លំដាប់រងទី២ Miss Global Cambodia សម្រេចចិត្តមិនចូលរួមប្រកួត Miss Tourism នៅម៉ាឡេសុីទេ

លំដាប់រងទី២ Miss Global Cambodia សារុំ ចន្ថា ប្រកាសថា ខ្លួនសម្រេចចិត្តមិនចូលរួមប្រកួតកម្មវិធី Miss Tourism នៅម៉ាឡេសុីនោះទេ ក៏ព្រោះតែសល់ពេលខ្លីពេក ខណៈរូបនាងមិនទាន់បានត្រៀមអ្វីទាំងអស់។

តាមរយៈគណនីហ្វេសប៊ុកផ្ទាល់ខ្លួន លំដាប់រងទី២ Miss Global Cambodia សារុំ ចន្ថា បានរៀបរាប់ថា “នាងខ្ញុំបានសម្រេចចិត្តមិនចូលរួមប្រកួតក្នុងកម្មវិធី Miss Tourism នៅប្រទេសម៉ាឡេសុីទេ ព្រោះសល់តែរយៈពេល ៣ថ្ងៃប៉ុណ្ណោះ ត្រូវចេញដំណើរ ខ្ញុំមិនទាន់បានត្រៀមអ្វីទាំងអស់ លឿនពេកហើយ”។

ទន្ទឹមនឹងការប្រកាស បវរកញ្ញាមកពីខេត្តព្រៃវែងរូបនេះ ក៏បានសុំទោសដល់ ND និងសាធារណជនដែលជាអ្នកគាំទ្រ ចំពោះការខកខានមិនបានចូលរួមប្រកួតកម្មវិធីនេះផងដែរ។ ខណៈការសម្រេចចិត្តនេះ អ្នកគាំទ្ររបស់បវរកញ្ញា សារុំ ចន្ថា បានត្រឹមចូលរួមបង្ហាញការសោកស្តាយប៉ុណ្ណោះ។

គួរជម្រាបថា បើតាមការប្រកាសដំណឹងរបស់ផេកផ្លូវការ Miss Global Cambodia បញ្ជាក់ថា នឹងជ្រើសក្នុងចំណោម TOP6 មានឱកាសក្លាយជាបវរកញ្ញាទេសចរណ៍កម្ពុជា ឆ្នាំ២០២៤ ហើយបន្តទៅប្រកួតលើឆាកអន្តរជាតិ នៅប្រទេសម៉ាឡេស៊ីទៀតផង៕