ករុណា ពេជ្រ ថា ភាពជោគជ័យរបស់ខ្លួន គឺទទួលបានពីរាប់រយលានចំណែកនៃអ្នកគាំទ្រ

តារាចម្រៀងជើងចាស់លោក ករុណា ពេជ្រ ដែលទើបវិលចូលប្រឡូកក្នុងអាជីពចាស់ (សិល្ប:) ជាថ្មីនោះ បានអះអាងថា ភាពជោគជ័យរបស់លោក គឺទទួលបានមកពីការរួមចំណែករបស់អ្នកគាំទ្រនិងមហាជនទាំងអស់គ្នា។

តារាចម្រៀងប្រុសលោក ករុណា ពេជ្រ កាលពីថ្មីៗកន្លងមកបានសម្តែងក្តីរំភើបនិងមានមោទភាពខ្លាំង បន្ទាប់ឃើញសន្ទុះនៃការគាំទ្រជាថ្មីពីសំណាក់មិត្តៗយុវវ័យនិងមហាជន ដោយក្នុងនោះលោកសន្យាថា នឹងនាំបទថ្មីប្លែកៗមនោសញ្ចេតនាកាលពី ១៤ឆ្នាំមុនមកវិញ។ តួយ៉ាង លោកក៏បានចេញបទល្បីកាលពីប៉ុន្មានឆ្នាំមុន «អ្នកកំដរ និង អស់ឱកាស Remake» ដែលជា Versionថ្មី ហើយទទួលបានការគាំទ្រខ្លាំងពីមហាជនផងដែរ។

ស្របពេលដែលសន្ទុះនៃការគាំទ្រនិងទីផ្សារចម្រៀងបានកម្រើកឡើងវិញ លោក ករុណា ពេជ្រ បាននិយាយថា “ឪពុកម្តាយខ្ញុំ បង្កើតខ្ញុំមក បាន៥០ភាគ រាល់កង្វះខ្វះខាតរបស់ខ្ញុំបន្ត គឺត្រូវបានមនុស្សល្អៗជុំវិញខ្លួនរបស់ខ្ញុំជួយបន្ថែម ទើបខ្ញុំមានថ្ងៃនេះ ហើយភាពជោគជ័យរបស់ខ្ញុំគឺទទួលបានមកពីរាប់រយលានចំណែករបស់អ្នកទាំងអស់គ្នា“។

តារាចម្រៀងលោក ករុណា ពេជ្រ បាននិយាយបន្ថែមថា លោកក៏អរគុណរាល់គ្រប់ចំណែកសាធារណជន ដែលគាំទ្ររូបលោកផ្ទាល់។ បន្ទាប់ពីស្ងប់ស្ងាត់បាត់វត្តមានពីវិថីចម្រៀងមួយរយ:ធំតារាចម្រៀងជើងចាស់លោក ករុណា ពេជ្រ បានប្រកាសដល់អ្នកគាំទ្ររបស់ពីការវិលមកវិញជាថ្មីជាមួយរសជាតិថ្មី ដើម្បីបំពេញបំណងនិងបំពេអារម្មណ៍ទស្សនិកជន តាមរយ:បទចម្រៀងចាស់ថ្មីជាដើម៕ អត្ថបទ៖ ចាន់រ៉ា