ជីវិតកម្សាន្ដ

ប៉ូលិសរកឃើញតួសម្ដែងរឿង «Ip Man» ក្រោយធ្លាយដល់តំបន់ជួញដូរមនុស្ស ថៃ-មីយ៉ាន់ម៉ា

បានផុស

៥ ថ្ងៃ មុន

នៅ

ថ្ងៃពុធ ៨ មករា ២០២៥

ដោយ

អាជ្ញាធរថៃបាននិយាយកាលពីថ្ងៃអង្គារថា តារាសម្ដែងចិន Wang Xing មានឈ្មោះហៅក្រៅថា Xing Xing បានបាត់ខ្លួនកាលពីសប្តាហ៍មុននៅជិតព្រំដែនថៃ-មីយ៉ាន់ម៉ា នាពេលនេះលោកបានវិលត្រឡប់មកវិញដោយសុវត្ថិភាព ខណៈគេសង្ស័យថា អាចជាជនរងគ្រោះនៃការជួញដូរមនុស្ស។

Wang Xing គឺជាតួសម្ដែងក្នុងរឿង «Ip Man វគ្គ៣» លោកត្រូវគេរាយការណ៍ថា បានបាត់ខ្លួននៅក្នុងខេត្ត Tak ជាប់ព្រំប្រទល់ Myawaddy ក្នុងប្រទេសមីយ៉ាន់ម៉ា ជាតំបន់ដែលល្បីល្បាញឧក្រិដ្ឋកម្មទ្រង់ទ្រាយធំ និងការជួញដូរមនុស្សដោយក្រុមក្មេងទំនើងដែលបានរៀបចំទុកមុន។

តារាសម្ដែងជនជាតិចិនរូបនេះ បានឆ្លងចូលប្រទេសថៃតាមច្រកអន្តោប្រវេសន៍ក្នុងស្រុក Mae Sot នៅម៉ោងប្រហែល ៣ រសៀលថ្ងៃអង្គារ បន្ទាប់ពីត្រូវបានប្រាប់ថាកំពុងសម្ដែងរឿងមួយ ប៉ុន្តែបែរជាត្រូវបាននាំឆ្លងព្រំដែន និងបង្ហាត់បង្រៀនដើម្បីបោកប្រាស់ជនជាតិចិនផ្សេងទៀត ដោយប៉ូលិសបានបន្ថែមថា គាត់មិនត្រូវបានរំលោភឬបំពានឡើយ។

ប៉ូលិសបានដកស្រង់សម្តីរបស់ជនងគ្រោះថា ជនរួមជាតិចិនម្នាក់បានល្បួងគាត់តាមរយៈកម្មវិធី WeChat ដោយប្រាប់ថា គាត់តំណាងឲ្យក្រុមហ៊ុនកម្សាន្តថៃដ៏ល្បីមួយ ហើយមានការងារឲ្យគាត់ធ្វើ។ ក្រោយមក ជនសង្ស័យជនជាតិចិនបានបញ្ជូនរថយន្តទៅទទួលលោកនៅព្រលានយន្តហោះសុវណ្ណភូមិ នៅថ្ងៃទី៣ មករា ហើយនាំគាត់ទៅក្រុងព្រំដែន Mae Sot ក្នុងខេត្ត Tak។ បន្ទាប់មកមានមនុស្សម្នាក់ទៀតនាំគាត់ចូលទៅប្រទេសមីយ៉ាន់ម៉ា តាមទូកឆ្លងកាត់ទន្លេ Moei ដោយឆ្លងកាត់ច្រកត្រួតពិនិត្យអន្តោប្រវេសន៍។ នៅពេលនោះ ទើបលោកស្រាប់តែភ្ញាក់ខ្លួនថា ត្រូវគេបោកប្រាស់ហើយ។

ប៉ូលិសបាននិយាយថា ផ្អែកតាមការស៊ើបអង្កេតដំបូងពួកគេជឿថា គាត់ជាជនរងគ្រោះនៃការជួញដូរមនុស្ស។ ប៉ុន្តែយ៉ាងណា ប៉ូលិសកំពុងសាកសួរតារាសម្ដែងវ័យ៣១ឆ្នាំឲ្យបានលម្អិតបន្ថែមទៀត ដើម្បីស្វែងយល់ពីបទពិសោធន៍របស់គាត់នៅក្នុងប្រទេសមីយ៉ាន់ម៉ា និងមនុស្សដែលបាននាំរូបលោកទៅទៅកាន់ទីនោះ។

បន្ទាប់ពីមានសេចក្តីរាយការណ៍អំពីការបាត់ខ្លួនរបស់ Wang Xing បានកើតឡើង តារាសម្តែងចិន Xu Dajiu បានរំលឹកពីបទពិសោធន៍ស្រដៀងគ្នានេះដែរ ហើយបានចេញការព្រមានអំពីការក្លែងបន្លំក្រុមការងារភាពយន្តនៅក្នុងប្រទេសថៃ។ លោកបានរៀបរាប់ថា ខ្លួនក៏ត្រូវគេបោកបញ្ឆោតពីការផ្សាយពាណិជ្ជកម្មការងាររឿងភាគដែលថតនៅប្រទេសថៃដែរ។ ពេលមកដល់ លោកបានប្រឈមមុខនឹងការប៉ុនប៉ងរឹបអូសលិខិតឆ្លងដែន ហើយទើបរកឃើញថា ការផលិតខ្សែភាពយន្តគឺមិនមានទេ៕