ជីវិតកម្សាន្ដ

ដំណើរជីវិតតួ សាន់ឆាយ ក្នុងវិស័យសិល្បៈដំបូង រហូតដល់ថ្ងៃលាចាកលោក

បានផុស

៤ នាទីutes មុន

នៅ

ថ្ងៃចន្ទ ៣ កុម្ភៈ ២០២៥

ដោយ

កើតនៅថ្ងៃទី ០៦ ខែតុលា ឆ្នាំ ១៩៧៦ នៅទីក្រុងតៃប៉ិ កោះតៃវ៉ាន់ Barbie Hsu បានចាប់ផ្តើមអាជីពដំបូងក្នុងឆ្នាំ ១៩៩៤ ជាមួយក្រុមចម្រៀងប៉ុប SOS (ដែលត្រូវបានគេស្គាល់ថាជា Small S) ដោយមានបងស្រីរបស់នាងជាសមាជិករួម។ ក្រោយមក អ្នកទាំងពីរបានប្តូរឈ្មោះទៅជា ASOS ដោយសារតែជម្លោះក្នុងកិច្ចសន្យា។

ទោះបីជាយ៉ាងណាក៏ដោយ វាគឺជាការផ្លាស់ប្តូររបស់ Barbie ទៅកាន់អាជីពសម្ដែង ដែលបានជំរុញឲ្យនាងក្លាយជាតារារះប្រចាំទឹកដីអាស៊ី។ នាងបានក្លាយជាឈ្មោះល្បីល្បាញនិងមានគេស្គាល់ដោយសារតែដើរតួជា សាន់ឆាយ នៅក្នុងរឿងភាគតៃវ៉ាន់ឆ្នាំ ២០០១ ក្រោមចំណងជើងថា «ស្នេហាបួនដួង ឬ Meteor Garden ដោយសម្តែងជាមួយតារាប្រុសតៃវ៉ាន់បួនរូបមានឈ្មោះថាក្រុម F4 ។ ការសម្ដែងរបស់នាងកាលណោះស្ថិតក្នុងនៅអាយុ ២៥ ឆ្នាំ ប៉ុណ្ណោះ ប៉ុន្តែបានបង្ហាញអំពីតួអង្គស្រីដែលមានឆន្ទៈដ៏មុតមាំ ដោយបានចាក់ដោតយ៉ាងខ្លាំងដល់ទស្សនិកជន ដែលធ្វើឲ្យរឿងភាគនេះទទួលបានប្រជាប្រិយភាពយ៉ាងខ្លាំងក្លា ជាពិសេសគឺនៅក្នុងប្រទេសកម្ពុជាតែម្ដង។

យ៉ាងណា បន្ទាប់ពីជោគជ័យយ៉ាងភ្លូកទឹកភ្លូកដីក្នុងរឿង F4 តារាស្រីវ័យ៤៨ឆ្នាំ បានបន្តសម្តែងក្នុងរឿងភាគតូច និងធំជាច្រើន ដូចជារឿងភាគ Mars (២០០៤) ភាពយន្តភ័យរន្ធត់ The Ghost Inside (២០០៥) និងរឿង Action Remake (២០០៨)។ មិនតែប៉ុណ្ណោះ នាងទទួលបានប្រជាប្រិយភាពខ្លាំងក្លាទាំងនៅតៃវ៉ាន់ និងចិនដីគោក។ នាងទទួលបានការងារធំៗជាបន្តបន្ទាប់ ដោយបង្ហាញខ្លួនជាតួឯកស្រីភាពយន្តភាគ និងភាពយន្តដុំជាច្រើនរឿង ថែមក្លាយជាទៅតារាបង្ហាញដ៏ពេញនិយមលើការផ្សាយពាណិជ្ជកម្ម និងទស្សនាវដ្ដីធំៗជាច្រើន។

ងាកមកកាន់ជីវិតផ្ទាល់ខ្លួន នាងមានពាក្យចចាមអារ៉ាមជាច្រើន ទើបសម្រេចរៀបការជាមួយអ្នកជំនួញជនជាតិចិន Wang Xiaofei ក្នុងឆ្នាំ ២០១១ ពួកគេមានកូនពីរនាក់ ប្រុសម្នាក់និងស្រីម្នាក់។ បន្តជីវិតគូជាមួយគ្នាបាន ១០ឆ្នាំ ពោលគឺនៅឆ្នាំ២០២១ សាន់ ឆាយ និងស្វាមីបានប្រកាសលែងលះ ខណៈមូលហេតុត្រូវប្រព័ន្ធផ្សព្វផ្សាយជាច្រើនឲ្យដឹងថា ដោយសារភាគីខាងស្វាមីពុំមានភាពស្មោះត្រង់ ហើយពួកគេមានការខ្វែងគំនិតគ្នាអំពីនយោបាយរវាងចិន និងតៃវ៉ាន់។

