លោក ណុប បាយ៉ារិទ្ធ បំផុសមហាជនគាំទ្រសិល្បៈ “ល្ខោនអាប៉េ”

តារាចម្រៀងកូនកាត់ចិនរបស់ផលិតកម្មហង្សមាសលោក ណុប បាយ៉ារិទ្ធ បានចេញមុខបំផុសក៏ដូចជាអំពាវនាវដល់មហាជនអ្នកគាំទ្រ ចូលរួមផ្តល់កម្លាំងចិត្តចំពោះការសម្តែងសិល្បៈល្ខោនអាប៉េ ៣ជំនាន់ ដកស្រង់ពីរឿង “ព្រះច័ន្ទគោរព” ។

ល្ខោនអាប៉េ គឺមានទម្រង់និងលក្ខណៈជាល្ខោនច្រៀងរាំ និងនិយាយបែបបុរាណ ដែលបែកខ្នែងចេញមកពីរបាំក្បាច់បុរាណខ្មែរ។ អាប៉េ ជាប្រភេទល្ខោនឡកក្រមិចក្រមើមបែបត្លុកកំប្លែង។ នេះបើយោងទៅតាមការស្រាវជ្រាវ។

តារាចម្រៀងចាស់វស្សាល្បីឈ្មោះលោក ណុប បាយ៉ារិទ្ធ បានលើកឡើងថា “សូមអរគុណដល់ប្អូនប្រុស Xing ដែលខិតខំស្រាវជ្រាវពីវីដេអូ នៃការសម្តែងសិល្បៈល្ខោនអាប៉េ ៣ជំនាន់ ដកស្រង់ពីរឿង “ព្រះច័ន្ទគោរព” ។

លោកបន្តថា “សូមបងប្អូនជួយគាំទ្រ និងផ្តល់កម្លាំងចិត្តដល់គាត់ដែលខិតខំស្រាវជ្រាវ ដើម្បីបង្ហាញឱ្យបងប្អូនបានស្គាល់ពីសិល្បៈល្ខោនអាប៉េ ដោយសារមិនសូវបានសម្តែងច្រើនឱ្យរៀនស្គាល់ រៀនដឹងឡើងវិញ ។

សូមជម្រាបថា អាប៉េ​គឺ​ជា​ឈ្មោះ​ល្ខោន​ច្រៀង​រាំ​បែប​បុរាណ​មួយ​នៅ​​កម្ពុជា ដែលបាននិងកំពុងបំផុសឱ្យមានការចាប់អារម្មណ៍ពីមហាជន ខណៈឈុតដែលទទួលបានការចាប់អារម្មណ៍ខ្លាំងនោះ គឺឈុតតួអង្គទេវតា (បែបកំប្លែង) ក្នុងរឿងព្រះច័ន្ទគោរព ក៏ព្រោះតែក្នុងទម្រង់របាំបុរាណខ្មែរ មហាជនពុំសូវជាបានឃើញ និងបានដឹងឡើយ៕ អត្ថបទ៖ ចាន់រ៉ា