លោក អ៊ួន សារ៉ាត់ ផ្អាកផលិតមាតិកាមួយរយៈ ព្រោះមានបញ្ហាហិរញ្ញវត្ថុ និងសុខភាព

លោក អ៊ួន សារ៉ាត់ ចេញមកអះអាងថា លោកមិនបោះបង់ការធ្វើមាតិកានោះទេ លោកគ្រាន់តែផ្អាកមួយរយៈពេលសិនប៉ុណ្ណោះ។ ការអះអាងនេះ គឺបន្ទាប់ពីលោកអាក់ខានពុំសូវបានចេញផលិតវីដេអូដូចមុន ធ្វើឱ្យអ្នកគាំទ្រលោកមានចម្ងល់។

ពាក់ព័ន្ធនឹងការផ្អាកផលិតវីដេអូនេះដែរ លោកបញ្ជាក់ថា គឺដោយសារតែលោកមានបញ្ហាហិរញ្ញវត្ថុ និងសុខភាព ខណៈលោកត្រូវការពេលសម្រាកដើម្បីឱ្យសុខភាពប្រសើរឡើងវិញ ទើបបន្តនាំអារម្មណ៍អ្នកគាំទ្រមើលសកម្មភាពផ្សេងៗ តាមកន្លែងនានាជាមួយលោកទៀត។ ទន្ទឹមនេះ លោកក៏បានបញ្ជាក់ដែរថា មួយរយៈទៀតនៅពេលដែលលោកប្រសើរ លោកនឹងបន្តផលិតមាតិកាទៀតហើយ។

ទោះបីជាមិនមានការបញ្ជាក់ពីស្ថានភាពសុខភាពរបស់លោកបន្ថែម តែសាធារណជនដែលជាអ្នកគាំទ្រលោក បានបញ្ចេញមតិជូនពរលោកគ្រប់ៗគ្នា ខណៈខ្លះទៀត ក៏មានចែករំលែកនូវការថែទាំសុខភាពដល់លោកផងដែរ។

គួររំលឹកដែរថា ប្រមាណជា ៣ឆ្នាំកន្លងទៅ លោក អួន សារ៉ាត់ ធ្លាប់ធ្លាក់ខ្លួនឈឺធ្ងន់អំឡុងពេលនៃវិបត្តិជំងឺកូវីដ១៩ ដោយគ្រានោះ លោករលាកសួតធ្ងន់ធ្ងររហូតត្រូវប្រើប្រាស់ឧបករណ៍ដកដង្ហើម ក៏ព្រោះតែលោកពុំអាចដកដង្ហើមដោយខ្លួនឯងបាន។ ជាមួយនឹងការព្យាបាលដោយយកចិត្តទុកដាក់ ពីសំណាក់ក្រុមគ្រូពេទ្យ ជីវិតលោក អ៊ួន សារ៉ាត់ ក៏ត្រូវបានដណ្តើមចេញពីមច្ចុរាជបានមកវិញ។ ចាប់តាំងពីពេលនោះមក លោកហាក់បាក់ស្បាតនឹងស្ថានភាពសុខភាពរបស់លោកណាស់ ហើយថែមទាំងបានចេញសារដាស់តឿនសាធារណជនថា “ប្រឹងចុះ ប៉ុន្តែត្រូវតែហូបចុកនិងដេកឱ្យបានគ្រប់គ្រាន់ ទើបសុខភាពមិនទ្រុឌទ្រោម“។

លោក អួន សារ៉ាត់ កើតអំឡុងឆ្នាំ១៩៨៣ ជាអ្នកខេត្តបាត់ដំបង។ លោកជាកូនទី៥ ក្នុងចំណោមបងប្អូនបង្កើត ៧នាក់។ លោក អួន សារ៉ាត់ ត្រូវបានគេស្គាល់ថាជាអ្នកនិពន្ធសៀវភៅ និងជាគ្រូបង្រៀនទ្រឹស្តីជោគជ័យតាមប្រព័ន្ធអនឡាញ តាមរយៈការចែករំលែកចំណេះដឹងតាមបណ្តាញទំនាក់ទំនងសង្គម៕