ជីវិតកម្សាន្ដ

តារាកំប្លែងនាយ ផ្លក់ ចយ មានជំងឺច្រើនមុខ ចូលសង្គ្រោះនៅមន្ទីរពេទ្យ

បានផុស

២ ខែ មុន

នៅ

ថ្ងៃសុក្រ ២៤ មករា ២០២៥

ដោយ

តារាកំប្លែងជើងចាស់ លោក ឡុង ចាន់ដារ៉ា ហៅ នាយ ផ្លក់ ចយ ថ្មីៗ មុននេះ ត្រូវបានក្រុមគ្រួសារបញ្ជូនចូលសង្គ្រោះបន្ទាន់នៅមន្ទីរពេទ្យ ក្រោយពើបប្រទះនូវជំងឺជាច្រើនមុខ។ បច្ចុប្បន្ន លោកកំពុងសម្រាកនៅមន្ទីរពេទ្យ ដើម្បីបន្តការព្យាបាលជំងឺ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីសមាគមសិល្បករខ្មែរ បានឲ្យដឹងថា ដោយទទួលបានការណែនាំពីលោកជំទាវអ្នកឧកញ៉ា ប្រធាន ក្រុមការងារសមាគមសិល្បករខ្មែរ បានចុះសួរសុខទុក្ខតារាកំប្លែងនាយ ផ្លក់ ចយ (លោក ឡុង ចាន់ដារ៉ា) ដែលទើបតែចេញពីបន្ទប់សង្គ្រោះបន្ទាន់ និងបន្តការព្យាបាលនៅមន្ទីរពេទ្យ។

នាឱកាសនោះ ក្រុមការងារសមាគមសិល្បករខ្មែរ បានពាំនាំនូវការសាកសួរសុខទុក្ខពីសំណាក់លោកជំទាវអ្នកឧកញ៉ា ម៉ៅ ចំណាន គិត ម៉េង ប្រធានសមាគមសិល្បករខ្មែរ ជូនចំពោះតារាកំប្លែងនាយ ផ្លក់ ចយ និង ជូនពរសូមឲ្យលោកឆាប់បានជាសះស្បើយពីជំងឺ អាចវិលទៅប្រកបអាជីពសិល្បៈបង្កសំណើចជូនដល់មហាជនទូទៅឡើងវិញ និងជាបង្អែករឹងមាំសម្រាប់ក្រុមគ្រួសារ។

ក្នុងនោះ ក្រុមការងារសមាគម ក៏បានសំណេះសំណាលស្វែងយល់ពីស្ថានភាពរបស់តារាកំប្លែងរូបនេះ ព្រមទាំងបានលើកទឹកចិត្តដល់តារាកំប្លែងនាយ ផ្លក់ ចយ កុំមានការអស់សង្ឃឹម ត្រូវខិតខំថែរក្សាសុខភាព គោរពតាមការណែនាំរបស់គ្រូពេទ្យ ដើម្បីបានជាសះស្បើយឆាប់ៗ។ ក្រុមការងារ ក៏បាននាំយកនូវថវិកាពីសមាគមសិល្បករខ្មែរចំនួន ៨០០ ០០០ រៀល ដើម្បីសម្រាលបន្ទុកចំណាយជាប្រចាំថ្ងៃមួយផ្នែកក្នុងដំណាក់កាលថែទាំព្យាបាលជំងឺ។

តារាកំប្លែងនាយ ផ្លក់ ចយ បានបង្ហាញអារម្មណ៍រីករាយ និងថ្លែងអំណរគុណដល់លោកជំទាវអ្នកឧកញ៉ា ម៉ៅ ចំណាន គិត ម៉េង ក៏ដូចជាក្រុមការងារទាំងអស់ ដែលមានការយកចិត្តទុកដាក់ពីសុខទុក្ខរបស់លោក ព្រមទាំងបានអញ្ជើញសាកសួរសុខទុក្ខដោយផ្ទាល់ដូច្នេះ។ នេះជាការលើកទឹកចិត្តយ៉ាងធំធេងដល់រូបលោក និងក្រុមគ្រួសារ។