គ្រប់មួយឆ្នាំដែលឆ្លងកូវីដ​ Matthew បង្ហោះរូបនិងសារមួយឃ្លា ដាស់អារម្មណ៍អ្នកគាំទ្រ

ប្រិយមិត្តប្រហែលជាមិនទាន់ភ្លេចទេ ថាតារាសម្ដែងនិងជាពិធីករថៃដ៏ល្បីមួយរូបលោក Matthew គឺជាអ្នកសិល្បៈដំបូងបំផុត​ក្នុង​ប្រ​ទេ​សថៃដែលបានឆ្លងកូវីដ-១៩ ហើយបន្ទាប់មកក៏បានចម្លងបន្តដល់ភរិយារបស់លោកគឺតារាចម្រៀងនិងសម្ដែងអ្នកនាង Lydia ធ្វើ​ឲ្យពួកគេត្រូវស្ពាយបង្វិចចេញពីគ្រួសារ ឆ្ងាយពីកូននៅតូចៗដែលកំពុងពេញស្រលាញ់។

ថ្ងៃទី១៣ ខែមីនា ឆ្នាំ២០២០ មកដល់ថ្ងៃទី១៣ មីនា ឆ្នាំ២០២១វិញ គឺមានរយៈពេល១ឆ្នាំហើយដែលតារាខាងលើបានឆ្លងកូវីដ-១៩ ហើយក៏ជាថ្ងៃដែលពិបាកបំផុតរបស់លោក ដែលត្រូវចាកឆ្ងាយពីកូនៗដើម្បីទៅសម្រាកព្យាបាលនៅមន្ទីពេទ្យ។ ដោយជាថ្ងៃចង​ចាំ​ក្នុង​ជីវិតមិនអាចភ្លេចបាន នៅថ្ងៃទី១៣កន្លងទៅនេះ Matthew បានបង្ហោះរូបនៅក្នុងមន្ទីពេទ្យកាលពីឆ្នាំមុន រួមជាមួយ​រូបថតគ្រួ​សា​រ​​​ព្រមជាមួយសារដ៏មានអត្ថន័យមួយនៅលើអ៊ីនស្តាក្រាមថា«ថ្ងៃនេះជាថ្ងៃគម្រប់ខួប១ឆ្នាំ ដែលខ្ញុំបានប្រកាសថាខ្ញុំបាន​ឆ្ល​ង​កូវីដ​-​១៩ ​ហើយក៏ត្រូវបានបញ្ជូនទៅព្យាបាលនៅមន្ទីរពេទ្យរយៈពេល៣៥ថ្ងៃ។

Matthew បន្ថែមថា អារម្មណ៍ថ្ងៃនេះនិងថ្ងៃទី១៣ ឆ្នាំមុនគឺខុសគ្នាឆ្ងាយណាស់។ ខ្ញុំគ្រាន់តែចង់ប្រាប់អ្នករាល់គ្នា ស្រលាញ់គ្រួសារ​និង​ចំណា​យពេលវេលាឲ្យបានច្រើននៅជាមួយពួកគាត់តាមដែលអាចធ្វើទៅបាន ព្រោះវាមិនមានអ្វីពិតប្រាកដនោះទេ។ សម្រា​ប់​ខ្ញុំរ​យៈ​ពេល១ឆ្នាំកន្លងមក ខ្ញុំបានមេរៀនជាច្រើន ហើយខ្ញុំក៏បានផ្លាស់ប្តូរជីវិតរបស់ខ្ញុំយ៉ាងច្រើនផងដែរ»៕

អត្ថបទផ្ដល់ដោយ៖Porman

ចុចអាន៖ គ្រប់​គ្នា​គួរ​ដឹង ព័ត៌មាន​ណា​ពិត​ឬ​មិន​ពិត​ទាក់ទង​កូវីដ មុន​ចែកចាយ​បន្ត