តារាចម្រៀងជើងចាស់អ្នកស្រី សួន ចន្ថា តស៊ូការលំបាក ១២ឆ្នាំ ដើរច្រៀងដើម្បីរកលុយព្យាបាលជំងឺប្តី

តារាចម្រៀងជើងចាស់អ្នកស្រីសួន ចន្ថា កន្លងមកធ្លាប់បានទម្លាយប្រាប់ឱ្យដឹងយ៉ាងកម្សត់ថា រាល់ថ្ងៃអ្នកស្រីខំធ្វើការងារនិងដើរច្រៀងតាមហាងពេលយប់ គឺដើម្បីរកលុយព្យាបាលជំងឺប្តី ដែលបានធ្លាក់ខ្លួនឈឺមានរយ:ពេលច្រើនឆ្នាំមកនេះ។

បើគិតមកដល់ពេលនេះ អ្នកស្រី សួន ​ចន្ថា ដែលគេស្គាល់ថាជាតារាស្រីជើងចាស់ល្បីឈ្មោះមួយរូប រួមជំនាន់នឹងអ្នក​ស្រី ហ៊ឹម ស៊ីវន ក៏ដូចជា​អ្នក​នាង ប៉ែន សុ​ផា​នី ជាដើម បានប្រឡូកសិល្បៈ ៣០ឆ្នាំហើយ។ មិនតែប៉ុណ្ណោះអ្វីដែលកត់សម្គាល់ អ្នកស្រីនៅតែមានទឹកដមសំឡេងពិរោះក្រអួនក្រអៅ បំពេរអារម្មណ៍អ្នកស្តាប់គ្រប់វ័យ។

អ្នកស្រី សួន ចន្ថា បានបង្ហោះរូបភាពអមខ្លឹមសារថា “១២ឆ្នាំមកហេីយ ទោះលំបាកប៉ុណ្ណាក៏ក្នុងនាមអូនជាប្រពន្ធ អូនអំណត់តស៊ូមេីលថែបងជានិច្ច ប្តីសម្លាញ់ បើទោះអូនកំពុងបំពេញការងារមែនពិត តែអូននៅតែគិតដល់មនុស្សសំខាន់របស់អូន សូមទេវតាមបីបាច់ថែរក្សាបងសូមឆាប់ជា”។

បើតាមការបង្ហើបឱ្យដឹងពីតារាចម្រៀងអ្នកនាង សួនចន្ថា កាលពីកន្លងមក ស្វាមីរបស់គាត់មានជំងឺទឹកនោមផ្អែមនិងលើសឈាម។ តាមរយ:ដំណឹងនេះដែរ គេឃើញមានអ្នកគាំទ្រនិងសិល្បករសិល្បការិនីខ្មែរមួយចំនួនបានសម្តែងការអាណិតអាសូរព្រមទាំងជូនពរដល់ស្វាមីអ្នកនាង សួន ចន្ថា ឆាប់ជាសះស្បើយពីជំងឺផងដែរ។

យ៉ាងណាមិញ កន្លងមកតារាចម្រៀងចាស់វង្សារូបនេះ ក៏ពុំធ្លាប់ត្អូញត្អែរពីខ្សែជីវិតដ៏លំបាកលំបិនរបស់ខ្លួននោះដែរ ក្រៅពីលើកទឹកចិត្តខ្លួនបន្តដំណើរទៅមុខ ក៏ដូចជាបង្ហាញក្តីអាណិតអាសូរ និងចិត្តស្រលាញ់ចំពោះស្វាមី។

គួរជម្រាបថា អ្នកស្រី សួន ចន្ថា ដែលមានឈ្មោះពិត សុិន សុវណ្ណចន្ថា បានចាប់អាជីពសិល្បៈតាំងពីឆ្នាំ១៩៩៤ បន្ទាប់ពី ប្រឡងជាប់លេខ១ ក្នុងកម្មវិធីប្រលងចម្រៀងនៅបាត់ដំបង អំឡុងឆ្នាំ១៩៩១ ។ ឈានជើងចូលសិល្បៈភ្លាម តារាចម្រៀងជើងចាស់រូបនេះ ក៏ត្រូវបានគេស្គាល់និងល្បីឈ្មោះ ដោយសារតែផ្ទុះការគាំទ្រខ្លាំងជាមួយបទដំបូងបង្អស់របស់អ្នកស្រី គឺបទ “ចង្វាក់មីហ្គាឌិន” និងបានផ្លាស់ទ្រនំផលិតកម្មជាបន្តបន្ទាប់។ អំឡុងឆ្នាំ១៩៩៨ អ្នកស្រី ក៏សាងភាពល្បីលាញថែមទៀត និងមានការស្គាល់ តាមរយៈបទ “កាមទេពស្នេហ៍” ដែលជាស្នាដៃនិពន្ធរបស់លោក ហ្វៃ សំអាង ចម្រៀងដែលដាក់បញ្ចូលក្នុងភាពយន្តចាក់បញ្ចាំងលើប៉ុស្តិ៍ទូរទស្សន៍ TV3 ៕ អត្ថបទ៖ ចាន់រ៉ា