ស្អែកនេះ! ម៉ាដាម ដា នឹងធ្វើសន្និសីទសារព័ត៌មានពាក់ព័ន្ធរឿងផ្សព្វផ្សាយមិនពិត ពីបញ្ហាបំណុលរបស់ខ្លួន

ក្រោយមានការចុះផ្សាយ និងចែករំលែកទាក់ទាងនឹងរឿងរ៉ាវបញ្ហាបំណុលរាប់មុឺនដុល្លារ អ្នកស្រី សៀន សូលីដា ហៅ ម៉ាដាម ដា បានប្រកាសលិខិតជូនដំណឹងមួយ ពីការិយាល័យមេធារី ដែលឱ្យបញ្ឈប់នូវរាល់សកម្មភាពផ្សព្វផ្សាយ និងចែកចាយនូវព័ត៌មានមិនពិតណាមួយ ដែលធ្វើឱ្យប៉ះពាល់ដល់កិត្តិយស កេរ្តិ៍ឈ្មោះ និងសេចក្តីថ្លៃថ្នូររបស់ខ្លួន។

តាមរយៈសេចក្តីជូនដំណឹងនេះ លោក គឹម សុខលីម មេធាវីតំណាងឱ្យអ្នកជំនួញខាងលើ បានបញ្ជាក់ថា កាលពីពេលថ្មីៗនេះ មានគណនីហ្វេសប៊ុកមួយចំនួន និងបណ្តាញសារព័ត៌មានផ្សេងទៀត បានធ្វើការផ្សព្វផ្សាយភ្ជាប់ដោយរូបភាព និងវីដេអូ ដែលធ្វើឱ្យសាធារណៈមានការភ័ន្តច្រឡំចំពោះកូនក្តីរបស់ខ្លួន ដោយចាត់ទុកថានោះ បានធ្វើឱ្យប៉ះពាល់ដល់កិត្តិយស កេរ្តិ៍ឈ្មោះ និងសេចក្តីថ្លៃថ្នូររបស់កូនក្តីខ្លួនយ៉ាងខ្លាំង។

ប្រភពដដែលបន្ថែមដែរថា នៅថ្ងៃទី ០៣ មករា ស្អែកនេះ អ្នកស្រី សៀន សូលីដា នឹងធ្វើសន្និសីទសារព័ត៌មានបកស្រាយ ទាក់ទងទៅនឹងប្រធានបទដែលកំពុងមានការចែកចាយនៅលើបណ្តាញទំនាក់ទំនងសង្គមនានាជុំវិញរឿងរ៉ាវនេះ។ ដោយហេតុនេះ មេធាវីតំណាង បានស្នើឱ្យសាធារណជនបញ្ឈប់ ក៏ដូចជារង់ចាំការបកស្រាយនូវការពិតអំពីរឿងរ៉ាវនេះ ជៀសវាងការចែកចាយព័ត៌មានមិនពិតដែលគ្មានមូលដ្ឋានច្បាស់លាស់៕