នេនទុំ សម្រេចចេញបទ “ជីវិតអ្នកសិល្ប:” ក្រោយផ្ទុះរឿងម្ចាស់ផលិតកម្មកេងប្រវ័ញ្ចកម្លាំងញើសឈាមសិល្បករ

ដោយសង្កេតឃើញអំឡុងមួយរយ:នេះបានផ្ទុះនូវរឿងរ៉ាវពាក់ព័ន្ធអ្នកសិល្ប:ខ្មែរមួយចំនួនទម្លាយនិងត្អូញត្អែរជុំវិញ ម្ចាស់ផលិតកម្មមួយចំនួន មិនបើកលុយឲ្យហើយថែមទាំងកេងប្រវ័ញ្ចកម្លាំងញើសឈាមជាដើមនោះ តារាចម្រៀងរ៉េប នេនទុំ បានសម្រេចនិពន្ធ និងត្រៀមចេញបទ “ជីវិតអ្នកសិល្ប:” ក្នុងអត្ថន័យរៀបរាប់ពីទុក្ខលំបាករបស់អ្នកសិល្ប:។

ជាការពិត គេសង្កេតឃើញថាថ្មីៗនេះ មានការចាប់អារម្មណ៍ខ្លាំង ក្រោយតារាសម្តែងជើងចាស់ខ្មែរមួយរូប បានចេញមុខត្អូញត្អែរនិងទម្លាយជាបន្តបន្ទាប់ពាក់ព័ន្ធបណ្តាផលិតកម្ម ឬផលិតករមួយចំនួន នៅពេលពួកគេថតសម្តែងចប់មិនព្រមបើកលុយថ្លៃកម្រៃខ្លួនទៅតាមការសន្យា ដោយតួខ្លះទៀតឈានចូលជាឆ្នាំ ក៏ពុំទាន់ទទួលបានលុយទាំងនោះឡើយ។

តាមរយ:បទចម្រៀង “ជីវិតអ្នកសិល្ប:” របស់តារារ៉េប នេនទុំ ទើបតែចេញឃ្លីបខ្លីបង្ហោះនៅលើបណ្តាញសង្គមហ្វេសប៊ុកនេះដែរ យើងសង្កើតឃើញមានអ្នកគាំទ្រមួយចំនួនបាននាំគ្នាចាប់អារម្មណ៍ទៅលើអត្ថន័យបទនេះ ដែលច្រៀងរៀបរាប់ពីទុក្ខលំបាករបស់អ្នកសិល្ប:មួយចំនួន ដោយសារតែការមិនឲ្យតម្លៃពីបុគ្គលមួយចំនួនតូច។

ជាក់ស្តែង តារាសម្តែងជើងចាស់អ្នកស្រី រ៉េត រ៉ូស ទម្លាយរឿងរ៉ាវនៃការអន់ចិត្តព្រោះម្ចាស់ផលិតកម្មមិនបើកលុយឲ្យលើកម្រៃថតរឿង។ ក្នុងនោះអ្នកស្រីក៏បានផ្តាំ ផ្ញើតួសម្តែងជំនាន់ក្រោយមួយចំនួន ឲ្យមានការប្រុងប្រយ័ត្នចំពោះបណ្តាផលិតករមួយចំនួនតូច ដែលតែងកេងប្រវ័ញ្ចលើកម្លាំងញើសឈាមរបស់អ្នកសិល្ប: ទាំងចាស់និងថ្មី។

ទន្ទឹមគ្នានេះ តារាស្រីល្បីឈ្មោះយូរឆ្នាំគឺអ្នកនាង ស្វែង សុជាតា ក៏បានចេញមុខទម្លាយផងរឿងម្ចាស់ផលិកម្មមួយចំនួនដែលមិនឱ្យតម្លៃដល់សិល្បករសិល្បការិនី គឺការមិនព្រមបើកប្រាក់កម្រៃពីកម្លាំងពលកម្មឱ្យតួសម្តែងឡើយ ទាំងដែលថតចប់ដោយខ្លះមានរហូតឆ្នាំជាដើម។ អ្នកនាង ស្វែង សុជាតា បានគាំទ្រឱ្យតារាសម្តែងដែលត្រូវគេកេងចំណេញប្រាក់កម្រៃពីការថត រួមគ្នាបកអាក្រាតចំពោះរឿងនេះផងដែរ៕ អត្ថបទ៖ ចាន់រ៉ា