ជីវិតកម្សាន្ដ

តារាចម្រៀង Eason លុបចោលការប្រគំតន្ត្រីនៅថៃ ក្រោយតួសម្ដែងចិនរងគ្រោះក្នុងអំពើជួញដូរមនុស្ស

បានផុស

២ ខែ មុន

នៅ

ថ្ងៃអង្គារ ១៤ មករា ២០២៥

ដោយ

តារាចម្រៀង Eason Chan បានលុបចោលការប្រគំតន្ត្រីនៅទីក្រុងបាងកក ដែលគ្រោងធ្វើឡើងនៅថ្ងៃទី ២២ ខែកុម្ភៈ បន្ទាប់ពីមានឧប្បត្តិហេតុមួយដែលតារាសម្តែងចិន Wang Xing ក្លាយជាជនរងគ្រោះត្រូវគេបោកប្រាស់ ដក់ថ្នាក់ធ្លាក់ខ្លួនដល់ដៃក្រុមជួញដូរទៅប្រទេសមីយ៉ាន់ម៉ា បន្ទាប់ពីបានទៅដល់ប្រទេសថៃ។

យោងតាមកាសែត Dimsum Daily អ្នកគ្រប់គ្រងរបស់ Chan គឺ Lisa Kan បានពន្យល់ពីការសម្រេចចិត្តនេះថា បន្ទាប់ពីបានតាមដានព័ត៌មាន និងពិភាក្សាអំពីស្ថានភាពយ៉ាងដិតដល់ ពួកKeបានសម្រេចចិត្តថា វាមិនសមនឹងការប្រថុយសុវត្ថិភាពរបស់អ្នកគាំទ្រ និងក្រុមគ្រួសាររបស់ពួកគេដែលធ្វើដំណើរទៅប្រទេសថៃសម្រាប់ការប្រគំតន្ត្រីនោះទេ។

អ្នកគ្រប់គ្រងតារាចម្រៀងហុងកុងបានបញ្ចាក់ទៀតថា «ពួកយើងចង់ស្វែងរកពេលវេលាសមស្របជាងនេះដើម្បីរៀបចំព្រឹត្តិការណ៍។ ក្រុមពួកយើងយល់ថាប្រជាជនថៃក្នុងស្រុក និងជនជាតិចិននៅក្រៅប្រទេសជាច្រើនមានការខកចិត្តយ៉ាងខ្លាំងចំពោះការលុបចោលភ្លាមៗ ហើយយើងសូមអភ័យទោសដោយស្មោះ។ ក្រុមការងារក៏សង្ឃឹមថានឹងត្រឡប់មកវិញនៅពេលអនាគត»។

មិនត្រឹមតែប៉ុណ្ណោះ ដើម្បីឲ្យអ្នកគាំទ្របានស្ងប់ចិត្ត ទីភ្នាក់ងារគ្រប់គ្រងរបស់តារាចម្រៀងហុងកុងគឺ Shanghai Sunfan Culture & Media Group បានបន្ទរពីសំណេរនៅក្នុងសេចក្តីថ្លែងការណ៍ផ្លូវការមួយដែរថា៖

សេចក្តីថ្លែងការណ៍បាននិយាយថា «ដោយពិចារណាលើការព្រួយបារម្ភអំពីសុវត្ថិភាពនាពេលថ្មីៗនេះសម្រាប់ពលរដ្ឋចិន និងអ្នកគាំទ្រដែលធ្វើដំណើរទៅកាន់ប្រទេសថៃ យើងបានសម្រេចចិត្តដោយប្រុងប្រយ័ត្ន បន្ទាប់ពីពិភាក្សាជាមួយ Eason គណៈគ្រប់គ្រងរបស់គាត់ និងអ្នករៀបចំក្នុងស្រុក ដើម្បីលុបចោលការប្រគំតន្ត្រីនាពេលខាងមុខនៅ IMPACT ARENA ក្នុងទីក្រុងបាងកក។ យើងសូមអភ័យទោសយ៉ាងជ្រាលជ្រៅចំពោះភាពរអាក់រអួលដែលវាអាចបណ្តាលឲ្យអ្នកគាំទ្រមិនពេញចិត្ត ។ ការសងប្រាក់សំបុត្រនឹងត្រូវចេញក្នុងរយៈពេល ១០ ថ្ងៃធ្វើការបន្ទាប់ពីការប្រកាស»។

យ៉ាងណា ដោយផ្អែកតាមរឿងរ៉ាវរបស់តារាចិន ដែលល្បីល្បាញដោយសារតួនាទីក្នុងរឿង «Ip Manវគ្គ៣» បានមកដល់ប្រទេសថៃនៅថ្ងៃទី ០៣ ខែមករា បន្ទាប់ពីឆ្លើយតបទៅនឹងការផ្សាយពាណិជ្ជកម្មការងារមួយ។ ពីភូកេតមក គាត់ត្រូវបានដឹកជញ្ជូនដោយក្រុមហ៊ុនឈ្មួញជើងសាការងារទៅកាន់ខេត្ត ឆៃណាត ដែលជាខេត្តមួយនៅភាគកណ្តាលប្រទេសថៃ ហើយក្រោយមកធ្លាក់ទៅកាន់ Mae Sot ស្រុកមួយក្នុងខេត្ត Tak ក្បែរព្រំដែនថៃ-មីយ៉ាន់ម៉ា។ មិនយូរប៉ុន្មាន តារាសម្ដែងស្រាប់តែបាត់បង់ទំនាក់ទំនងជាមួយសាច់ញាតិ និងមិត្តស្រីភ្លាមៗ។

បន្ទាប់ពីត្រូវបានជួយសង្គ្រោះកាលពីថ្ងៃទី ០៧ ខែមករា លោក Wang បានរៀបរាប់ឡើងវិញថា លោកត្រូវបានគេបង្ខំឲ្យឆ្លងកាត់ទន្លេមួយចូលទៅមីយ៉ាន់ម៉ា ដែលបុគ្គលប្រដាប់អាវុធបានដឹកគាត់ទៅផ្ទះមួយដែលមានជនជាតិចិនយ៉ាងតិច ៥០ នាក់ និងប្រជាជនមកពីប្រទេសផ្សេងៗ។ គាត់បានរៀបរាប់ពីរបៀបដែលអ្នករាល់គ្នានៅទីនោះត្រូវបានបង្ខំឲ្យកោរសក់ និងទទួលបានការបណ្តុះបណ្តាលបោកប្រាស់តាមរយៈការផ្ញើសារក្នុងរយៈពេលបីថ្ងៃ។ ទោះជាយ៉ាងណា លោកមិនទាន់បានចាប់ផ្តើមបណ្តុះបណ្តាលពីការឆបោកតាមទូរស័ព្ទនៅឡើយទេ៕