DJ Kdep ថា ឱ្យតែឈប់គាំទ្រ​ការធ្វើទីផ្សារបែបបំពុលសង្គម គឺលែងមានក្រុមអ្នកបំពុលសង្គមហើយ

បន្ទាប់ពីមើលឃើញថា បច្ចុប្បន្នសន្ទុះនៃការធ្វើទីផ្សារបែបបំពុលសង្គម ហាក់មានការកើនឡើងវិញ DJ ក្លិប បានលើកយោបល់ជាសាធារណៈថា ឱ្យតែឈប់គាំទ្រ​ការធ្វើទីផ្សារបែបថោកទាប គឺលែងមានក្រុមអ្នកបំពុលសង្គមហើយ។

តាមរយៈបណ្តាញទំនាក់ទំនងសង្គមផ្ទាល់ខ្លួន DJ Kdep បានលើកឡើងថា គ្មានអីពិបាកទេ ក្នុងការកម្ចាត់ក្រុមអ្នកបំពុលសង្គម។ បើរាល់ផលិតផលណាដែលធ្វើទីផ្សារថោកទាប យកបុគ្គលមិនគ្រប់ទឹកឆ្កួតៗយកមកបំពុលសង្គម សាធារណជនគ្រាន់តែបញ្ឈប់ការគាំទ្រ និងទិញប្រើប្រាស់ទៅ គឺវាចប់ហើយ។

ក្នុងន័យនេះ លោកទំនងជាសំដៅដល់ការធ្វើទីផ្សារនានា ដែលនិយមផ្សព្វផ្សាយផលិតផល ឬរបររកទទួលទានរបស់ខ្លួន បែបមិនសមរម្យ ខណៈកន្លងមក ក៏តែងឃើញមានការធ្វើទីផ្សារ ដោយយកមនុស្សមានបញ្ហាសតិអារម្មណ៍មកធ្វើទីផ្សារផងដែរ។ ក្រៅពីនេះ ក៏នៅមានសកម្មភាពបំពុលសង្គមមួយចំនួនទៀត ដូចជាការប្រើរូបភាពមិនសមរម្យ និងបង្កើតរឿងរ៉ាវជម្លោះដើម្បីធ្វើទីផ្សារជាដើម។

ដោយមើលឃើញពីសកម្មភាពនៃការធ្វើទីផ្សារបែបនេះជារឿយ ទើប DJ Kdep បង្ហាញបំណងចង់ឱ្យមហាជនរួមគ្នាលុបបំបាត់សកម្មភាពទាំងនេះឱ្យអស់ពីសង្គម តាមរយៈការណែនាំឱ្យសាធារណជនកុំបន្តគាំទ្រ៕