មិនយូរប៉ុន្មាន នៅខែសីហា ឆ្នាំ ២០២២ តួសាន់ឆាយ បានរៀបការជាមួយឌីជេកូរ៉េគឺលោក Koo Jun-yup ដែលជាអតីតគូស្នេហ៍ដែលនាងស្រលាញ់ជាង ២០ ឆ្នាំមុន។ អាពាហ៍ពិពាហ៍ឆ្លងដែននេះ បានទាក់ទាញការចាប់អារម្មណ៍យ៉ាងទូលំទូលាយ និងទទួលបានពរជ័យជាច្រើនពីអ្នកគាំទ្រ។

ថ្វីដ្បិតតែថា Barbie លែងលះដាច់ស្រេចជាមួយអតីតស្វាមីអ្នកជំនួញ និងសាងជីវិតថ្មីជាមួយស្វាមីទី២យ៉ាងណាក្ដី ប៉ុន្តែអតីតគូស្នេហ៍នៅតែឈ្លោះប្រកែកគ្នាជាច្រើនដងនៅលើបណ្តាញសង្គម ដែលធ្វើឲ្យទំនាក់ទំនងកាន់តែតានតឹងលសើមុន។ ប៉ុន្តែ យ៉ាងណាលោកតែងតែនៅទីនោះដើម្បីគាំទ្រប្រពន្ធ ដោយសារតែនាងទទួលរងសម្ពាធផ្លូវចិត្តយ៉ាងខ្លាំង។ DJ កូរ៉េថែមទាំងទទួលស្គាល់ថា ស្ថានភាពរាងកាយរបស់ Barbie មានសភាពទន់ខ្សោយក្នុងរយៈពេលពីរឆ្នាំមកនេះ លើកលែងតែការថតម៉ូដក្នុងទស្សនាវដ្ដីតារារូបនេះ មិនបានបង្ហាញខ្លួនជាសាធារណៈតែប៉ុណ្ណោះ។

ដោយឡែក ការស្លាប់របស់តួ សាន់ឆាយ បានធ្វើឲ្យអ្នកគាំទ្រជាច្រើនមានអារម្មណ៍តក់ស្លុតបំផុត ដោយមិននឹកស្មានថាដល់ថា តារាស្រីបែរជាស្លាប់ដោយសារតែផ្ដាសាយ និង ជំងឺរលាកសួត។ ដូច្នេះហើយ ទស្សនិកជនហាក់មិនអស់ចិត្ត ទើបធ្វើឲ្យមានការជីកកកាយឡើងវិញ អំពីប្រវត្តិនៃជំងឺរបស់នាង។

តាមពិតទៅ កាលពីឆ្នាំ ២០១៨ ប្រព័ន្ធផ្សព្វផ្សាយតៃវ៉ាន់ បានរាយការណ៍ថា Barbie ត្រូវចូលមន្ទីរពេទ្យជាច្រើនដង ដោយសារប្រកាច់ នៃជំងឺឆ្កួតជ្រូកនិងសន្លប់ នៅក្នុងបទសម្ភាសន៍តាមប្រព័ន្ធផ្សព្វផ្សាយ ម្តាយរបស់នាងបានសារភាពថា ជំងឺឆ្កួតជ្រូករបស់កូនស្រីគាត់បានធូរស្រាលឡើងវិញ ដែលធ្វើឲ្យគ្រួសារមានការព្រួយបារម្ភយ៉ាងខ្លាំង។

យ៉ាងណាមិញ នៅថ្ងៃទី ០៣ ខែកុម្ភៈ ប្រភពជិតស្និទ្ធនឹងក្រុមគ្រួសាររបស់តារាសម្តែងបាននិយាយថា នៅថ្ងៃបុណ្យចូលឆ្នាំថ្មី (ថ្ងៃទី ២៩ ខែមករា) គ្រួសារបន្តបានចូលប្រទេសជប៉ុន។ នៅថ្ងៃនោះ តួសាន់ឆាយ មានរោគសញ្ញាគ្រុនផ្តាសាយតិចតួច។ ពេលទៅងូតទឹកទឹកក្តៅរួច រាងកាយរបសនាងស្រាប់តែទន់ខ្សោយ។ នៅល្ងាចថ្ងៃទី៣១ ខែមករា ក្រុមគ្រួសារបានហៅរថយន្តសង្គ្រោះបន្ទាន់ ខណៈដែលស្ថានភាពរបស់នាងកាន់តែធ្ងន់ធ្ងរទៅៗ ដោយសារតែទ្រាំទ្រនឹងជំងឺលែងបានទើបដល់ថ្ងៃទី០២ ខែកុម្ភៈនាងស្រាប់តែទទួលមរណភាពភ្លាមៗ។ ការស្លាប់របស់តារាស្រីតៃវ៉ាន់ មិនត្រឹមតែធ្វើឲ្យក្រុមគ្រួសារមានការសោកស្ដាយនោះទេ សូម្បីតែអ្នកគាំទ្រនាងទូទាំងប្រទេសអាស៊ី ក៏មានការរក់ស្លុតសឹងមិនជឿព័ត៌មានឡើយ៕