សេន រ៉ានុត ត្រូវបានសម្តេចតេជោ នឹករលឹក និងលើកសរសើរនូវទឹកដមសំឡេង ច្រៀងបទប្រពៃណីពីរោះរណ្តំពេញចិត្តសម្តេច

ទោះបាត់មុខពីសិល្បៈជាច្រើនឆ្នាំ តារាចម្រៀង លោក សេន រ៉ានុត នៅតែត្រូវបានសម្តេចតេជោ ហ៊ុន សែន លើកឈ្មោះលោកម្តងហើយម្តងទៀត ដោយសរសើរនូវទឹកដមសំឡេងតារាចម្រៀងប្រុសរូបនេះ ថាច្រៀងបទប្រពៃណីពីរោះរណ្តំពេញចិត្តសម្តេច។

តាមរយៈវីដេអូដកស្រង់ខ្លី ដែលសម្តេចតេជោរំលឹកពីឈ្មោះតារាចម្រៀង លោក សេន រ៉ានុត សាមុីខ្លួនផ្ទាល់ក៏បានបង្ហាញក្តីរំភើបតាមរយៈសំណេរថា “១៦ឆ្នាំមុន កូនបានទទួលដំណឹងសម្ដេចពុករំលឹកដល់ឈ្មោះកូន ពេលនេះសម្ដេចពុកនឹករលឹកដល់កូនម្ដងទៀត ពិតជាមហាកិត្តិយសណាស់ កូនស្ងៀមគោរពអរគុណសម្រាប់ទឹកចិត្ត ស្រលាញ់មកកាន់កូន សូមគោរពជូនពរសម្ដេចពុកឲ្យទទួលបានសុខភាពល្អ”។

ជាការឆ្លើយតប សម្តេចតេជោ បានមានប្រសាសន៍តាមរយៈការបញ្ចេញមតិថា សម្តេចពិតជានឹកដល់តារាចម្រៀងរូបនេះដោយមិនបានទទួលដំណឹងថាលោកនៅទីណា? ទន្ទឹមនេះ សម្តេចតេជាបន្ថែមទៀតថា “ពុកតែងស្តាប់ចម្រៀងដែលកូនច្រៀងពិសេសបទដូចចុះនរក។ ក្រៅពីចូលចិត្តចម្រៀងកូន ពុកពេញចិត្តនូវអត្តចរិត្តកូនផងដែរ”។

សម្តេចបន្ថែមដោយបង្ហាញក្តីនឹករលឹក ចំពោះសិល្បករដទៃផ្សេងទៀតផងដែរថា “កូនកើត និងរីកធំធាត់ក្នុងពេលដែលពុកដឹកនាំប្រទេសដូចនេះ ពុកតែងតែនឹកដល់កូននិងកូនៗសិល្បករសិល្បការិនីផ្សេងទៀត ទាំងក្នុងនិងនៅក្រៅប្រទេស។ កូនៗបានចូលរួមចំណែកដល់ការអភិវឌ្ឍកម្ពុជា ក្រោមការដឹកនាំរបស់ពុក។ ជោគជ័យរបស់ពុក មានពួកកូនចូលរួម”។

ទន្ទឹមនេះ សម្តេចក៏បានរំលឹកដល់អនុស្សាវរីយ៍ក្នុងគ្រាដែលបានស្គាល់ តារាចម្រៀងរូបនេះថា “តាមពិតទៅទោះកូនជាអ្នកខេត្តបាត់ដំបង តែឪពុករបស់កូនមានស្រុកកំណើតនៅស្រុកស្ទឹងត្រង់ខេត្តកំពង់ចាម ជាមួយពុកដែរ។ ឯកូនក៏ធ្លាប់ទៅផ្ទះរបស់ពុកនៅពាមកោះស្នា ពេលកូនទៅថតជាមួយលោក ហ្វៃ សំអាង មុនពេលកូនចេញទៅក្រៅប្រទេសផងដែរ”។

រំភើបឥតឧបមា សេន រ៉ានុត បានសម្តែងការអរគុណចំពោះសម្តេចតេជោទៀតថា “សូមគោរពលោកពុកពីចម្ងាយកូនបានអានសារលោកពុក កូនពិតជាត្រេកអរខ្លាំងណាស់ ដែលពុកបានផ្តល់ក្តីស្រលាញ់មកលេីកូន កូនពិតជាមានមោទនភាពណាស់”។

តារាចម្រៀងរូបនេះ បន្តថា “កាលពីឆ្នាំ២០១៨ កូនបាត់បង់ឪពុក រីឯ៤ឆ្នាំកន្លងមកទៀត កូនបានបាត់បង់ម្តាយ ហេីយមិនទាន់ដង្ហេីមគាត់ឡេីយ។ ក៏ប៉ុន្តែកូនមិនសូវជាសោកសង្រេងប៉ុន្មានឡើយ ព្រោះកាលអ្នកទាំងពីរនៅមានជីវិត គាត់តែងតែសប្បាយចិត្តមិនឈប់ ព្រោះគាត់បានស្តាប់ប្រសាសន៍សម្តេចពុក លេីកសរសេីរកូនក្នុងបណ្តាញផ្សព្វផ្យាយ ជាសាធារណៈ ហេីយគាត់ទាំងពីរក៏មានមោទនភាពមិនឈប់រហូតមក ព្រោះលោកពុកបានជ្រាបហេីយថា កូនកេីតឆ្នាំ៨១ ក្រោយរំដោះ តែឆ្នាំ៩០ កូននៅឳពុកម្តាយដឹកដៃរត់ចូលត្រង់សេរ ស្ទេីររៀងរាល់ល្ងាច។ បេីនិយាយឲ្យចំទៅ គឺវែងណាស់លោកពុក តែកូនសូមគោរពអរគុណលោកពុកព្រមទាំងអ្នកម្តាយ និងគ្រួសារលោកពុកទាំងមូល និងប្រជាជនទាំងក្នុងនិងក្រៅប្រទេស ជួបតែសេចក្តីសុខជារៀងរហូតតរៀងទៅ”៕