានបង្ហាញអារម្មណ៍សោកស្តាយនូវលទ្ធផលរបស់ក្រុមផ្ការីកគ្រប់រដូវ ទន្ទឹមនឹងការស៊ុតបញ្ចូលទីរបស់កូនប្រុស ដោយរៀបរាប់ថា “ទឹកភ្នែកហូរទាំងគ្រួសារ​ អាណិតកូនណាស់​ គ្នាភ័យ​​ សម្ពាធ នាគភ្លេីង​ធ្វេីមិនបានល្អ” ។

តាមរយៈវីដេអូនៃការស៊ុតបញ្ចូលទីរបស់ នាគភ្លើង ហាក់ស្ថិតក្រោមសម្ពាធ និងអារម្មណ៍ភិតភ័យ ទើបធ្វើមិនបានល្អ។ តែទោះជាបែបនេះ នាយ ពាក់មី ក្នុងនាមជាឪពុក បានត្រឹមតែបង្ហាញការអាណិត និងលើកចិត្តកូនប្រុសឱ្យបន្តដំណើរទៅមុខ ពិសេសក្រុមបាល់ទាត់កម្រិតអាយុក្រោម ១០ឆ្នាំ នៃក្រុមផ្ការីកគ្រប់រដូវ​ ដោយសរសេរថា “បាល់ទាត់គឺបែបនេះហេីយ​ យេីងនៅតែបន្ត​ទៀត​” ។

ស្របពេលនៃការបរាជ័យក្នុងការប្រកួតនេះ ក៏មានម្ចាស់គណនីម្នាក់ឈ្មោះ Sok Chea បញ្ចេញមតិមិនសមគួរបែបបំបាក់ទឹកចិត្តកូនប្រុសពៅរបស់នាយ ពាក់មី ផងដែរ។ ដោយហេតុនេះ លោកក្នុងនាមជាឪពុក ស្នើដល់បុគ្គលរូបនោះជាពិសេស ឱ្យគិតដល់អារម្មណ៍ក្មេង មុននឹងបញ្ចេញមតិ ដោយសរសេរថា “នាគភ្លេីង​ ក៍ចេះអានអក្សរដែ​រ សូមមេត្តាកុំបំបាក់ទឹកចិត្តកូនខ្ញុំ​ ! ! !” ។

គួរជម្រាបថា បើគិតមកទល់ពេលនេះ Smart Youth League មានជិត ១០រដូវកាលហើយ និងជួយបណ្តុះបានកីឡាករជម្រើសជាតិ ក៏ដូចជាកីឡាករអាជីពជាច្រើន ដែលបានចេញពីចំណុចចាប់ផ្តើមមួយនេះ ទៅកាន់ក្លឹបជម្រើសជាតិផ្សេងៗ ខណៈក្នុងមួយឆ្នាំៗ មានកុមារចូលរួមជាង ១០០០ពាន់នាក់ចូលរួម និងចាប់តាំងពីមានតែកុមារា រហូតមានកុមារីចូលរួម៕