បទចម្រៀងភ្ជាប់នឹងចាបុីដងវែង! នេន ទុំ ថា មិនមែនជោតាមគ្នាទេ គេហៅថាតាម Trad

មុននេះ អ្នកចម្រៀងរ៉េបល្បីឈ្មោះ នេន ទុំ បានចេញសារភ្ជាប់ជាមួយនឹងវីដេអូចម្រៀង ចំណងជើង «សារិកាលោមចិត្ត» បានរៀបរាប់ថា “គេមិនហៅថា ជោតាមគ្នាទេ គេហៅថាតាម Trad អាអូនតូច” ហើយបទនេះចេញ Teaser ថ្ងៃទី២១ ចេញ Full ថ្ងៃទី២៥ ចេញតាំងពីពួកគាត់មិនទាន់ចេញម្ល៉េះ សូមទទួលជ្រាប!”។

ខណៈដែលកំពុងផ្ទុះការចាប់អារម្មណ៍លើចម្រៀងថ្មីៗរបស់តារាល្បីឈ្មោះមួយចំនួន ទាក់ទងនឹងការលាយបញ្ចូលដោយឧបករណ៍បុរាណខ្មែរ “ចាបុីវែងដងវែង” តាមរយៈសារនេះ លោកចង់បញ្ជាក់ថា បទថ្មីរបស់លោកដែលមានចំណងជើងថា «សារិកាលោមចិត្ត» តាក់តែងនិពន្ធឱ្យចេញជារូបរាងឡើង ពុំមែនជាការជោតាមគ្នានោះទេ។

តួយ៉ាង មួយបទនេះ លោកបានចេញ Teaser តាំងពីថ្ងៃទី២១ វិច្ឆិកា ហើយក៏ចេញ Full MV ជាផ្លូវការនៅថ្ងៃទី២៥ វិច្ឆិកា ឆ្នាំ២០២៤ ពោលគឺតាំងពីមុនពេលដែលតារាចម្រៀងដទៃទៀត មិនទាន់បញ្ចេញចម្រៀងថ្មីរបស់ខ្លួនមកម្ល៉េះ។

គួរជម្រាបថា ក្នុងឱកាសអបអរខួបលើកទី៨ នៃការដាក់បញ្ចូលចាបុីដងវែង ក្នុងបញ្ជីបេតិកភណ្ឌអរូបីនៃមនុស្សជាតិ របស់អង្ការយូណេស្កូ តារាចម្រៀងមួយចំនួនបានបញ្ចេញ MV ចម្រៀងថ្មីរបស់ខ្លួន ដែលសុទ្ធសឹងតែមានការលាយបញ្ចូលដោយឧបករណ៍ភ្លេចបុរាណខ្មែរមួយនេះ ដែលរួមមាន នេន ទុំ; ខេម និងលោក ព្រាប សុវត្ថិ។ ខណៈចម្រៀងទាំង ៣បទនេះ សុទ្ធតែមានអត្ថន័យនៃការលួងលោមស្នេហា ព្រមទាំងចំណុចពិសេសរៀងខ្លួន និងទទួលបានការគាំទ្រផងដែរ៕