នីកូ បំផុសគំនិតមហាជន ពិសេសយុវវ័យ គួរស្គាល់ល្ខោន “បាមោជ្ជទ័យ” និងចូលរួមគាំទ្រ

តារាចម្រៀងវ័យក្មេងរូបសង្ហា លោក នីកូ បានធ្វើការបំផុសក៏ដូចជាអំពាវនាវដល់មហាជនអ្នកគាំទ្រ ពិសេសយុវវ័យដែលជាកូនខ្មែរគ្រប់រូប គួរនាំគ្នាគាំទ្រនិងស្គាល់ល្ខោន “បាមោជ្ជទ័យ” ខណ:ដែលឆាប់ៗខាងមុខនេះ នឹងមានការសម្តែងជូនទស្សនារយ:ពេល ៤ថ្ងៃ។

សូមជម្រាបថា ល្ខោនបាមោជ្ជទ័យ ឬ ប្រាមោទ្យ​ទ័យ​ ជាទម្រង់ល្ខោនច្រៀងបែបទំនើបមួយដែលបានកើតឡើង ក្នុងប្រទេសកម្ពុជានៅដើមសតវត្សទី២០ ចន្លោះឆ្នាំ១៩១៤-១៩១៨ ក្រោយសង្គ្រាមលោកលើកទី១។ ពាក្យថា បាមោជ្ជទ័យ គឺជាភាសាបាលី រីឯពាក្យប្រាមោទ្យទ័យ ជាភាសាសំស្ក្រឹត ពាក្យទាំងពីរមានន័យដូចគ្នា គឺសេចក្តីរីករាយសេចក្តីពេញចិត្តខ្លាំងរំជួលចិត្ត។

បើយោងតាម​ឯកសារ​ទស្សនីយភាពខ្មែរបានំ្យដឹងដែរថា ល្ខោនបាមោជ្ជទ័យ ឬល្ខោនកម្សាន្តចិត្តនេះ បានកើតឡើងនៅប្រទេសកម្ពុជាដោយយកលំនាំពីល្ខោនច្រៀងបច្ចឹមប្រទេសអូប៉េរ៉េត (OPERETTE)​ ពិសេសប្រទេសបារាំងដែលជាប្រទេសធ្វើអាណានិគមលើប្រទេសកម្ពុជា។

ដោយឡែកងាកមកចាប់អារម្មណ៍តារាចម្រៀងលោក នីកូ បានចេញមកបំផុសថា កូនខ្មែរគួរតែស្គាល់ល្ខោនមួយនេះ (បាមោជ្ជទ័យ) ខណៈផ្ទាំងទស្សនីយភាពនេះ នឹងមានរៀបការសម្តែងជូនទស្សនា អំឡុងដើមឆ្នាំក្រោយនេះ។

គួរបញ្ជាក់ថា ទស្សនីយភាពល្ខោនបាមោជ្ជទ័យ រឿងកុលាបប៉ៃលិន ជាការរៀបចំឡើងដោយ នាយកដ្ឋានសិល្បៈទស្សនីយភាព គ្រោងសម្តែងជូនទស្សនាខែក្រោយនេះ រយៈពេល ៤ថ្ងៃ គឺថ្ងៃទី២៣ ដល់ ថ្ងៃទី២៦ខែមករា ឆ្នាំ២០២៥ វេលាម៉ោង ៥:៣០នាទីល្ងាច នៅសាលសន្និសីទចតុមុខ។ ខណៈតម្លៃសំបុត្រចូលទស្សនា មានដាក់លក់ចាប់ពីពេលនេះទៅហើយ គឺ ២០០០០៛ និង ៤០០០០៛ ៕ អត្ថបទ៖ ចាន់រ៉ា