ឃើញជីវិតតស៊ូបុរសពិការវ័យចំណាស់ម្នាក់ ល្អហួស ទប់ទឹកភ្នែកមិនជាប់ និងជូនថវិកា ១០០ដុល្លារ

បវរកញ្ញាវ័យក្មេងជូរី ល្អហួស បានបង្ហាញអារម្មណ៍ក្តុកក្តួលរហូតទប់ទឹកភ្នែកមិនជាប់ ក្រោយឃើញជីវិតតស៊ូបុរសពិការវ័យចំណាស់ម្នាក់ដើម្បីជីវិត តាមរយ:ការស៊ីឈ្នួលដឹកម្ហូបអាហារកុម្ម៉ង់ដើម្បីរកប្រាក់កម្រៃចិញ្ចឹមជីវិត។

ម្ចាស់មកុដ Miss Preteen Junior Idol World 2024 យុវតី ជូរី ល្អហួស បានរៀបរាប់អារម្មណ៍ខ្លួនថា នាងបានកម្ម៉ង់របស់ញ៉ាំហើយនាងក៏ចេញទទួលយក ស្រាប់តែកែវភ្នែករបស់នាងទាំងគូរ បានក្រឡេកឃើញលោកតាដែលជាអ្នកដឹកជញ្ចូន ដែលមានជើងពិការទាំងសងខាងហើយម៉ូតូរបស់លោកតាប្រើកង់៤ ដើម្បីធ្វើជាមធ្យោបាយក្នុងការដឹកជញ្ចូន ។

ជូរី ល្អហួស បានបន្តថា “នាងខ្ញុំពិតជាអាណិតលោកតាខ្លាំងណាស់ តាគេតាយើងតស៊ូលះបង់គ្រប់បែបយ៉ាងដើម្បីតែក្រពះ នាងខ្ញុំសួរថា លោកតាអស់ប៉ុន្មានទាំងអាហាររបស់ចៅនិងថ្លៃដឹកជញ្ចូន? លោកតាឆ្លើយថា ទាំងអស់អស់តែ ៣មុឺនទេចៅ”។

បន្ថែមពីនេះ ល្អហួស លើកឡើងថា ពេលនោះនាងមានអារម្មណ៍ថាក្តុកក្តួល ទឹកភ្នែករលីងរលោង ហើយរូបនាងក៏បានជូនប្រាក់ទៅលោកតាពិការចំនួន ១០០ដុល្លាដើម្បីជួយសម្រាលទុក្ខលំបាកលោកតាបានខ្លះៗដល់គាត់។ ទង្វើនេះទទួលបានការសរសើរនិងគាំទ្រច្រើនពីសំណាក់មហាជនចំពោះទឹកចិត្តដ៏ល្អរបស់ ល្អហួស ដែលតែងជួយដល់អ្នកខ្វះខាត៕ អត្ថបទ៖ ចាន់រ៉ា