ទីបំផុតរឿង “អប្សរាមហាអង្គរ” ត្រូវបានថតចប់សព្វគ្រប់រយៈពេល ២ឆ្នាំ ដោយជោគជ័យជាស្ថាពរ នៅក្នុងខែធ្នូ ឆ្នាំ ២០២៤ នេះ តែងនិពន្ធរឿងដោយលោកគ្រូ ហ្វៃ សំអាង និងលោកគ្រូ យូ សុភា ដឹកនាំសម្ដែងដោយលោគ្រូ ហ្វៃ សំអាង ចូលរួមសម្ដែងដោយ វីរសិល្បករ សិល្បករសិល្បការនីជាច្រើនជំនាន់។ នេះបើតាមការបញ្ជាក់ពីលោក សួន ពិសិដ្ឋ ដែលជាតួអង្គសម្តែងមួយរូបដែរ ក្នុងភាពយន្តបុរាណខ្មែរមួយនេះ។

ភាពយន្តភាគរឿងអប្សរាមហាអង្គរ ជាខ្សែភាពយន្តដែលត្រូវបាននិពន្ធឡើងនៅតាមលំនាំប្រវត្តិសាស្ត្រខ្មែរ នៃអាណាចក្រដ៏សែនរុងរឿងនាចុងសតវត្សទី១២ និង ទី១៣ ខណៈតួសម្តែងដែលតំណាងអង្គក្សត្រ និងតួអង្គផ្សេងៗទៀត សុទ្ធសឹងតែជាតារាសម្តែងល្បីៗ ព្រមទាំងបវរកញ្ញាកម្ពុជាជាច្រើនរូបផងដែរ។

តួយ៉ាង តាមរយៈការបង្ហាញត្រួសៗនៃការផលិតរឿងបុរាណខ្មែរមួយនេះ មហាជនមានការចាប់អារម្មណ៍ខ្លាំង និងមតិជាច្រើន បានចោទសួរទៅកាន់អ្នកដឹកនាំរឿងដែរថា “តើពេលណាចាក់ផ្សាយរឿងនេះ?”។ ពិសេសថ្មីៗនេះ ក្រោយអ្នកនិពន្ធនិងដឹកនាំរឿង បានបង្ហើបប្លង់ចុងក្រោយនៃរឿង ដែលមានវត្តមានតារាចម្រៀងល្បីឈ្មោះ ពេជ្រ សោភា​ និងលោក ឆឹម សក្កដា បង្ហាញខ្លួននៅទីតាំងសារមន្ទីរជាតិ ធ្វើឱ្យមតិខ្លះទស្សទាយថា នោះអាចជាឈុតឆ្លងភព ឬការនិទានរៀបរាប់សាច់រឿងដើម្បីបិទបញ្ចប់។

យ៉ាងណាមិញ តាមរយៈការបង្ហាញត្រួសៗនៃការផលិតរឿងបុរាណខ្មែរ “អប្សរាមហាអង្គរ” ធ្វើឱ្យមហាជនបានបង្ហាញក្តីសោមន្យចំពោះស្នាដៃមួយនេះខ្លាំង ព្រោះជឿជាក់លើស្នាដៃនិពន្ធនិងដឹកនាំរឿងរបស់លោក ហ្វៃ សំអាងកន្លងមក ខណៈមតិជាច្រើនក៏បានចោទសួរទៅកាន់អ្នកដឹកនាំរឿងដែរថា “តើពេលណាចាក់ផ្សាយរឿងនេះ?”។

បើតាមការបញ្ជាក់ពីប្លង់ចុងក្រោយនៃរឿង តារា​ចម្រៀង​ស្រីជួរមុខ​ ពេជ្រ​ សោភា​ ដើរតួជា​អ្នក​គ្រូ​ក្រមុំចាស់​ ឈ្មោះ​ កញ្ញា​ ស្រស់​ស្រាយ​ ជា​អ្នក​បុរាណ​វិទ្យា​ ជាដៃ​ការ​សម្ដែង​អត្តចរិតបែប​ថ្មី​ដៃគូ​របស់​គាត់​គឺលោក​ ឆឹម​ សក្កដា​ ដើរតួជាលោក​គ្រូ​ សែន​ សង្ហា​ (ជា​គូវិវាទស្នេហ៍​)។ ក្នុងនោះ លោក ពៅ​ ពិសិដ្ឋ​ សម្តែង​ជា​តួអង្គ​ឈ្មោះ​ បុរស​; កញ្ញា សុឹម​ ស្រី​និច​ សម្តែង​តួ​ឈ្មោះ​ សក្តិ​សម​; លោក លឹម​ ជា​ឡាយ​ សម្ដែង​តួឈ្មោះ​ សក្តិ​គុណ​; កញ្ញាពេជ្រ​ វត្តី​សារ៉ាវុឌ្ឍី សម្តែង​តួ​ឈ្មោះ​ ចន្ទ្រា​; ណាក់​ ពិសី​ សម្តែង​តួ​ឈ្មោះ​ កុង្សីយ៍​ និង កែវ​ ឡា សម្តែង​តួ​ឈ្មោះ​ កល្យាណី ។

គួររំលឹកថា រឿងបុរាណខ្មែរ «អប្សរាមហាអង្គរ» ត្រូវបានធ្វើពិធីក្រុងពាលីបើកការថត កាលពីថ្ងៃទី២២ ខែកុម្ភៈ ឆ្នាំ២០២៣ កន្លងទៅ និងទើបតែបញ្ចប់ប្លង់ចុងក្រោយក្នុងអំឡុងខែធ្នូនេះ។ ដោយឡែកចំពោះពេលវេលានៃការចាក់បញ្ចាំង អ្នកនិពន្ធនិងដឹកនាំសម្តែង ពុំទាន់បញ្ជាក់នៅឡើយទេ។

អ្វីដែលគួរឱ្យកត់សម្គាល់នោះគឺ គ្រឿងតែងនិងឈុតបុរាណដែលតួសម្តែងស្រីត្រូវគ្រង គឺដកស្រង់ចេញពីអប្សរាដែលបានឆ្លាក់នៅលើជញ្ជាំងប្រាសាទខ្មែរ។ តាមរយៈភាពយន្តរឿង អប្សរាមហាអង្គរ ក៏មានរំលេចនូវក្បាច់គុនល្បុក្កតោ របាំអប្សរា ក្នុងឈុតឆាកនៃរឿងនេះផងដែរ៕