តាមពិត ឈាង ដាវុធ ធ្លាប់ជាអ្នកចម្រៀងតាមកម្មវិធីមង្គល មុនសាងប្រជាប្រិយភាពក្នុងរឿងអប់រំខ្លី និងអាជីពជាពិធីករ

សាងប្រជាប្រិយភាពច្រើនឆ្នាំ លោក ឈាង ដាវុធ ពិធីករ និងជាអ្នកផលិតរឿងខ្លីៗបែបអប់រំម្នាក់ ដែលតែងត្រូវបានមហាជនស្ងើចសរសើរនូវស្នាដៃនៃការនិពន្ធរបស់លោក ទំនងជាពុំសូវមានអ្នកបានជ្រាបទេថា ក្រៅពីទេពកោសល្យជាពិធីករ និពន្ធនិងដឹកនាំរឿងអប់រំខ្លី លោកក៏ធ្លាប់ជាអ្នកចម្រៀងតាមកម្មវិធីមង្គលផងដែរ។

តាមរយៈសំណេរពីគណនីបណ្តាញទំនាក់ទំនងសង្គម លោក ឈាង ដាវុធ បានទម្លាយអតីតកាលរបស់ខ្លួន មុនពេលមានប្រជាប្រិយដូចបច្ចុប្បន្ន ដោយរៀបរាប់ថា “១២ឆ្នាំមុន ខ្ញុំជាអ្នកចម្រៀងកម្មវិធីមង្គល តែបច្ចុប្បន្នជាពិធីករ និងអ្នកផលិតរឿងខ្លី មានអី ម្យ៉ាងដែរ…”។

ក្រោយការទម្លាយរូបភាព ភ្ជាប់ជាមួយនឹងសំណេរនេះ អ្នកគាំទ្រលោកបានបង្ហាញការភ្ញាក់ផ្អើលនូវរូបសម្រស់លោកកាលពីមុន និងទើបតែបានដឹងថា ក្រៅពីទេពកោសល្យជាពិធីករ និងផលិតរឿង លោកនៅចេះច្រៀងថែមទៀត។

គួរជម្រាបថា តាមរយៈស្នាដៃរឿងខ្លីបែបអប់រំជាច្រើនរបស់ លោក ឈាង ដាវុធ គឺពិតជាទទួលបានការចាប់អារម្មណ៍ខ្លាំងពីសាធារណជន ពិសេសយុវវ័យ ក៏ព្រោះតែរាល់សាច់រឿងនីមួយៗដែលលោកនិពន្ធឡើងមក សុទ្ធតែមានអត្ថន័យល្អ ហើយថែមទាំងពូកែក្នុងការរើសតួសម្ដែងឱ្យស័ក្តិសមជាមួយតួអង្គនៅក្នុងសាច់រឿងថែមទៀត។ ដោយហេតុនេះហើយ ទើបធ្វើឱ្យរឿងពីមួយភាគទៅមួយភាគ កាន់តែល្អមើល ខណៈក្នុងនោះ លោកផ្ទាល់ក៏មានវត្តមានសម្តែងនៅក្នុងសាច់រឿងទាំងនោះផងដែរ៕