លោក គួច ខេវិន លើកឡើងអត្ថន័យខ្លះៗពាក់ព័ន្ធចូលឆ្នាំចិន និងការចែកអាំងប៉ាវ

ខណ:ពេលដែលពិធីបុណ្យចូលឆ្នាំថ្មីប្រពៃណីជនជាតិចិននឹងចូលមកដល់ឆាប់ៗខាងមុខនេះលោក គួច ខេវិន ដែលជាអតីតផលិតករកម្មវិធីកម្សាន្ត និងដោយមានជាប់សែស្រឡាយចិនផងនោះ លោកបានចេញមកលើកឡើងខ្លះៗអំពីអត្ថន័យពាក់ព័ន្ធចូលឆ្នាំចិននឹងការចែក”អាំងប៉ាវ”។

លោក គួច ខេវិន បានឲ្យដឹងថា លោកមានឪពុកជាជនជាតិចិន ហើយបានមករស់នៅស្រុកខ្មែរ ចំណែកខ្លួនលោកផ្ទាល់ គឺបានកើតនឹងរស់នៅស្រុកខ្មែរតែម្តង។ លោកនិយាយថា សល់តែប៉ុន្មានថ្ងៃទៀតពិធីបុណ្យចូលឆ្នាំថ្មីប្រពៃណីជនជាតិចិននឹងចូលមកដល់លោក ឪពុករបស់ខ្ញុំជាជនជាតិចិនមករស់នៅស្រុកខ្មែរខ្ញុំកើតនឹងរស់នៅស្រុកខ្មែរ ហើយថ្ងៃនេះខ្ញុំចង់និយាយពីប្រពៃណីឱ្យ”អាំងប៉ាវ”ពេលចូលឆ្នាំចិន។

លោក គួច ខេវិន បញ្ជាក់ឲ្យដឹងថា បើតាមការចេះចាំតពីកុងម៉ា ក្រោយពីអុជទៀនធូបដឹងគុណមេឃដីនិងទេវតារយៈពេលបីថ្ងៃ កូនចៅទាំងឡាយក្នុងគ្រួសារនីមួយៗ ត្រូវនាំគ្នាចូលទៅសំពះក្រាបបង្គំកុងម៉ាចាស់ទុំដើម្បីសម្តែងភាពកត្តញ្ញូកត្តវេទី ជូនពរនិងរៀបរាប់សុខទុក្ខការងាររកស៊ីជម្រាបដល់អ្នកមានគុណ ដើម្បីសុំពាក្យប្រៀនប្រដៅនិងពរជ័យឆ្នាំថ្មីពីលោកអ្នកមានគុណ។

លោកបន្តទៀតថា ជាកិច្ចតបឆ្លើយគឺលោកអ្នកមានគុណរមែងតែងតែឱ្យមកវិញនូវអាំងប៉ាវព៌ណក្រហម មានប្រាក់កាសតាមតិច តាមច្រើននៅក្នុងនោះជានិម្មិតរូបនៃការប្រសិទ្ធិពរជ័យ សិរីវិបុលសុខដល់កូន ដល់ចៅតទៅឆ្នាំថ្មីជាមួយនឹងពាក្យទូន្មានប្រៀនប្រដៅផ្សេងៗដូច្នេះការឱ្យ” អាំងប៉ាវ ” មិនមែនជាការតបឆ្លើយទៅនឹងការសុំឬត្រូវតែសុំនោះទេ។ តែចំពោះចិនឆៅវិញមិនដឹងថាប្រពៃណីនេះវាយ៉ាងណាទេ?៕ អត្ថបទ៖ ចាន់រ៉ា