តារាសម្ដែង ស៊ិនឌី បង្ហាញបុគ្គលឆ្នើម ៣រូប នៅពីក្រោយភាពជោគជ័យ

តារាសម្ដែងលោក ស៊ិនឌី បន្ទាប់ពីបាត់មុខពីការសម្តែងមួយរយ:មកនេះ បច្ចុប្បន្នកំពុងតែឈរជើងយ៉ាងជោគជ័យលើការបរបើកអាជីព ស៊ិនឌី សំអាងការ ដែលបានដំណើរការរយៈពេល ៤ឆ្នាំ កន្លងមកហើយ និងទទួលបានការគាំទ្រពីភ្ញៀវទូទៅ។

បើការបញ្ជាក់លោក ស៊ិនឌី បានឲ្យដឹងថាអាជីវកម្មមួយមានទីផ្សារល្អដោយរលូនដោយសារតែលោកមានដៃគូភាគហ៊ុនធំសំខាន់ ៣នាក់ នោះគឺលោកស្រី ប្រាក់ បូរ៉ាមី និងស្វាមីលោក ចេវ ចាន់ថា ហើយក៏មានម្ចាស់ភាគហ៊ុនសំខាន់ម្នាក់ទៀតនោះគឺលោក បញ្ញា។ លោកថាអ្នកទាំង៣ មិនត្រឹមតែមានហ៊ុនក្នុងហាងសំអាងការរបស់លោកនោះទេ ប៉ុន្ដែពួកគេជាអ្នកមានសម្ថភាពជ្រោមជ្រែង និងដឹកនាំហាងរបស់លោកយ៉ាងល្អផងដែរ។

លោកស៊ិនឌី និយាយទៀតថា លោកឈរលើគោលការណ៍៣យ៉ាង
– ទី១៖ គឺបើកតម្រូវអតិថិជនទូទៅតែម្ដង ពោលគឺតាំងពីកម្រិតទាបដល់កម្រិតខ្ពស់មិនប្រកាន់អតិថិជនឡើយ។
– ទី២៖ ភាពប្រណិតនៃសម្លៀកបំពាក់ដោ យលោកមានជាងមានស្នាដៃល្អផ្ដោតលើគុណភាព និងតម្លៃនៃឈុត
– ទី៣៖ ហាងលោកក៏ទទួលបានការណែនាំពីសាស្រ្ដាចារ្យនៃសាកលវិទ្យាល័យភូមិន្ទវិចិត្រសិល្បៈផងដែរ ឱ្យត្រូវទៅតាមប្រភេទកម្មវិធីនិងតាមក្បួនខ្នាតប្រពៃណីខ្មែរ។

លោក ស៊ិនឌី ធ្លាប់ប្រាប់ថាមូលហេតុដែលលោកបើ កហាងសំអាងការ ដោយសារតែលោកចង់រក្សា ក៏ដូចជាអភិរក្សគ្រឿងអលង្ការបុរាណប្រើក្នុងពិធីអាពាហ៍ពិពាហ៍របស់ខ្មែរ ដើម្បីឱ្យកូនខ្មែរជំនាន់ក្រោយបានស្គាល់ និងចងចាំពីប្រពៃណីដ៍ផូផង់របស់ខ្មែរ រួមទាំងសម្លៀកបំពាក់ឈុតប្រពៃណីខ្មែរប្រើក្នុងពិធីមង្គលការ ដែលលោកពិតជាមានអារម្មណ៍ រំភើបណាស់ ពេលឃើញកូនក្រមុំគ្រងលើខ្លួន ពិតជាស្រស់ស្អាត។

គេចាំបានថា តារាសម្ដែង២ដួង ដែលគ្រងឈុតហាង ស៊ិនឌី សំអាងការមានរូបសម្រស់ត្រដែតស្អាតដូចទេវតានោះ គឺអ្នកនាង ហ៊ិន ច័ន្ទនីរ័ត្ន និងកញ្ញាសុខគា គីមលាង ហៅ Kon Ant ទើបធ្វើឱ្យអតិថិជនមានភាពជឿជាក់ដូចគ្នាទៅតារាទាំងពីរដែរ។

ដោយឡែកទាក់ទងថាពេលណាទើបលោក ស៊ិនឌី វិលមករកអាជីពសម្ដែងវិញនោះ លោកថា មិនទាន់អាចកំណត់បានទេ ព្រោះលោកមមារញឹកខ្លាំង និងផ្ដោតលើការពង្រឹងមុខជំនួញឱ្យកាន់តែល្អថែមទៀត។ លោកថា អាជីពសិល្បៈជាផ្នែកមួយដែលលោកស្រលាញ់ដក់ជាប់ក្នុងចិត្ត និងមើលឃើញថាបច្ចុប្បន្នមានតារាថ្មីៗរះមកស្អាតៗ ហើយមានសម្ថភាពល្អៗច្រើន៕ អត្ថបទ៖ ចាន់រ៉ា