បុរសកម្សត់ម្នាក់ អួលដើមកសម្រក់ទឹកភ្នែក លើកដៃទទួលទឹកចិត្តឧកញ៉ា ព្រាប សុវត្ថិ ដែលជូនថវិកាដល់គ្រួសារខ្លួន

អំឡុងពេលដំណើរកម្សាន្តជួបជុំគ្រួសារ ឧកញ៉ា ព្រាប សុវត្ថិ និងកូនៗ បានជូនថវិកាដល់បុរស ២នាក់ ដែលកំពុងអង្គុយក្រោមខ្ទមកម្សត់មួយ ខណៈម្នាក់ក្នុងចំណោមនោះ ជាបុរសមានពិការភាព។ យ៉ាងណា ដោយក្តីរំភើបនូវទឹកចិត្តដ៏ប្រពៃ របស់ក្រុមគ្រួសារតារាចម្រៀងល្បីឈ្មោះរូបនេះ បុរសរូបនោះបានត្រឹមសម្រក់ទឹកភ្នែក និងសម្តែងការអរគុណ។

បើតាមសកម្មភាពដំណើរកម្សាន្តលើហ្វេសប៊ុកផេករបស់កំពូលតារាចម្រៀង ព្រាប សុវត្ថិ លោកនិងក្រុមគ្រួសារ បានជួបសំណេះសំណាលនឹងបុរស ២នាក់ ដែលទំនងជាគ្រួសារតែមួយ ទន្ទឹមនឹងជូនថិកាដល់ពួកគាត់ផងដែរ។ ហើយដោយក្តីរំភើបជាពន់ពេក គាត់លើកដៃជូតទឹកភ្នែក និងសម្តែងការអរគុណ ចំពោះក្រុមគ្រួសារឧកញ៉ារូបនេះ ដែលមានទឹកចិត្តសង្វេគនឹងជីវិតខ្លួន ខណៈកំពុងខ្វះខាតនិងជួបការលំបាក។

តាមរយៈសកម្មភាពនេះ មហាជនបានកោតសរសើរនូវសន្តានចិត្តរបស់ឧកញ៉ា ព្រាប សុវត្ថិ និងក្រុមគ្រួសារ ដែលមិនមើលរំលងអ្នកក្រក្សត់ ឆ្លៀតជួយក្រុមគ្រួសារខាងលើដោយមិនមើលនឹងភ្នែក។ ដោយមើលឃើញនូវទឹកចិត្តសប្បុរសនេះ មតិខ្លះបានលើកឡើងថា “គួរឱ្យសរសើរ my idol ល្អទាំងចិត្ត ល្អទាំងកាយ ស័ក្តសមជាអ្នកគួរជាទីគោរពស្រលាញ់”។

គួរបញ្ជាក់ថា កន្លងមកឧកញ៉ា ព្រាប សុវត្ថិ តែងមានចិត្តជួយអ្នកដែលជួបប្រទះនឹងការលំបាក មិនថាអ្នករួមអាជីព ឬពលរដ្ឋខ្មែរដែលលោកបានជួបដោយចៃដន្យនៅទីកន្លែងណានោះទេ។ មិនតែប៉ុណ្ណោះ តារា​ចម្រៀងជួរមុខរូបនេះ ក៏តែងចូលរួមដល់សង្គមជាតិតាមរយៈសកម្មភាពនានាផងដែរ៕