ម្តាយ RuthKo ដង្ហើយទាមទារសងជីវិតកូនប្រុសមកវិញ

មហាជននិងអ្នកគាំទ្ររួមទាំងអ្នកសិល្ប: បានបង្ហាញអារម្មណ៍កាន់តែរន្ធត់ចិត្តជាពន់ពេក ហើយថែមទាំងសោកសៅជាខ្លាំង បន្ទាប់ពីឃើញម្តាយរបស់លោក RuthKo បានបង្ហោះខ្លឹមសារខ្លីមួយដង្ហើយទាមទារឱ្យជនបង្កសងជីវិតកូនប្រុសខ្លួនមកវិញ។

សពរបស់តារាចម្រៀងរ៉េបល្បីឈ្មោះលោក RuthKo ត្រូវបានរៀបចំពិធីបូជាតាមប្រពៃណីហើយ នៅព្រឹកថ្ងៃទី០៨ ខែមករា ឆ្នាំ២០២៥នេះ ដោយបន្សល់ទុកនូវក្តីសោកសង្រេងយ៉ាង និងភាពសោកស្តៅក្រៀមក្រំបំផុត សម្រាប់ក្រុមគ្រួសារមិត្តភក្តិ សិល្បករសិល្បការិនី ព្រមទាំងអ្នកគាំទ្ររបស់លោកជាច្រើនទៀត។

បើក្រឡេកទៅមើសាច់ញាតិរបស់តារារ៉េបរូបនេះ ជាពិសេសអ្នកម្តាយរបស់លោក បានសម្តែងក្តីឈឺចាប់ខ្លោចផ្សារជាពន់ពេក ដែលបាត់បង់កូនប្រុសជាទីស្រលាញ់។ ផ្អែកគណនីហ្វេសប៊ុកមានឈ្មោះថា Coromac Cam បានបញ្ចេញខ្លឹមសារអមដោយរូបភាពភ្លើងកំពុងឆាបឆេះសពកូនប្រុស បានលើកឡើងថា “សងជីវិតកូនខ្ញុំវិញ ឯងមានសមត្ថភាពទេ?“។

ទស្សនិកជនដឹងហើយថា ដំណឹងនៃការស្លាប់របស់តារារ៉េបលោក ដាវិឌឫទ្ធិរុទ្រ ហៅ RuthKo រហូតមកទល់ពេលនេះនៅតែធ្វើឱ្យអ្នកសិល្ប:រួមអាជីពនិងអ្នកគាំទ្រជាច្រើនសម្តែងក្តីស្លុតចិត្ត និងសោកស្តាយជាខ្លាំង ចំពោះការបាត់បង់ធន់ធានអ្នកសិល្ប:ផ្នែកវិស័យចម្រៀងរ៉េបរូបនេះ។

ចំពោះកម្មវិធីបុណ្យគំរប់ ៧ថ្ងៃដល់តារាចម្រៀងរ៉េល្បី ឈ្មោះRuthKo នឹងត្រូវប្រារព្ធធ្វើនៅថ្ងៃ១២ ខែមករា ឆ្នាំ២០២៥ ខាងមុខនេះ នៅគេហដ្ឋានរបស់សពនៅ ផ្ទះលេខ ៥១ផ្លូវ ១៦៨ ភូមិទួលរការ១ សង្កាត់ចាក់អង្រែក្រោម ខណ្ឌមានជ័យ រាធានីភ្នំពេញ៕ អត្ថបទ៖ ចាន់រ៉ា