តួសម្ដែង TVB គឺ Lee Lung Kei សារភាពលែងខ្មាស់អៀនថា ពិតជាធ្លាក់ខ្លួនក្រមែន

ដោយដកស្រង់ពី HK01 បានរាយការណ៍ថាតារាសម្ដែងហុងកុង Lee Lung Kei ដែលគេស្គាល់ថាជាតួឯកក្នុងរឿងភាគរបស់ TVB «The Return of the Condor Heroes» ថ្មីៗនេះបានចែករំលែកវីដេអូនៃកន្លែងរស់នៅផ្ទាល់ខ្លួន ដែលបង្ហាញពីបន្ទប់ចង្អៀតមួយដែលមានធ្នើរជាច្រើន និងហ្គីតាព្យួរនៅលើជញ្ជាំង។

ទោះជាបែបនេះក្ដី កន្លងមកតារាសម្តែងរូបនេះធ្លាប់មានផ្ទះប្រាំបីជាន់ ប៉ុន្តែបានផ្ទេរកម្មសិទ្ធិទៅអតីតប្រពន្ធដើមកាលពីឆ្នាំមុន ជាផ្នែកមួយនៃដំណោះស្រាយលែងលះរបស់អ្នកទាំងពីរ។ ការសម្រេចចិត្តនេះត្រូវបានធ្វើឡើងដើម្បីឲ្យគាត់អាចនៅជាមួយមិត្តស្រីបច្ចុប្បន្នគឺ Chris Wong ។ យ៉ាងណា នៅពេល​សួរ​អំពី​ស្ថានភាព​ហិរញ្ញវត្ថុ​ លោក Lee បាន​និយាយ​ថា​៖ «​មនុស្ស​គិត​ថា​ខ្ញុំ​ជា​អ្នក​មាន ប៉ុន្តែ​តាម​ពិត​ខ្ញុំ​ក្រីក្រ​​មិន​មាន​ឈ្មោះ​ខ្ញុំ​មួយ​កាក់​ទេ»។

លោក Lee បច្ចុប្បន្នកំពុងរៀបចំសម្រាប់ការសម្ដែងផ្ទាល់នៅមជ្ឈមណ្ឌលវប្បធម៌ហុងកុងនៅថ្ងៃទី២៥ ខែកុម្ភៈ នេះបើតាមការរាយការណ៍ Sohu ដែលត្រូវបានដកស្រង់ដោយ Znews ។ គាត់មើលឃើញថា នេះជាការចាប់ផ្តើមថ្មី ហើយសង្ឃឹមថាវានឹងនាំឲ្យគាត់រីករាយ និងវិជ្ជមាន ជាពិសេសក្នុងអំឡុងពេលនេះនៅពេលដែលមិត្តស្រីថ្មីកំពុងជាប់ពន្ធនាគារសម្រាប់ការស្នាក់នៅហួសទិដ្ឋាការហុងកុង។

ទោះបីជា Wong មិនអាចចូលរួមកម្មវិធីបានក៏ដោយ Lee និយាយថាវត្តមានរបស់នាងនៅក្នុងជីវិតរបស់គាត់គឺជាការលើកទឹកចិត្តដ៏ធំបំផុតរបស់គាត់។ គាត់ក៏បានចែករំលែកថា នាងបានគាំទ្រយ៉ាងខ្លាំង ដោយលើកទឹកចិត្តគាត់ឲ្យខិតខំប្រឹងប្រែងអស់ពីសមត្ថភាព និងធ្វើឲ្យព្រឹត្តិការណ៍នេះទទួលបានជោគជ័យ។

បើទោះជាមិត្តស្រីត្រូវជាប់គុកក៏ដោយ តែតារាសម្ដែងបានសន្យារៀបការជាមួយនាង បន្ទាប់ពីនាបត្រូវគេដោះលែង។ គូស្នេហ៍ដែលបានជួបគ្នានៅពេលLee Lung Kei មានអាយុ ៦៦ ឆ្នាំ ដើមឡើយគ្រោងនឹងរៀបការនៅចុងឆ្នាំ ២០២៣ ប៉ុន្តែបានពន្យារពេលពិធីមង្គលការបន្ទាប់ពីការស្លាប់របស់ឪពុកតារាសម្ដែង៕

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អត្ថបទ៖ សាង​​ ស្រីល័ក្ខ

ចុចអាន៖​YG ប្រកាសរំលាយផ្នែកសម្ដែងចោល ហើយងាកមកផ្ដោតតែតន្ត្រីប៉ុណ្ណោះ