ជីវិតកម្សាន្ដ

តារាសម្ដែងកូរ៉េខាងត្បូង២រូប មរណភាពក្នុងខែតែមួយ និងមានអាយុខ្ទង់៣០ដូចគ្នា

បានផុស

២ នាទីutes មុន

នៅ

ថ្ងៃពុធ ៤ ធ្នូ ២០២៤

ដោយ

យោងតាមរបាយការណ៍ផ្តាច់មុខដោយប្រព័ន្ធផ្សព្វផ្សាយ Xports News បានឲ្យដឹងថា Song Jae Rim ត្រូវបានគេប្រទះឃើញស្លាប់កាលពីរសៀលថ្ងៃទី១២ ខែវិច្ឆិកា ក្នុងអាយុ ៣៩ឆ្នាំ។ រំលងមិនបានមួយខែស្រួលផង ស្រាប់តែទទួលដំណឹងមួយទៀតថា តារាសម្តែង Park Min-jae ត្រូវគេប្រទះឃើញស្លាប់ដោយសារគាំងបេះដូងភ្លាមៗកាលពីថ្ងៃទី ២៩ ខែវិច្ឆិកា ក្នុងអាយុ៣២ឆ្នាំ នៅពេលដែលលោកកំពុងស្ថិតនៅឯប្រទេសចិន។

មរណភាពរបស់ Song Jae-rim បានបន្សល់ទុកសំបុត្រអត្តឃាត២ទំព័រនៅកន្លែងកើតហេតុ។ នៅពេលនោះ មានសេចក្តីរាយការណ៍ថា មិត្តភ័ក្តិដែលណាត់ជួបអាហារថ្ងៃត្រង់បានទៅលេងផ្ទះរបស់លោក ប៉ុន្តែបែរជាប្រទះឃើញដេកស្លាប់ ទើបរាយការណ៍ទៅប៉ូលិសភ្លាមៗ។ ក្រោយមក សពរបស់តារាប្រុស ត្រូវគេរៀបចំធ្វើជាលក្ខណៈឯកជនតាមសំណូមពររបស់គ្រួសារសព។

ក្នុងស្ថានភាពដែលភាពច្របូកច្របល់និងមិនទាន់រលត់ ដំណឹងមរណភាពរបស់តារាសម្តែង Park Min-jae កាន់តែតក់ស្លុតទ្វេរមុន ហើយឧស្សាហកម្មកម្សាន្តកូរ៉េក៏ធ្លាក់ចូលទៅក្នុងភាពសោកសៅម្តងទៀត ដោយមិនបានត្រៀមចិត្តរួចរាល់។ ដោយសារតែមរណភាពរបស់លោក គឺជាការរំឮកយ៉ាងច្បាស់ពីភាពមិនអាចទាយទុកជាមុនបាននៃជីវិតនិងភាពផុយស្រួយនៃសុខភាព។

យោងតាមរបាយការណ៍របស់សារព័ត៌មានដដែល Park Min-jae បានស្លាប់ដោយសារគាំងបេះដូងភ្លាមៗ នៅក្នុងប្រទេសចិន។ តាមរយៈគណនីរបស់តារាសម្ដែងប្រុសដែលកាន់ដោយបងប្រុស Park Min-jae បានបង្ហោះសារដ៏សោកសៅ ដោយសរសេរថា «ប្អូនប្រុសជាទីស្រលាញ់ សូមសម្រាកឲ្យបានសុខស្រួលហើយ សង្ឃឹមថានឹងមានមនុស្សដែលចងចាំប្អូនជារៀងរហូត»។ ផ្ទះបុណ្យសពត្រូវបានគេរៀបចំនៅបន្ទប់ទី៩ នៃសាលពិធីបុណ្យសពរបស់មន្ទីរពេទ្យសាកលវិទ្យាល័យជាតិសេអ៊ូល។

ដ្បិតថាយ៉ាងនេះក្ដី ទទួលមរណភាពភ្លាមៗរបស់តារាសម្ដែងប្រុសទាំង២ដួងប្រចាំប្រទេសកូរ៉េខាងត្បូង បានធ្វើឲ្យវិស័យសិល្បៈ និងអ្នកគាំទ្ររបស់ពួកគេភ្ញាក់ផ្អើល និងមានការសោកស្ដាយជាពន់ពេក។ អ្វីដែលកាន់តែសោកសៅបំផុតនោះគឺតារាប្រុសកើតនៅឆ្នាំ ១៩៨៥ Song Jae-rim មានសកម្មភាពសម្ដែងនិងសិល្បៈប្រហែលមួយទសវត្សរ៍ក្នុងពិភព showbiz កូរ៉េ ជាមួយនឹងចរិតរួសរាយរាក់ទាក់ មានប្រជាប្រិយភាពពីសំណាក់អ្នកសិល្បៈល្បីៗជាច្រើន។

ដោយឡែក ងាកមកកាន់តារាប្រុស Park Min-jae ថ្វីដ្បិតតែអាជីពសម្ដែងមានរយៈពេលខ្លីពិតមែន ប៉ុន្តែលោកបានរួមចំណែកយ៉ាងសំខាន់ក្នុងរឿងភាគល្បីៗមួយចំនួន។ ការសម្តែងរបស់លោកនៅក្នុង Little Women (២០២២), True to Love (២០២៣) និង The Korea-Khitan War (២០២៣) បង្ហាញពីទេពកោសល្យនិងភាពប៉ិនប្រសប់របស់គាត់ក្នុងនាមជាតារាសម្តែង។ តួនាទីចុងក្រោយរបស់គាត់គឺនៅក្នុងរឿង Web Drama Snap and Spark ដែលពង្រឹងឋានៈរបស់គាត់ជាតារាដែលកំពុងរះក្នុងឧស្សាហកម្មនេះ៕