ដេត ស្រីនាឌ សម្រេចចិត្តចូលរួមប្រកួតកម្មវិធី Miss 2025 និងប្តេជ្ញាមិនធ្វើឱ្យអ្នកគាំទ្រខកចិត្តទេ

ទីបំផុតអតីតបវរកញ្ញា Miss Planet 2024 កញ្ញា ដេត ស្រីនាឌ បានប្រកាសសម្រេចចិត្តចូលរួមប្រកួតជាថ្មី ក្នុងកម្មវិធីបវរកញ្ញាមួយនាឆ្នាំ២០២៥នេះ ខណ:ដែលកន្លងមក ស្រីនាឌ បានដកខ្លួនមិនចូលរួមប្រកួតកម្មវិធី MPI 2024 នៅថ្ងៃប្រឡងវគ្គផ្តាច់ព្រ័ត្រកាលពីថ្ងៃទី ២៧ ខែវិច្ឆិកា ឆ្នាំ២០២៤ ។

តួយ៉ាងនៅថ្ងៃទី០៨ ខែមករា ឆ្នាំ២០២៤នេះ កញ្ញា ដេត ស្រីនាឌ បានសម្រេចចិត្តដាក់ពាក្យចូលប្រកួតដោយលេចវត្តមានក្លាយជាបេក្ខភាពផ្លូវការ ក្នុងកម្មវិធីប្រកួតបវរកញ្ញាថ្មីមួយ Miss Lakamo Cambodia 2025 ។ ខណ:មានអ្នកគាំទ្រ និងមហាជនមួយចំនួនបានវែកញែកដោយខ្លះលើកទឹកចិត្ត និងខ្លះទៀតថា គួរកំុចូលរួមប្រកួតទៀតអី។

ដោយឡែក សាមុីខ្លួនកញ្ញា ដេត ស្រីនាឌ បានបញ្ជាក់ឱ្យដឹងកាលពីថ្មីៗនេះថា នាងមិនអាចដូរការគិតរបស់បងប្អូនចំពោះនាងក្នុងបញ្ហាដែលបានកើតឡើង កន្លងមកហើយនាងក៏មិនអាចបកស្រាយឱ្យអស់សេចក្តីនូវគ្រប់ករណីទេ តែរូបនាងបានសម្រេចចិត្តថា ឆ្នាំថ្មីឆ្នាំ២០២៥នេះ នាងនឹងជ្រើសរើសការបង្ហាញឆន្ទ: របស់ខ្លួនចំពោះវិស័យបវរកញ្ញាក្នុងកម្មវិធី Miss ណាមួយដើម្បីចូលប្រកួត ។

ដេត ស្រីនាឌ បានអះអាងថាខ្ញុំនឹងខិតខំបញ្ចេញឱ្យអស់ពីសមត្ថភាពនូវអ្វីដែល នាងខ្ញុំមាន និងសូមពុក​ម៉ែបងប្អូនផ្តល់ឱកាសឱ្យនាងខ្ញុំបានបង្ហាញនូវឆន្ទ: និងគោលដៅ​របស់នាងខ្ញុំដោយការអនុគ្រោះខ្ញុំ ដួលកន្លែងណាខ្ញុំនឹងខំប្រឹងក្រោកឈរនៅកន្លែនោះ។ ទោះបីជាយ៉ាងណាគេក៏កំពុងរង់ចាំមើលថា តើ ដេត ស្រីនាឌ មកម្តងនេះ នឹងទទួលបានការគាំទ្រ និងអាចស្តាបានមកវិញនៅកេរ្តិ៍ឈ្មោះឬយ៉ាងណាដែរ៕ អត្ថបទ៖​ ចាន់រ៉ា