ទិត្យ វិច្ឆិកា ហួសចិត្ត ក្រោយមានការយល់ច្រឡំថា លោកជួបគ្រោះថ្នាក់ចរាចរណ៍បាត់បង់ជីវិត យប់មិញ

តារាចម្រៀងជើងចាស់លោក ទិត្យ វិច្ឆិកា បានបង្ហាញការហួសចិត្តជាខ្លាំង បន្ទាប់ពីមានគេយល់ច្រឡំថាខ្លួនបានជួបគ្រោះថ្នាក់ចរាចរណ៍ បណ្តាលឲ្យបាត់បង់ជីវិតកាលពីយប់មិញនេះ។

ដំណឹងខាងលើនេះ បានធ្វើឲ្យមហាជនអ្នកគាំទ្រ និងមិត្តរួមអាជីពសិល្ប:ជាមួយតារាចម្រៀងលោក ទិត្យ វិច្ឆិកា មានការភ្ញាក់ផ្អើលគ្រប់គ្នាប៉ុន្តែក្រោយមានការយប់ច្រឡំនេះភ្លាមៗ លោក ទិត្យ វិច្ឆិកា បានចេញមុខបញ្ជាក់ថាពុំមែនជារូបលោកទេនេះគ្រាន់ព័ត៌មានយល់ច្រឡំប៉ុណ្ណោះ។

បើតាមគណនីហ្វេសប៊ុករបស់ពិធីករលោក ហេរ៉ូ បានបង្ហោះសារសំឡេងឆ្លើយឆ្លងជាមួយនឹង លោក ទិត្យ វិច្ឆិកា បានឱ្យដឹងថាលោក ទិត្យ វិច្ឆិកា មិនបានបាត់បង់ជីវិតក្នុងគ្រោះថ្នាក់ចរាចរណ៍នោះឡើយ។ លោកថា “សុំកែសម្រួលបងប្អូន​ ទិត្យ​ វិច្ឆិកា​ ដែលស្លាប់នោះមិនមែនជាលោក​ ទិត្យ​ វិច្ឆិកា​ ស៊េរីចាស់ទេ គឺ​ ទិត្យ​ វិច្ឆិកា​ តារាចម្រៀងដែរ តែផ្សេងគ្នាទេ​ សូមកុំយល់ច្រឡំ”។

ចំណែកឯសាមីខ្លួនលោក ទិត្យ វិច្ឆិកា បានឲ្យដឹងដោយសម្តែងការហួសចិត្តជាខ្លាំងថាគ្រាតែឭមិត្តភក្តិនិងបងប្អូនខលទៅសួរនាំភ្លាមៗនោះលោកមានការភ្ញាក់ ខ្លួនព្រឺតតែម្តងព្រោះអត់បានដឹងអីផងហើយអ្នកស្លាប់ក៏មិនដឹងអ្នកដែរ។ លោក ទិត្យ វិច្ឆិកា បានបន្ថែមថា នេះជាការភ័ន្តច្រឡំតែប៉ុណ្ណោះ ចំណែកលោកផ្ទាល់គឺអត់មានកើតអីទេ៕ អត្ថបទ៖ ចាន់រ៉ា