ជីវិតកម្សាន្ដ

កូនស្រីសេដ្ឋីរ៉ែចិន Esther Yu បង្កជម្លោះជាមួយក្រុមការងារភាពយន្ត

បានផុស

៤ ខែ មុន

នៅ

ថ្ងៃព្រហស្បតិ៍ ១២ ធ្នូ ២០២៤

ដោយ

ទស្សនិកជនជាច្រើនជឿថា តារាសម្ដែងស្រីជនជាតិចិននាង Esther Yu និងជាកូនស្រីសំណព្វរបស់មហាសេដ្ឋីរ៉ែ នាពេលនេះ បានជួបជម្លោះជាមួយក្រុមការងារភាពយន្ត «Speed and Love» ដោយផ្អែកលើការបង្ហោះជាច្រើនរបស់នាងនៅលើប្រព័ន្ធផ្សព្វផ្សាយសង្គម។

យោងតាម Znews, 163 បានរាយការណ៍កាលពីថ្ងៃទី ០៦ ខែធ្នូថា តារាស្រីវ័យ២៨ឆ្នាំ បានអាប់ដេតប្រវត្តិរូបរបស់នាងជាមួយនឹងសញ្ញាអារម្មណ៍សោកសៅ។ បន្តិចក្រោយមក នាងបានសរសេរថា «នៅលើផ្លូវឆ្ពោះទៅរកភាពពេញវ័យ អ្នកប្រាកដជាប្រឈមមុខនឹងភាពអយុត្តិធម៌ និងការលំបាកមួយចំនួន។ ប៉ុន្តែខ្ញុំនឹងព្យាយាមឲ្យអស់ពីសមត្ថភាពសម្រាប់អ្នករាល់គ្នា។ កុំបារម្ភច្រើនពេក» ។

ការបង្ហោះរបស់នាងទាក់ទាញចំណាប់អារម្មណ៍យ៉ាងខ្លាំង ដោយទទួលបានមតិរាប់ពាន់ពីអ្នកគាំទ្រ។ មនុស្សជាច្រើនបានសម្ដែងការព្រួយបារម្ភចំពោះសុខុមាលភាពរបស់តារាស្រីរូបនេះ។ ពាក្យគន្លឹះរបស់ទស្សនិកជនជាច្រើនបានសរសេរនៅលើអ៉ិនធើណេតថា តើមានអ្វីកើតឡើងជាមួយ Esther Yu? បានឡើងដល់កំពូលយ៉ាងឆាប់រហ័សនៃប្រធានបទដែលត្រូវបានគេស្វែងរកច្រើនបំផុតនៅលើប្រព័ន្ធផ្សព្វផ្សាយសង្គមចិន Weibo ដែលមានអ្នកចូលមើល ១៥០លានដងក្នុងមួយថ្ងៃ។

ការស្មានតាមអ៊ីនធឺណិតបានផ្សព្វផ្សាយការចោទប្រកាន់ថា នាងកំពុងបញ្ជូនសញ្ញាទុក្ខព្រួយ បន្ទាប់ពីមានការមិនចុះសម្រុងជាមួយនឹងក្រុមការងារផលិតរឿង «Speed and Love»។ ប្រភពអះអាងថា តារាស្រីរូបនេះត្រូវបានគេបោកឲ្យចុះកុងត្រា។ នាងត្រូវបានគេសន្យាថានឹងសម្ដែងជាតួឯកក្នុងបញ្ជី A ប៉ុន្តែនៅពេលចាប់ផ្ដើមថត នាងបានរកឃើញថាសហតារាសម្ដែង He Yu ជាតារាសម្ដែងក្នុងបញ្ជី B ដែលមានកេរ្តិ៍ឈ្មោះតិចជាងនាង។ នាងត្រូវបានគេរាយការណ៍ថាចង់ឈប់ថត ប៉ុន្តែដោយសារកុងត្រានាងគ្មានជម្រើសអ្វីក្រៅពីការបន្ត។

ជាងនេះទៅទៀត ក្នុងអំឡុងពេលដំណើរការថត ក៏មានសេចក្តីរាយការណ៍ថា Yu និងអ្នកដឹកនាំរឿងមានជម្លោះជាច្រើន សូម្បីតែជម្លោះក្តៅគគុក ដែលប៉ះពាល់ដល់កាលវិភាគនៃការថត។ ក្រោយការបង្ហោះរបស់តារាស្រីរូបនេះ អ្នកគាំទ្ររបស់ Esther Yu បានបង្ហោះនិងចោទសួរអ្នកផលិតរឿង។ ទោះបីជាយ៉ាងណាមកដល់ពេលនេះ ក្រុមការងារនៅមិនទាន់មានការឆ្លើយតបទេ។

Esther Yu ទទួលបានភាពល្បីល្បាញជាអតីតសមាជិកក្រុម The9 ដែលជាក្រុមនារីគម្រោងពីកម្មវិធី “Youth With You 2” របស់ iQIYI ។ ដោយដកស្រង់ពី QQ News កាសែត South China Morning Post បានរាយការណ៍ថា ឪពុករបស់នាងគឺជាមហាសេដ្ឋីរ៉ែ ហើយជីតារបស់នាងគឺជាប្រធានសាជីវកម្មដែក។ ទ្រព្យសម្បត្តិសុទ្ធរបស់គ្រួសារនាងត្រូវបានគេប៉ាន់ស្មានថាមានចំនួន ៤០ ពាន់លានយន់ (៥.៦ ពាន់លានដុល្លារ)៕